សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្ដាល៖ បុរសវ័យចំណាស់ម្នាក់មានជំងឺសរសៃប្រសាទ បានសម្រេចចិត្តចងក ធ្វើអត្តឃាតសម្លាប់ខ្លួន នៅលើដើមស្វាយ ដោយពុំដឹងថា មានវិបត្តិអ្វីនោះទេ ។
ហេតុការណ៍ខាងលើនេះ បង្កការភ្ញាក់ផ្អើលឡើងនៅវេលាម៉ោង១០និង៤៥នាទីព្រឹក ថ្ងៃទី២៧ ខែតុលា ឆ្នាំ២០១៨ ត្រង់ចំណុចនៅលេីដើមស្វាយក្រោយផ្ទះជនរងគ្រោះ ស្ថិតនៅភូមិកោះរះលើ ឃុំកោះរះ ស្រុកល្វាឯម ខេត្តកណ្តាល ។
មន្ត្រីនគរបាលស្រុកល្វាឯមបានឲ្យដឹងថា ជនរងគ្រោះឈ្មោះ អ៊ែល សំអុន ភេទប្រុស អាយុ៦៤ឆ្នាំ ជនជាតិខ្មែរ មុខរបរ កសិករ មានទីលំនៅភូមិកោះរះលើ ឃុំកោះរះ ស្រុកល្វាឯម ខេត្តកណ្តាល ។
ប្រភពដដែលបន្តថា តាមការបំភ្លឺរបស់សាច់ញាតិជនរងគ្រោះបានឲ្យដឹងថា ជនរងគ្រោះជាមនុស្សតែមានជំងឺប្រចាំកាយ និងធ្លាប់បានចងកធ្វើអត្តឃាតខ្លួនឯងម្ដងរួចមកហើយ តែក្រុមគ្រួសារជួយទាន់ពេល ។ លុះមកដល់ថ្ងៃខែកើតហេតុខាងលើ នៅវេលាពេលព្រឹក ជនរងគ្រោះបានពាក់ស្បែកជើងផ្ទាត់របស់ខ្លួន យកទៅទុកមុខបន្ទប់ទឹក ហើយកូន និងប្រពន្ធស្មានតែនៅក្នុងបន្ទប់ទឹក រហូតយូរពេកមានការងឿងឆ្ងល់ កូនក៏បើកបន្ទប់ទឹកមើលតែមិនឃើញឪពុក រួចក៏ដើរទៅរកនៅខាងក្រោយផ្ទះ ស្រាប់ប្រទះឃេីញជនរងគ្រោះបានចងកធ្វើអត្តឃាតសម្លាប់ខ្លួនទៅនឹងមែកស្វាយស្លាប់បាត់ទៅហើយ ក៏ភ្ញាក់ផ្អើលដល់ប្រជាពលរដ្ឋជិតខាង និងរាយការណ៍ជូនសមត្ថកិច្ចជំនាញចុះធ្វើការពិនិត្យ និងកោសល្យវិច័យសាកសព រួចបញ្ជាក់ថា ជនរងគ្រោះពិតជាស្លាប់ ដោយចងកធ្វើអត្តឃាតពិតប្រាកដមែន ។
ក្រោយពីពិនិត្យរួច សមត្ថកិច្ចបានប្រគល់សាកសពជូនក្រុមគ្រួសារ យកទៅធ្វេីបុណ្យតាមប្រពៃណី ៕ ស្អាងជ័យ
