សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ លោកស្រីដួង វណ្ណា និងលោកស្រីឈុន សារឹមអ្នកតំណាងរាស្ត្រមណ្ឌលស្វាយរៀងតំណាងលោកស្រីម៉ែន សំអន ឧបនាយករដ្ឋមន្ត្រីនាព្រឹកថ្ងៃទី១៥ ខែកញ្ញា ឆ្នាំ២០១៧ បានអញ្ជើញចូលរួមកាន់បិណ្ឌទី១០ នៅវត្តជម្ពូប្រឹក្សាហៅវត្តថ្មី ស្ថិតនៅក្នុងសង្កាត់សង្ឃ័ក្រុងស្វាយរៀង ដែលពិធីនេះធ្វើឡើង ស្របតាមប្រពៃណី ព្រះពុទ្ធសាសនា និងដើម្បីប្រមូលបច្ច័យមួយចំនួន កសាងទីអារាមវត្តនេះ ឲ្យមានការអភិវឌ្ឍន៍ ស្របពេលដែលប្រទេសកម្ពុជាទាំងមូល កំពុងតែអភិវឌ្ឍន៍រីកចំរើនយ៉ាងឆាប់រហ័សនោះ ។
ក្នុងឱកាសនោះ ក៏មានការចូលរួមពីសំណាល់លោកតូច ប៉ូលីវ៉ា អភិបាលរងខេត្ត និងលោកអភិបាលក្រុងស្វាយរៀងព្រមទាំងសហការីព្រមទាំងពុទ្ធបរិស័ទ្ធយ៉ាងច្រើនកុះករផងដែរ។
ក្នុងពិធីដាក់បិណ្ឌនេះដែរ លោកស្រីដួង វណ្ណាអ្នកតំណាងរាស្ត្រមណ្ឌលស្វាយរៀងតំណាងលោកស្រីម៉ែន សំអន ឧបនាយករដ្ឋមន្ត្រីព្រមទាំងមន្ត្រីក្រោមឱវាទទាំងអស់ ក៏បានសូត្រមន្ត ដើម្បីកាន់បិណ្ឌ និងប្រគេនទេយ្យទានមួយចំនួនដល់ព្រះសង្ឃជាច្រើនអង្គ ដែលគង់នៅទីអារាមវត្តជម្ពូប្រឹក្សាហៅវត្តថ្មីដើម្បីឧទ្ទិសកុសល ផលបុណ្យជូនដល់បុព្វកាលរីជន មានមាតា បីតា ជីជូន ជីតា ញាតិកាល ទាំង៧សន្តាន ដែលបានបែកកាយ រំលាយដ្ឋានទៅកាន់លោកខាងមុខ ។
គួរបញ្ជាក់ថា បុណ្យនេះត្រូវបាន ពុទ្ធសាសនិកខ្មែរ ធ្វើឡើងរៀងរាល់ឆ្នាំចាប់ពី ថ្ងៃ១រោច ដល់ថ្ងៃ១៥រោច ខែភទ្របទ (ចន្លោះ ខែកញ្ញា ) ។ ពុទ្ធសាសនិក ខ្មែរធ្វើ បុណ្យ នេះដោយការយកទេយ្យទានផ្សេងៗ មានអាហារជាដើម ទៅផ្គត់ផ្គង់ព្រះសង្ឃ នៅក្នុងវត្តដែលកំពុងគង់ចាំ វស្សារយៈពេល ១៥ថ្ងៃ ។
ដោយហេតុពុទ្ធសាសនិក មានការមមាញឹក ចំពោះកិច្ចានុកិច្ចប្រចាំថ្ងៃ និងដើម្បីធានាថា ព្រះសង្ឃត្រូវបានផ្គត់ផ្គង់ ជាទៀងទាត់នោះ ទើបគេចែកជាក្រុមៗ ដាក់វេនគ្នាយក ទេយ្យទានទៅប្រគេនព្រះសង្ឃរយៈពេល ១៤ថ្ងៃ ចាប់ពីថ្ងៃ១រោច ដល់ថ្ងៃ១៤រោច ខែភទ្រ បទហើយឲ្យឈ្មោះថា វេនទី ១ រហូតដល់វេន ទី ១៤ ។ រយៈពេល១៤ថ្ងៃនេះ ឲ្យឈ្មោះថា បុណ្យ កាន់បិណ្ឌ ឬបុណ្យដាក់បិណ្ឌ ។ ចំណែកថ្ងៃ ១៥រោច ដែលជាថ្ងៃចុងក្រោយនោះ ពុទ្ធសាសនិក ពីគ្រប់វេនទាំងអស់ បានមកជួបជុំគ្នា ធ្វើទានចំពោះសង្ឃជាមួយគ្នា ដើម្បីបញ្ចប់បុណ្យកាន់បិណ្ឌ ។ លុះ ថ្ងៃទី១៥ត្រូវ នឹងថ្ងៃ១៥រោច ខែភទ្របទ ដែលជាថ្ងៃចុង ក្រោយនេះឲ្យឈ្មោះថា ភ្ជុំបិណ្ឌឬថ្ងៃភ្ជុំបិណ្ឌ៕ យឹម សុថាន
