សារព័ត៌មាន នគរវត្ត តែងតែនាំមុខគេជានិច្ច
ក្រោយជំនួបទីពីរ រវាងប្រធានាធិបតី ដូណាល់ ត្រាំ និង គីម ជុងអ៊ុន លើកទីពីរ នៅក្នុងទីក្រុងហាណូយ ប្រទេសវៀតណាម មិនទទួលបានជោគជ័យឡើយ ហើយប្រធានាធិបតី ត្រាំ បានចាកចេញពីកិច្ចប្រជុំមុនកំណត់ ដោយមិនមានកិច្ចព្រមព្រៀងណាមួយនោះ ។ ប៉ុន្តែ មេដឹកនាំទាំងពីរ បានបង្ហាញពីទំនាក់ទំនងបុគ្គលយ៉ាងជិតស្និទ្ធបំផុត បើទោះបីចាកចេញពីកិច្ចប្រជុំ តែលោកត្រាំ បានចាប់ដៃលាលោក គីម ជុងអ៊ុន យ៉ាងជិតស្និទ្ធបំផុត ។
ក្រោយជំនួបនោះ ភាគីអាមេរិក មិនបានលើកឡើង ពីជំនួបជាថ្មីនោះឡើយ ប៉ុន្តែនៅពេលនេះ រដ្ឋមន្ត្រីក្រសួងការបរទេសអាមេរិក បានប្រកាសពីគោលជំហរ បន្តពិភាក្សា ជាមួយមេដឹកនាំកូរ៉េខាងជើង នៅក្នុងពេលខាងមុខ ។
នៅថ្ងៃទី៦ ខែមេសា រដ្ឋមន្ត្រីការបរទេសអាមេរិក លោក Mike Pompeo បានបញ្ជាក់ថា លោកជឿជាក់ថា នឹងមានជំនួបពិភាក្សា លើកទី៣ រវាងប្រធានាធិបតីដូណាល់ ត្រាំ នឹង គីម ជុងអ៊ុន នៅពេលវេលាសមស្រប ។
នៅក្នុងបទសម្ភាសន៍ ជាមួយសារព័ត៌មាន CBS News លោក Pompeo បានព្យាករណ៍ថា នឹងមានជំនួបពិភាក្សារវាងមេដឹកនាំ ទាំងពីរ ក្រោយពេល ជំនួបលើកទីមួយ កាលពីចុងខែកុម្ភៈ មិនទទួលបានកិច្ចព្រមព្រៀងណាមួយ ។ លោក Pompeo បានបញ្ជាក់ថា «ខ្ញុំជឿជាក់ថា នឹងមានជំនួបពិភាក្សា លើកទី៣ ក្នុងពេលឆាប់ៗនេះ» ។
ប្រធានាធិបតី កូរ៉េខាងត្បូង លោក ម៉ូន ជេអ៊ីន ក៏បានពិភាក្សាជាមួយប្រធានាធិបីអាមេរិក ដូណាល់ ត្រាំ ស្តីពីការរៀបចំជំនួបជាលើកទី៣ ជាមួយមេដឹកនាំកូរ៉េខាងជើង ។
ចំណែករដ្ឋមន្ត្រីការបរទេសអាមេរិក បានបញ្ជាក់ថា អាមេរិកមិនមានគម្រោង លុបទណ្ឌកម្មកូរ៉េខាងជើងនោះឡើយ រហូតដល់ប្រទេសនេះ រំសាយអាវុធបរមាណូ ។ ប៉ុន្តែប្រធានាធិបតី ត្រាំ មិនបានដាក់ទណ្ឌកម្មបន្ថែម ទៅលើ កូរ៉េខាងជើងនោះដែរ ។ កន្លងមក ក្រសួងហិរញ្ញវត្ថុ អាមេរិកបានសម្រេចដាក់ទណ្ឌកម្ម កូរ៉េខាងជើង ប៉ុន្តែមួយថ្ងៃក្រោយមក លោកត្រាំបានដកចេញវិញ ។ ទំាងនោះបានបង្ហាញយ៉ាងច្បាស់ថា លោកត្រាំបានផ្តល់ឱកាសដល់មេដឹកនាំ គីម ជុងអ៊ុន ៕
