សារព័ត៌មាន នគរវត្ត តែងតែនាំមុខគេជានិច្ច
យន្តហោះដឹកអ្នកដំណើរមួយគ្រឿង បានធ្លាក់ស្លាប់មនុស្សនៅលើយន្តហោះទាំងអស់១៥៧នាក់ ដែលមិនទាន់ដឹងពីមូលហេតុច្បាស់លាស់ ។
គេហទំព័រ the Peninsula បានផ្សាយថា យន្តហោះ បូអ៊ីង 737-8 MAX របស់ក្រុមហ៊ុនអាកាសចរណ៍របស់រដ្ឋ Ethiopian Airline បានចាកចេញពីអាកាសយានដ្ឋាន Addis Abba ក្នុងរដ្ឋធានី Ethiopia កាលពីព្រឹកថ្ងៃអាទិត្យ ទី១០ ខែមីនា ឆ្នាំ២០១៩ ពេលហោះបានប្រហែល៦នាទី នៅលើផ្លូវឆ្ពោះទៅកាន់រដ្ឋធានី Nairobi ប្រទេសកេនយ៉ា ដល់តំបន់ Bishoflu ឬ Debre Zeit ចម្ងាយប្រហែល៥០គីឡូម៉ែទ្រ ភាគខាងត្បូងទីក្រុង Addis Ababa នោះ នៅវេលាម៉ោង៨និង៤៤នាទីព្រឹក ស្រាប់តែធ្លាក់ចុះតែម្តង ។
សេចក្តីប្រកាសរបស់អាកាសចរណ៍បញ្ជាក់ថា អ្នកដំណើរក្នុងយន្តហោះមាន១៤៩នាក់ និងអាកាសយានិក៨នាក់ថែមទៀត គឺស្លាប់ទាំងអស់គ្នា គ្មាននរណាម្នាក់រងរបួស ឬរស់រានមានជីវិតឡើយ ។ ប្រភពខ្លះផ្សាយថា អ្នកដំណើរមានសរុប៣៣សញ្ជាតិ ។ កេនយ៉ាមាន៣២នាក់ និង អេត្យូពី (Ethiopia) ១៧នាក់ ស្ថិតក្នុងចំណោមជនរងគ្រោះទាំងអស់នោះដែរ ។
យន្តហោះដែលធ្លាក់នេះ គឺជាប្រទេយន្តហោះថ្មី ទើបតែត្រូវបានដាក់ឲ្យដំណើរការហោះហើរកាលពីពាក់កណ្តាលខែវិច្ឆិកា ឆ្នាំ២០១៨កន្លងមកនេះតែប៉ុណ្ណោះ ។ ប្រធានាធិបតីកេនយ៉ា លោក Uhuru Kenyatta ថ្លែងរំលេកទុក្ខជាមួយក្រុមគ្រួសាររងគ្រោះក្នុងហេតុការណ៍នេះផងដែរ ៕
