ទាហានអាហ្វហ្គានីស្ថានបានធ្វើការវាយបកទៅលើក្រុមឧទ្ទាមស្លាប់ជាច្រើននាក់

នៅក្នុងការវាយប្រហារកាលពីថ្ងៃទី៩ ខែឧសភា កម្លាំងទាហានអាហ្វហ្គានីស្ថានបានសម្លាប់ក្រុមសកម្មប្រយុទ្ធអស់ជាង ៧០នាក់។ ការវាយប្រហារខាងលើធ្វើឡើង ក្នុងរយៈពេល ២៤ម៉ោងមកនេះ គឺបាន សម្លាប់ក្រុមសកម្មប្រយុទ្ធអស់៧១នាក់ ក្នុងនោះបង្កឲ្យមានអ្នករបួសចំនួន៣៥នាក់ និងចាប់ខ្លួនបាន៧នាក់ផងដែរ” ។

ក្រៅពីនេះកម្លាំងទាហាន អាហ្វហ្គានីស្ថានបានរឹបអូសអាវុធជាច្រើនពីក្រុមភេរវកម្ម។ចំណែកទាហាន អាហ្វហ្គានីស្ថានវិញ មិនមានការរាយការណ៍ណាមួយអំពីការស្លាប់ នៅក្នុងអំឡុងពេលប្រតិបត្តិការនេះនោះទេ ។

នៅក្នុងសេចក្តីប្រកាសព័ត៌មានបានឲ្យដឹងទៀតថា ពួកគេ (យោធា)បានរកឃើញគ្រាប់បែកដែលបង្កប់នៅលើដងផ្លូវជាច្រើនកន្លែង និងគ្រាប់មីន ក្នុងអំឡុងពេលធ្វើការឡោមព័ទ្ធទីតាំងដែល ស្ថិតនៅក្នុងខេត្តចំនួន១៧ក្នុងចំណោមខេត្ត៣៤របស់ប្រទេស​អាហ្វហ្គានីស្ថាន ។

ក្រៅពីប្រទេសអាហ្វហ្គានីស្ថាន នៅ អុីរ៉ាក់វិញកម្លាំងទាហាន ក៏បានបើកការវាយប្រហារសម្លាប់ភេរវករជាច្រើនផងដែរ។តាមការប្រកាសរបស់ទាហានអុីរ៉ាក់ បានឲ្យដឹង​ថា ក្រុមជ្រុលនិយមរដ្ឋអ៊ិស្លាម ប្រមាណជា ជាង១០០នាក់ ត្រូវបានសម្លាប់កាលពី​ថ្ងៃអង្គារ ដោយការវាយប្រហារ តាម​អាកាស១៥លើករបស់ ក្រុមយន្តហោះ ចម្បាំងប្រទេសអុីរ៉ាក់សំដៅលើ ទីតាំងមួយ ចំនួនរបស់ក្រុមIS នៅភាគខាងលិចនៃ​ខេត្តAnbar របស់ប្រទេសអុីរ៉ាក់។

ដោយផ្អែកទៅលើរបាយការណ៍ដែលទទួលបានពី ក្រុមស៊ើបការណ៍ពិសេស បានឲ្យដឹងថា យន្តហោះចម្បាំងរបស់អុីរ៉ាក់ ជាច្រើនគ្រឿងបានបើកការវាយប្រហារតាម អាកាស១១លើកដំបូងសម្លាប់ក្រុមIS អស់៤៧នាក់ ក្នុងក្រុងAana ហើយការវាយ ប្រហារបន្ថែម៤ដងទៀត ទៅលើក្រុងal Qaim ចម្ងាយប្រមាណជា៣៣០គីឡូម៉ែត្រ ពីទីក្រុងបាដាដសម្លាប់ក្រុមនេះ ថែម៥៣នាក់ទៀតនៅក្នុងថ្ងៃដដែលជាមួយគ្នា។

ការប្រយុទ្ធយ៉ាងជោកជាំរវាងក្រុមកងកម្លាំង នៃប្រទេសអុីរ៉ាក់នឹងក្រុមប្រយុទ្ធIS បានធ្វើឡើងនៅក្នុងរយៈពេលថ្មីៗនេះ ដោយក្នុងនោះ ការវាយប្រហារតាម​អាកាសដោយ យន្តហោះF-16និងSukhoi កាលពីខែមេសាកន្លងទៅបាន សម្លាប់ ក្រុមISអស់៤៦នាក់ផងដែរ៕ ម៉ែវ សាធី