សារព័ត៌មាន នគរវត្ត តែងតែនាំមុខគេជានិច្ច
ក្រុបបិសាចក្រហម Manchester United បានក្លាយជាជើងឯក UEFA Europa League បន្ទាប់ពីយកឈ្នះ Ajax ក្នុងលទ្ធផល ២-០ នៅទឹកដីកណ្តាលប្រទេសស៊ុយអែត ។ នេះគឺជាការឈ្នះពានលំដាប់ទី២ទ្វីបអឺរ៉ុបលើកដំបូងក្នុងប្រវត្តិសាស្ត្ររបស់ក្រុមបិសាចក្រហម ហើយជ័យជម្នះនេះជួយពួកគេឲ្យបានកៅអី UEFA Champions League ផងដែរសម្រាប់រដូវកាលក្រោយធ្វើឲ្យអង់គ្លេសនឹងមាន៥ក្រុមចូលរួមប្រកួត។
ខ្សែបម្រើដ៏មានឥទ្ធិពល Paul Pogba បានជួយឲ្យក្រុមបិសាចក្រហម Manchester United ធ្វើដំណើរឆ្ពោះទៅកាន់ការទទួលជ័យជម្នះក្នុងលទ្ធផល ២-០ លើក្រុម Ajax Amsterdam កាលពីថ្ងៃពុធ ក្នុងការប្រកួតក្របខ័ណ្ឌ Europa League វគ្គផ្តាច់ព្រ័ត្រ ក្រោយពីការរំជួលចិត្តផ្សេងៗ ដោយសារតែការវាយប្រហារភេរវកម្ម កាលពីដើមសប្តាហ៍នេះក្នុងទីក្រុង Manchester។
គ្រាប់បាល់ទីមួយកើតឡើងនៅនាទីទី១៧ជាការស៊ុតបញ្ចូលទីជើងឆ្វេងយ៉ាងល្អពីខ្សែបម្រើសញ្ជាតិបារាំង Paul Pogba ក្រោយពីការពញ្ជូនបាល់របស់កីឡាករ Fellaini។ ចូលដល់តង់ទី២ កីឡាករ Mkhitaryan ស៊ុតបានមួយគ្រាប់ទៀតបន្ទាប់ពី Smalling តែតបាល់ទម្លាក់ឲ្យ នៅនាទីទី៤៧ ធ្វើឲ្យចប់ការប្រកួតបិសាចក្រហមបានយកឈ្នះក្រុម Ajax ២-០ ដោយមាន ការអបអរសាទរពីអ្នកគាំទ្រយ៉ាងច្រើននៅឯកីឡដ្ឋាន Friends Arena ក្នុងទីក្រុង Stockholm ប្រទេសស៊ុយអែត ។
ការទទួលជ័យជម្នះនេះបានជួយឲ្យគ្រូបង្វឹកក្រុម Man United គឺលោក Jose Mourinho បញ្ចប់រដូវកាលជាលើកទី១របស់លោកនៅកីឡដ្ឋាន Old Trafford ទាំងភាពជោគជ័យ ក្រោយពីលោកបាននិយាយមុនការប្រកួតនេះថា រូបលោកផ្ទាល់ និងកីឡាករទាំងអស់ សប្បាយរីករាយ ប៉ុន្តែក៏មិនអាចបំភ្លេចបានជាមួយនឹងសោកនាដកម្មនៅទីក្រុង Manchester ដែរ។
គ្រូបង្វឹករូបនេះបានដឹកនាំឲ្យ Man United ឈ្នះពាន League Cup រួចជាស្រេច បើទោះបី បានបញ្ចប់ក្នុងចំណាត់ថ្នាក់លេខ៦នៃក្របខ័ណ្ឌអង់គ្លេស Premier League ក៏ដោយ ។ ប៉ុន្តែការឈ្នះពានក្របខ័ណ្ឌ Europa League មានន័យថា ក្រុមរបស់លោកនឹងឈ្នះកៅអីទៅលេងក្នុងក្របខ័ណ្ឌ Champions League នៅរដូវកាលក្រោយ។
សូមបញ្ជាក់ថា ក្រុមបិសាចក្រហម Manchester United បានឈ្នះពានរង្វាន់ Europa League បានធ្វើឲ្យក្លិបមួយនេះក្លាយជាក្លិបឈ្នះពានច្រើនលើសគេ ក្នុងចំណោមក្លិបអង់គ្លេសផ្សេងទៀត។ សរុបពានទាំង៤២របស់បិសាចក្រមរួមមាន ពានលីគ២០ដង, FA Cups ១២ដង, League Cups ៥ដង, European Cups/UEFA Champions League ៣ដង និងពានអឺរ៉ុបកិត្តិយស២ដងផ្សេងទៀត។ ចំណែកក្រុមដែលនៅពីក្រោម Manchester United មានដូចជា៖ Liverpool មាន៤១ពាន, Arsenal ២៩ពាន, Chelsea ២២ពាន និង Aston Villa ២០ពាន៕ ដេវីត
