សារព័ត៌មាន នគរវត្ត តែងតែនាំមុខគេជានិច្ច
អ៊ីរ៉ង់បានបង្កើនសមត្ថភាព កម្លាំងទាហាននៅគ្រប់វិស័យ ទាំងទាហានជើងទឹក ជើងគោកនិងអាកាស ដោយកន្លងមក អ៊ីរ៉ង បានធ្វើសមយុទ្ធបាញ់គ្រាប់ពិត ទាំងជើងគោកនិង អាកាស ។ នៅពេលនេះអ៊ីរ៉ង បានពង្រឹង សមត្ថភាព ការពារ ដែនសមុទ្រវិញម្តង ដោយបានចាប់ផ្តើមធ្វើសមយុទ្ធកម្លាំងទាហានជើង ទឹក រយៈពេល ៣ថ្ងៃចាប់ពីថ្ងៃទី២២ ខែកុម្ភៈ ក្នុងតំបន់ដ៏ធំមួយនៃឈូងសមុទ្រពែក្ស និងមហាសមុទ្រឥណ្ឌា ក្នុងនោះមានទាំង ច្រកដឹកជញ្ជូនសកលលោកដ៏រសើប។
មេបញ្ជាការកងទ័ពជើងទឹក អ៊ីរ៉ង់លោកឧត្តមនាវីឯក ហូស សេន ខាន់ហ្សាឌី បាននិយាយថា “សមយុទ្ធនេះ នឹងត្រូវធ្វើឡើងនៅច្រកសមុទ្រ ហ័រមូស ឆ្នេរម៉ាក្រាន់ សមុទ្រ អូម៉ង់ និងភាគខាងជើង នៃមហាសមុទ្រឥណ្ឌា ដោយគ្របដណ្ដប់លើផ្ទៃទឹកប្រមាណពីរលានគីឡូម៉ែត្រការ៉េនិងបន្តធ្វើរយៈពេលបីថ្ងៃ” ។ លោកបន្តទៀតថា សមយុទ្ធនេះមានគោលដៅវាយតម្លៃឧបករណ៍របស់កងទ័ពជើងទឹក អនុវត្តការបាញ់ និង ជួយឱ្យកងទ័ពត្រៀមខ្លួនសម្រាប់សមរភូមិពិត ។
ច្រកសមុទ្រ ហ័រមូស នៅមាត់ឈូងសមុទ្រពែក្ស គឺមានសារៈសំខាន់ណាស់ចំពោះការផ្គត់ផ្គង់ថាមពលសកលលោក ជាមួយការដឹកជញ្ជូនប្រេង១ភាគ៣របស់ពិភពលោកគឺឆ្លងកាត់វារៀងរាល់ថ្ងៃ។
ការបង្ហាញសាច់ដុំយោធានេះកើតឡើងនៅពេលដែលមានភាពតានតឹងកាន់តែខ្លាំងឡើងជាមួយនឹងគូប្រជែងប្រចាំតំបន់ដ៏សំខាន់របស់អ៊ីរ៉ង់គឺអារ៉ាប៊ីសាអូឌីតនិងរដ្ឋាភិបាលក្រុងវ៉ាស៊ីនតោន ដែលកាលពីឆ្នាំមុនបានដកខ្លួនចេញពីកិច្ចព្រមព្រៀងនុយក្លេអ៊ែរឆ្នាំ ២០១៥ ជាមួយអ៊ីរ៉ង់និងបានដាក់ទណ្ឌកម្មឡើងវិញលើសាធារណរដ្ឋអ៊ីស្លាមមួយនេះ។
ច្រកសមុទ្រហ័រមូសគឺជាផ្លូវឆ្លងកាត់អន្ដរជាតិ ដែលកងកម្លាំងអាមេរិកឆ្លងកាត់ជាប្រចាំ ហើយជាកន្លែងដែលឃើញភាពតានតឹងរវាងពួកគេនិងកងកម្លាំងអ៊ីរ៉ង់កាលពីពេលកន្លងទៅ។
ដោយមានឈ្មោះថា Velayat 97 សមយុទ្ធនេះនឹងបង្ហាញនូវនាវាមុជទឹក នាវាចម្បាំង ឧទ្ធម្ភាគចក្រ និងដ្រូនរបស់អ៊ីរ៉ង់។ នេះបើយោងតាមលោកឧត្តមនាវីឯក ហូសសេន ខាន់ហ្សាឌី។
លោកខាន់ហ្សាឌីបានបន្ថែមថា ការធ្វើសមយុទ្ធនេះក៏នឹងរួមបញ្ចូលការបាញ់មីស៊ីលពីនាវាផងដែរ៕
