លោក ឃួង ស្រេង បានណែនាំខណ្ឌ សង្កាត់ ត្រូវបន្តសកម្មភាពរៀបចំសណ្តាប់ធ្នាប់ ក្នុងរាជធានី ឲ្យដូចភ្លៀងរលឹម

ភ្នំពេញ៖ លោក ឃួង ស្រេង អភិបាលរាជធានីភ្នំពេញ បានបញ្ជាឲ្យ អាជ្ញាធរពាក់ព័ន្ធបន្តសកម្មភាព រៀបចំសណ្តាប់ធ្នាប់ក្នុងរាជធានីឲ្យដូចភ្លៀងរលឹម លោក បានបញ្ជាបែបនេះ ខណៈលោក កោះប្រជុំជាមួយ អាជ្ញាធរ ខណ្ឌទាំង១២ និង សង្កាត់ ដើម្បី ផ្សព្វផ្សាយសេចក្តីណែនាំ ស្ដីពី ការរៀបចំសណ្តាប់ធ្នាប់តាមដងផ្លូវ និងការប្រើប្រាស់ចិញ្ចើមផ្លូវសាធារណៈទាំងអស់ ក្នុងភូមិសាស្រ្តរាជធានីភ្នំពេញឲ្យមានប្រសិទ្ធភាព កាលពីរសៀលថ្ងៃអង្គារ ២រោច ខែបុស្ស ឆ្នាំច សំរឹទ្ធិស័ក ព.ស ២៥៦២ត្រូវនឹងថ្ងៃទី២២ មករា ឆ្នាំ២០១៩ នៅសាលារាជធានីភ្នំពេញ ។

លោក ឃួង ស្រេង បានបញ្ជាក់ថា៖ ក្រោយពីដាក់ចេញនូវសេចក្តីណែនាំលេខ 007/17 សណនចុះថ្ងៃទី 8 ខែសីហាឆ្នាំ 2017 ស្ដីពី ការដោះស្រាយចរាចរ និងរៀបចំសណ្ដាប់ធ្នាប់តាមដងផ្លូវ សាធារណះក្នុង រាជធានីភ្នំពេញ ក្នុងនោះផ្លូវ សំខាន់ចំនួន 11ខ្សែ ដើម្បីធ្វើជាគំរូសម្រាប់អនុវត្តវិធានការរួម ។ រដ្ឋបាលរាជធានីភ្នំពេញកត់សម្គាល់ឃើញថា មានប្រជាពលរដ្ឋ អ្នកប្រើប្រាស់ផ្លូវថ្នល់ និងភាគីពាក់ព័ន្ធទាំងអស់បានយល់ដឹងអំពីព្រំដែននៃកម្មសិទ្ធិ និងជាប្រយោជន៍សាធារណៈដោយបានកែប្រែទម្លាប់ និងឥរិយាបទនៃការប្រើប្រាស់ចិញ្ចើមផ្លូវសាធារណៈហើយបានចូលរួមជាមួយអាជ្ញាធរមានសមត្ថកិច្ចក្នុងការរៀបចំសណ្តាប់ធ្នាប់តាមដងផ្លូវ គឺបានទទួលការគាំទ្រពីមហាជនដ៏ច្រើនលើសលប់ ។

លោក ឃួង ស្រេង ក៏បានជំរុញឲ្យអាជ្ញាធរមូលដ្ឋានជាពិសេស កងកម្លាំង សមត្ថកិច្ច អាជ្ញាធរខណ្ឌ សង្កាត់ ត្រូវរៀបចំសណ្តាប់ធ្នាប់តាមដងផ្លូវ និងចិញ្ចើមផ្លូវសាធារណៈទាំងអស់ ក្នុងនោះរដ្ឋបាលខណ្ឌទាំង 12 សមត្ថកិច្ចស្នងការដ្ឋាននគរបាល កងរាជអាវុធហត្ថរាជធានី រួមជាមួយមន្ទីរសាធារណការ និងដឹកជញ្ជូនរាជធានីភ្នំពេញមន្ទីរដែនដីរៀបចំនគររូបនីយកម្មសំណង់ និងសូរិយោដីរាជធានីភ្នំពេញ និងអង្គភាពពាក់ព័ន្ធទាំងអស់ ជាសេនាធិការរបស់សាលារាជធានីភ្នំពេញដើម្បីអនុវត្តវិធានការនេះ ឲ្យមានប្រសិទ្ធភាពខ្ពស់ហើយស្រមតាម សេចក្តីណែនាំនេះ ។

