សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ប្រជាពលរដ្ឋបានប្រទះឃើញម៉ូតូ១គ្រឿង ត្រូវបានជនមិនស្គាល់មុខ យកទៅប្លុងចោល នៅលើភ្លឺស្រែមួយកន្លែង នៅជិតវត្តតាភេម ស្ថិតនៅក្នុងភូមិតាភេម សង្កាត់កំបូល ខណ្ឌពោធិ៍សែនជ័យ រាជធានីភ្នំពេញ នៅវេលាព្រឹកថ្ងៃទី២៧ ខែវិច្ឆិកា ឆ្នាំ២០១៨ ។
ប្រជាពលរដ្ឋបានឲ្យដឹងថា ម៉ូតូ១គ្រឿង នោះម៉ាកគុបជ្រុងសេ៩០ពណ៌ទឹក សមុទ្រពាក់ស្លាកលេខ ក-0215ភព1 ហើយពួកគាត់បានប្រទះឃើញជនមិនស្គាល់មុខយកទៅប្លុងចោលនៅត្រង់ចំណុចខាងលើរយៈពេល២ថ្ងៃមកហើយ ។ ចាប់តាំងពីថ្ងៃទី២៦ ខែវិច្ឆិកា មកម្ល៉េះ ប៉ុន្តែខណៈនោះគាត់នឹកស្មានថា ម៉ូតូរបស់អ្នកច្រូតស្មៅគោ ឬចងសន្ទូច និងមើលអន្លុងត្រី ទើបគ្មានការភ្ញាក់ផ្អើលហើយមិនបានរាយការណ៍ជូននគរបាលឲ្យទៅមើល ។ លុះដល់វេលាព្រឹកថ្ងៃទី២៧ ខែវិច្ឆិកា ឆ្នាំ២០១៨ ឃើញម៉ូតូនេះនៅទីនោះទៀត ទើបរាយការណ៍ជូននគរបាលឲ្យទៅមើល និងអូសយកទៅរក្សាទុក ។
នគរបាលប៉ុស្ដិ៍កំបូលបានឲ្យដឹងថា ក្រោយពីទទួល បានដំណឹងពីប្រជាពលរដ្ឋ កម្លាំងបានចុះទៅកាន់កន្លែងកើតហេតុភ្លាមៗ ហើយបានអូសយកម៉ូតូនោះតែជាប់សោរក រួចក៏យកទៅរក្សាទុកនៅប៉ុស្តិ៍នគរបាល ។
នគរបាលបានបន្តទៀតថា នៅជិតម៉ូតូនោះមានមួកសុវត្ថិភាព១ ប៉ុន្តែបែកខូចខាតអស់ហើយ និងមានស្បែកជើងសូក១សម្រាប់ក្បែរនោះផងដែរ ។ ម្យ៉ាងទៀតនៅមិនទាន់ដឹងថា ម៉ូតូនេះមានជាប់ពាក់ព័ន្ធទៅ នឹងបទល្មើសអ្វីនៅឡើយទេ ប៉ុន្តែសង្ស័យថា ត្រូវជនសង្ស័យលួចយកចេញពីកន្លែងណាមួយហើយយកចេញមិនរួច ក៏ប្លុងចោលតែម្ដង ៕ សុខាសែនជ័យ
