កម្លាំងទាហានឥណ្ឌាត្រៀមលក្ខណៈវាយប្រហារប៉ាគីស្ថាន

កម្លាំងទាហានឥណ្ឌា បានប្រកាសថា បានត្រៀមលក្ខណៈរួចរាល់សម្រាប់ធ្វើសង្គ្រាមជាទ្រង់ទ្រាយធំ ដោយពេលនេះ កម្លាំងទាហានជើងគោក និងអាកាសបានត្រៀមលក្ខណៈរួចរាល់ នៅតំបន់ព្រំដែន ជាប់ប៉ាគីស្ថាន ។ ចំណែកកម្លាំងទាហានជើងទឹក ក៏បានបញ្ជូននាវាមុជទឹក និងនាវាចម្បាំង ចូលទៅកៀកព្រំដែនទឹក ។

ប្រភពព័ត៌មានបានផ្សាយថា ក្នុងពេលដែលកម្លាំងទាហានប្រទេសទាំងពីរ ប្រឈមមុខតានតឹង នៅតំបន់ព្រំដែន ដោយបន្តផ្ទុះអាវុធដាក់គ្នា ជាសញ្ញាថ្មីមួយទៀត ក្រោយការប៉ះទង្គិចគ្នាជាបន្តបន្ទាប់ តាំងពីពាក់កណ្តាលខែកុម្ភៈ កន្លងមក ។

បណ្តាញព័ត៌មាន India TV news បានផ្សាយថា នៅក្នុងកិច្ចប្រជុំគណៈកម្មការសន្តិសុខជាតិ ទីព្រឹក្សាសន្តិសុខ ជាតិឥណ្ឌា លោក Ajit Doval បានប្រកាសប្រាប់នាយករដ្ឋមន្ត្រីឥណ្ឌា Narendra Modiថា កម្លាំងទាហាន ជើងទឹក ជើងគោក និងអាកាស បានត្រៀមលក្ខណៈរួចរាល់នៅក្នុងការវាយប្រហារជាទ្រង់ទ្រាយធំទៅលើប៉ាគីស្ថាន ។

នាយករដ្ឋមន្ត្រី Narendra Modi ក៏បានស្នើដល់កម្លាំងទាហានធានាសុវត្ថិភាពដល់ពលរដ្ឋ ដែលរស់នៅតាមបណ្តោយព្រំដែន ។

ការប្រកាសខាងលើរបស់ឥណ្ឌា កើតឡើងក្រោយពេលប្រព័ន្ធផ្សព្វផ្សាយ ក្នុងស្រុកបានដកស្រង់សម្តី អ្នកនាំពាក្យកម្លាំងទាហានប៉ាគីស្ថាន លោក Asif Ghafoorបានព្រមានថា ទីក្រុងអិស្លាមម៉ាបាដមានសិទ្ធិ ប្រើប្រាស់រាល់ វិធីសាស្ត្រចាំបាច់ដើម្បីការពារខ្លួន ។

ការប្រឈមមុខតានតឹងរវាងប៉ាគីស្ថាន និងឥណ្ឌាមិនមែនទើបកើតឡើង រយៈពេលជាង ១ខែកន្លងមកនោះឡើយ គឺបានកើតឡើងតាំងពីរឆ្នាំ ១៩៤៧ ប៉ុន្តែមិនមានសកម្មភាពផ្ទុះអាវុធជាទ្រង់ទ្រាយធំដូចជាពេលនេះ ។ ភាពតានតឹងកើតឡើង ក្រោយក្រុមភេរវកម្ម Jaish E Mohammad មានទីតាំងនៅក្នុងប្រទេសប៉ាគីស្ថាន បើកការវាយប្រហារ ទៅលើកម្លាំងទាហានឥណ្ឌាក្នុងតំបន់ Pulwama កាលពីថ្ងៃទី១៤ ខែកុម្ភៈ សម្លាប់ទាហាន៤០នាក់ ។ ឥណ្ឌាក៏បានបើកការវាយប្រហារទៅលើទីតាំងភេរវកម្មនៅទឹកដីប៉ាគីស្ថាននាថ្ងៃទី ២៦ខែកុម្ភៈ វីញជាដើមហេតុធ្វើស្ថានភាពកាន់តែតានតឹង ៕