លោក ឃួងស្រេង ក៏បានដាក់ផែនការណ៏ថា ចាប់ពីថ្ងៃទី ៣០ ខែមិថុនាឆ្នាំ ២០១៩ ការប្រើប្រាស់ចិញ្ចើមផ្លូវ និងទ្រូងផ្លូវ ការធ្វើរោងបុណ្យ និងកម្មវិធីផ្សេងៗ ម្ចាស់កម្មវិធីត្រូវលើកសំណើសុំអាជ្ញាធរមូលដ្ឋានដោយភ្ជាប់នូវកិច្ចសន្យា និងគំរូ ដើម្បីពិនិត្យ និងសម្រេចលើសំណើរទៅនឹងកម្រិតប្រើប្រាស់ចាំបាច់មិនឲ្យលើស០១ /០២ នៃទ្រូងផ្លូវ និងត្រូវរៀបចំកំលាំងសមស្របដើម្បីសម្រួលចរាចរណ៍ ។

ក្នុងកិច្ចប្រជុំនោះរដ្ឋបាលរាជធានី់ភ្នំពេញបានចេញសេចក្តីណែនាំឲ្យប្រជាពលរដ្ឋម្ចាស់លំនៅស្ថាន ម្ចាស់អាជីវកម្ម ម្ចាស់ការដ្ឋាន អ្នកគ្រប់គ្រង មន្ទីរពេទ្យ គ្រឹះស្ថានអប់រំសាធារ ណៈ វិស័យឯកជន និងអ្នកប្រើប្រាស់ផ្លូវថ្នល់ទាំងអស់ ដើម្បីសម្រួល និងរៀបចំទីតាំងរបស់ខ្លួនឲ្យបានត្រឹមត្រូវស្របតាមខ្លឹមសារណេនាំខាងលើនេះ ។

ក្នុងករណីប្រជាពលរដ្ឋ ម្ចាស់អាជីវកម្មម្ចាស់ការដ្ឋាន អ្នកគ្រប់គ្រងមន្ទីរពេទ្យ គ្រឹះស្ថានអប់រំ អគារសាធារណៈវិស័យឯកជន និងអ្នកប្រើប្រាស់ផ្លូវថ្នល់ទាំងឡាយណាមិនចូលរួមអនុវត្តតាមសេចក្តីខ្លឹមសារ នៃសេចក្តីណែនាំនេះ គណៈបញ្ជាការឯកភាពរដ្ឋបាលខណ្ឌទាំង 12 និងមន្ទីរអង្គភាពជំនាញពាក់ព័ន្ធត្រូវចាត់វិធានការរដ្ឋបាល រួមមានបិទអាជីវកម្ម ផ្អាកការដ្ឋាន ដកហូតសម្ភារះ រុះរើសំណង់ ។ ល ។ ក្នុងករណីចាំបាច់ត្រូវចាត់វិធានការច្បាប់ជាធរមាន ។

លោក បាន ដាក់ផែនការបែបនេះ ខណៈ២ ,៣ថ្ងៃកន្លងមក មានការរិះគុណ យ៉ាងចាស់ដៃពីបងប្អូនប្រជាពលរដ្ឋ នៅរាជធានីភ្នំពេញថា ចៅហ្វាយក្រុង អត់មាន សមត្ថភាពគ្រប់គ្រង រឿងរថយន្ដ ធុនធំចូលក្រុង រឿងការ ទប់ស្កាត់ ចោលួច ចោឆក់ ប្លន់ បរិស្ថាន គ្រឿងញៀន ល្បែង ស៊ីសងគ្រប់ប្រភេទ និងចរាចរណ៏នៅតាមដងផ្លូវ សំខាន់ៗ ឃើញថាការកកស្ទះស្ទើរាល់ថ្ងៃ អាជ្ញាធរមិនខ្ចីយកភ្នេកមើលសោះ ។

ជាមួយគ្នានោះដែរ លោកឃួង ស្រេង ក៏បានបញ្ជាក់បន្ថែមថា ៖ ចំពោះរថយន្តដឹកទំនិញធុនធំ រថយន្តកុងតឺន័រ រថយន្តបាញ់បេតុង និងរថយន្តក្រឡុកស៊ីម៉ងត៍ត្រូវចេញចូលរាជធានីភ្នំពេញដោយគោរពតាមការណែនាំរបស់រដ្ឋបាលរាជធានីភ្នំពេញ និងចៀសវាងការប្រើប្រាស់ទ្រូងផ្លូវក្នុងការលើកដាក់ផ្ទេរទំនិញ បាញ់បេតុង ឬ ឈប់សំចតដោយអនាធិបតេយ្យ ។

ក្នុងករណីបម្រើឲ្យការងារសំណង់ម្ចាស់ការដ្ឋានត្រូវណែនាំដល់អ្នកបើកបររថយន្តបាញ់បេតុង និងរថយន្តក្រឡុកស៊ីម៉ង់ត៍ ត្រូវចត រថយន្តរបស់ខ្លួនឲ្យមានសណ្ដាប់ធ្នាប់ដាក់ស្លាកសញ្ញាសំគាល់ការដ្ឋាន និងត្រូវរៀបចំកម្លាំងដើម្បីជួយសម្រួលចរាចរណ៍៕ សំរិត