សារព័ត៌មាន នគរវត្ត តែងតែនាំមុខគេជានិច្ច
ភ្នំពេញៈ ការប្រកួតកីឡាប្រដាល់កំពូលជើងឯក TV5 Boxing Knock out Series (K-Cement) វគ្គជម្រុះជុំទី១ នៅស្ទូឌីយ៉ូ ប៉ុស្តិ៍លេខ៥ ភូមិព្រែកថ្លឹង បានចាប់ផ្តើម យ៉ាងកក្រើកសង្វៀនតែម្តង ដោយសារការប្រកួតរបស់កីឡាករ គឺបញ្ចេញអស់ពីសមត្ថភាព អស់ពីក្បាច់គុនដែលរៀនចេះទាំងប៉ុន្មាន យកមកប្រើនៅលើសង្វៀនផ្ទាល់តែម្តង ធ្វើឲ្យអ្នកទស្សនាជក់ចិត្ត ដិតអារម្មណ៍ ផ្ចង់ភ្នែក ហើបគូថពីកៅអី និងទះដៃយ៉ាងកងរំពងពេញផ្ទៃស្ទូឌីយ៉ូ កាលពីព្រលប់ថ្ងៃទី២៧ ខែតុលា ឆ្នាំ២០១៨ ។
កម្មវិធីប្រដាល់ក្បាច់គុនខ្មែរចាប់ផ្តើមពីវេលាម៉ោង១៨រហូតដល់ម៉ោង២០និង៣០នាទី នៅស្ទូឌីយូប៉ុស្តិ៍លេខ៥ ព្រែកថ្លឹង។ គណៈកម្មការរៀបចំការប្រកួតបានផ្គូរផ្គរគូប្រកួតចំនួន៥គូ ក្នុងនោះ មានគូពិសេសចំនួន២គូ, គូពានរង្វាន់២គូ និងគូអន្តរជាតិ១គូ ដែលកីឡាករ វង្ស ណយ ប្រភេទទម្ងន់៧០គីឡូក្រាម មកពីក្លិប កុលបុត្រគុនខ្មែរខណ្ឌទួលគោក បានប៉ះដៃគូដ៏ខ្លាំងរបស់ខ្លួនមកពីប្រទេសថៃ គឺកីឡាករ ឃុន ក្រុងថេប ដែលលទ្ធផល៥ទឹក កីឡាករកម្ពុជាចាញ់កីឡាករថៃ ដោយពិន្ទុ ។
ចំណែកគូពិសេសមាន២គូ គឺបើកឆាកប្រកួតកីឡាករ ទេស ជីវ៉ា ប្រភេទទម្ងន់៦៣.៥គីឡូក្រាម មកពីក្លិបបញ្ជាការដ្ឋានកងពលតូច៧០ ប៉ះជាមួយ សំ ខាំប៉ាវចិន ដែលគូនេះប្រកួតគ្នាយ៉ាងពេញសមត្ថភាព ធ្វើឲ្យអ្នកទស្សនាជក់ចិត្តយ៉ាងខ្លាំង មិនខុសគ្នាប៉ុន្មាននឹងគូចុងក្រោយ រវាងកីឡាករ ជា ឧត្តម ប្រភេទទម្ងន់៦០គីឡូក្រាម មកពីក្លិប ម៉ៃទីក្រាំងយ៉ូវ នឹង ហ៊ុន សំណាង មកពីក្លិបវិបុលដារិទ្ធិខណ្ឌពោធិ៍សែនជ័យនោះឡើយ ។ អ្នកទស្សនានៅបានស្ងើចសរសើរថា ពិតជាគូជក់ចិត្ត ទស្សនាមិនជិនណាយសោះឡើយ ។
បន្ទាប់ពីប្រកួតគូពិសេសទី១ចប់ ចូលដល់គូទី២ គឺការប្រកួតពានរង្វាន់ កំពូលជើងឯក TV5 Boxing Knock out Series (K-Cement) វគ្គជំរុះជុំទី១ រវាងកីឡាករ ឆាយ មាស ប្រភេទទម្ងន់៥៧គីឡូក្រាម មកពីក្លិបសំរោងកោងកីឡាខេត្តបាត់ដំបង ប្រកួតជាមួយ ងួន គា មកពីក្លិបតាលីដំរីមានរិទ្ធ ដោយលទ្ធផល ឆាយ មាស ឈ្នះ ងួ គា ដោយពិន្ទុ ។
គូប្រកួតពានរង្វានមួយគូទៀត រវាងកីឡាករ បឺត សង្ឃឹម ប្រភេទទម្ងន់៥៧គីឡូក្រាមដូចគ្នា មកពីក្លិបរ៉ាហាប់ស្វាយប៉ាក ប៉ះប្រកួតជាមួយ កីឡាករ សយ សី មកពីក្លិប វិបុលដារិទ្ធិ ខណ្ឌពោធិ៍សែនជ័យ ដែលលទ្ធផល សយ សី ចាញ់ពិន្ទុបឺត សង្ឃឹម ក្នុងការប្រកួតរយៈពេល៣ទឹកប៉ុណ្ណោះសម្រាប់គូពានរង្វាន់នោះ ។
សូមបញ្ជាក់ថា នេះជាការប្រកួតជ្រើសរើសជើងឯក TV5 Boxing Knock out Series (K-Cement) រដូវកាលទី៤ ដែលមានកីឡាករចូលរួមប្រកួតប្រជែងដណ្តើមយកពានលេខ១ រហូតដល់៣២នាក់ ។
ក្នុងឱកាសបើកកម្មវិធីប្រកួត លោកតែម ម៉ឺន ប្រធានសហព័ន្ឋកីឡាប្រដាល់កម្ពុជា បានផ្តាំផ្ញើដល់កីឡាករទាំង៣២រូបដែលមានឈ្មោះប្រកួត ត្រូវតែបង្ហាញក្បាច់គុន ល្បិចប្រយុទ្ធ ឲ្យបានប្រសើរបំផុតតាមតែអាចធ្វើទៅបាន ដើម្បីលើកកម្ពស់គុនខ្មែរមួយនេះដែលល្អប្រសើរហើយនោះឲ្យរឹងរិតតែប្រសើរថែមទៀត និងថា គណៈកម្មការទាំងអស់ផងដែរ ត្រូវពង្រឹងការងារដាក់ពិន្ទុដោយឈរលើគោលការណ៍សុក្រិតភាព អាចឲ្យទស្សនិកជនទទួលយកបាន ។
ជាមួយគ្នា តំណាងស្ថានីយទូរទស្សន៍ប៉ុស្ដិ៍លេខ៥ លោក ឧត្តមសេនីយ៍ទោ សិន សុផាត បានថ្លែងថា ប៉ុស្ដិ៍លេខ៥ បានបើកការប្រកួតជ្រើសរើសជើងឯក ដោយប្រើរូបមន្តជម្រើសយកកីឡាករចំនួន៣២រូប ក្នុងប្រភេទទម្ងន់ដូចៗគ្នា ឲ្យមកចាប់គូគ្នាប្រកួត ចាញ់គឺធ្លាក់ៗ ដូចការប្រកួតកន្លងមកអីចឹងដែរ ។
លោកថា នេះជាការបណ្ដុះកីឡាករថ្មីៗ ឲ្យក្លាយជាកីឡាករមានឈ្មោះបោះសំឡេង ហើយក្នុងនោះ កីឡាករម្ចាស់ពាន ក៏មានមុខឡើងប្រកួតជាគូឯក និងជាគូអន្តរជាតិផងដែរ ៕ ស តារា
