សារព័ត៌មាន នគរវត្ត តែងតែនាំមុខគេជានិច្ច
ក្រុមបិសាចក្រហម Manchester United បានរក្សាតំណែងចំណាត់ថ្នាក់លេខ២ និងមានសង្ឃឹមស្ទើរ១០០ភាគរយដើម្បីរក្សាក្លិបក្នុងតំបន់Top 4 (ក្រុមកំពូលតារាងទាំង៤) ក្រោយពីយកឈ្នះក្រុមកាំភ្លើងធំArsenal ក្នុងលទ្ធផល ២-១ កាលពីរាត្រីថ្ងៃទី២៩ ខែមេសា ។ ការប្រកួតនោះក៏ជាការប្រកួតចុងក្រោយនៅកីឡដ្ឋាន Old Trafford សម្រាប់ការអ្នកចាត់ការទូទៅលោក Arsene Wenger របស់ក្រុមកាំភ្លើងធំផងដែរ ។
ក្រោយចប់ការប្រកួតអ្នកគាំទ្រពេញមួយកីឡដ្ឋាន Old Trafford ប្រមាណជាង៧ម៉ឺននាក់បានក្រោកឈរទះដៃជូនដំណើរលោក Arsene Wenger សម្រាប់ការដឹកនាំចុងក្រោយរបស់លោកប៉ះ Manchester United ក្នុងនាមជាអ្នកចាត់ការ Arsenal។ នៅមុនការប្រកួតសត្រូវចាស់លោក Jose Mourinho អ្នកចាត់ការទូទៅក្រុមបិសាចក្រហមបានទៅចាប់ដៃស្វាគមន៍បុរសសញ្ជាតិបារាំងក្នុងនាមជាមិត្តភក្ដិចាស់បើទោះជាអ្នកទាំងពីរធ្លាប់ប៉ះទង្គិចគ្នាសឹងតែកើតហិង្សាកាលពីអតីតកាលក៏ដោយ ។
ក្នុងជំនួបគូប្រកួតទាំងពីរនោះក្រុមម្ចាស់ផ្ទះបិសាចក្រហមបាននាំមុខ១គ្រាប់មុននៅនាទីទី១៦ ដោយថ្វីជើងខ្សែបម្រើ Pogba មុនពេលខ្សែបម្រើប្រយុទ្ធរបស់ក្រុមកាំភ្លើងធំ Mkhitaryan តាមស្មើបានវិញនៅនាទីទី៥១។ លុះមកដល់នាទីទី៩០+១ កីឡាករខ្សែបម្រើសក់សំពោង Fellaini បានតែតបាល់បញ្ចូលទីឲ្យបិសាចក្រហមឈ្នះក្រុមកាំភ្លើង ២-១ ។
ក្រោយចប់ការប្រកួតលោក Jose Mourinho អ្នកចាត់ការទូទៅរបស់ក្រុម Manchester United សង្ឃឹមថា លោកទទួលបានឱកាសក្នុងការជួបជាមួយនឹងលោក Arsene Wenger ម្តងទៀត ក្រោយពីការធ្វើដំណើរទៅប្រកួតនៅលើទឹកដី Old Trafford ជាលើកចុងក្រោយក្នុងនាមជាអ្នកចាត់ការទូទៅនៃក្រុម Arsenalដែល បានបញ្ចប់ទាំងការបរាជ័យក្នុងលទ្ធផល ២-១ កាលពីថ្ងៃអាទិត្យ។
លោក Wenger ត្រូវបានស្វាគមន៍ដោយអតីតគ្រូបង្វឹករបស់ក្រុម Man United លោក Alex Ferguson និងលោក Mourinho នៅមុនពេលចាប់ផ្តើមការប្រកួត ហើយគ្រូបង្វឹករូបនេះ ក៏ទទួលបានកាដូជាអនុស្សាវរីយ៍ផងដែរ។ ប៉ុន្តែទោះបីជាយ៉ាងណា លោក Wenger មិនទទួលបានអ្វីៗសោះបើនិយាយពីពិន្ទុវិញ ខណៈដែលការបរាជ័យ បានធ្វើឲ្យក្រុមឈរលេខ៦ Arsenal ធ្លាក់ចេញពីការប្រជែងយកចំណាត់ថ្នាក់លេខ៤។
លោក Mourinho ធ្លាប់មានប្រវត្តិឈ្លោះគ្នាដោយពាក្យសម្តីជាមួយនឹងលោក Wenger ដោយភាគច្រើនលោកបានចាត់ទុកគ្រូបង្វឹកសញ្ជាតិបារាំងរូបនេះថា «ជាអ្នកជំនាញម្នាក់ខាងបរាជ័យ» សម្រាប់ការអសមត្ថភាពរបស់លោក ក្នុងការឈ្នះពានក្របខ័ណ្ឌ Premier League ចាប់តាំងរដូវកាលឆ្នាំ២០០៣-២០០៤។ ប៉ុន្តែគ្រូបង្វឹកសញ្ជាតិព័រទុយហ្គាល់រូបនេះបានឲ្យដឹងថា «ខ្ញុំសង្ឃឹមថា ខ្ញុំអាចលេងជាមួយនឹងគាត់ម្តងទៀត។ ខ្ញុំសង្ឃឹមថា វាអាចកើតឡើងម្តងទៀត។ ប្រសិនបើមិនស្ថិតក្នុងក្របខ័ណ្ឌ Premier League មិនមាននរណាដឹង យើងអាចមានការប្រកួតដ៏ធំមួយនៅកន្លែងផ្សេងបានទៀត» ៕ ដេវីត
