សារព័ត៌មាន នគរវត្ត តែងតែនាំមុខគេជានិច្ច
បន្ទាប់ពីរដូវកាលចាស់ 2015-2016 ខ្សែបម្រើឆ្នើមរូបនេះបានបង្ហាញទម្រង់លេងដ៏ល្អ ដែលបានជួយក្រុមកញ្ជ្រោងខៀវ Leicester City ឈ្នះពានរង្វាន់លំដាប់កំពូល English Premier League ដ៏ភ្ញាក់ផ្អើលរួចមក Mahrez ត្រូវបានទទួលការចាប់អារម្មណ៍ពីក្លិបធំៗមានដូចជា Barcelona និងកាំភ្លើងធំ Arsenal ជាដើមកាលពីរដូវកាលមុន។
ខ្សែបម្រើ Riyad Mahrez របស់ក្លិប Leicester City មានទំនាក់ទំនងក្នុងការផ្លាស់ទៅលេងនៅក្លិបអ្នកមានបុណ្យ Barcelona ពិសេសជាគោលដៅអាចទៅលេងនៅតំបន់កណ្តាល ដើម្បីគាំទ្រកំពូលខ្សែប្រយុទ្ធឆ្នើម Lionel Messi នៅរដូវក្តៅខាងមុខនេះ។
ទោះបីជាលោក Claudio Ranieri អតីតគ្រូបង្វឹក Leicester City ត្រូវបានបណ្តេញចេញពីក្លិប ប៉ុន្តែ Mahrez មានភាពសប្បាយរីក រាយ និងបានបន្តលេងឲ្យក្លិប ជាមួយមិត្តរួមក្រុមរហូតបញ្ចប់រដូវកាលថ្មី 2016-2017 នេះ។
កីឡាករ Mahrez វ័យ២៦ឆ្នាំសញ្ជាតិអាល់ហ្សេរីរូបនេះ បានពិភាក្សាលើកកិច្ចព្រមព្រៀងផ្ទាល់ខ្លួន ក្នុងការផ្លាស់ទៅកាន់ Barcelona ក្នុងតម្លៃខ្លួនប្រមាណ35លានផោនពេលបញ្ចប់រដូវកាល 2016-2017 បន្ទាប់ពីខកខានក្នុងការផ្លាស់ទៅ លេងនៅទីនោះកាលពីខែមិថុនាឆ្នាំមុន មូលហេតុគឺបណ្តាលមកពីគ្រូបង្វឹកលោក Luis Enrique បានផ្លាស់ប្តូរចិត្តបង្ខែរទិសដៅទិញកីឡាករផ្សេងវិញ។
សូមបញ្ជាក់ថា សម្រាប់ក្លិប Barcelona បានត្រឹមលេខ២នៅលីកកំពូលអេស្ប៉ាញ ដែលធ្វើឲ្យក្លិបមួយនេះ កំពុងស្វែងរកកីឡាករខ្សែបម្រើ ខ្សែប្រយុទ្ធឆ្នើម ដើម្បីមកពង្រឹងក្រុមរបស់ខ្លួន ឡើងវិញមានដូចជា ខ្សែប្រយុទ្ធសញ្ជាតិបារាំង Griezmann របស់ At.Madrid និងកីឡាករវ័យក្មេង Dybala របស់ក្រុម Juventus, កីឡាករ Isco និងកីឡាករ Marco Verratti ជាដើម ៕ ដេវីត
