លោក ប្រាយុទ្ធ ចាន់អូចា មានកៅអីគ្រប់គ្រាន់សម្រាប់បន្តដឹកនាំ៥ឆ្នាំខាងមុខទៀត

នាយករដ្ឋមន្ត្រីថៃ លោកប្រាយុទ្ធ ចាន់អូចា នឹងបន្តកាន់អំណាចដឹកនាំប្រទេសជាតិ​៥ឆ្នាំខាងមុខទៀត ក្រោយពេល គណបក្សរបស់លោក រកបានដៃគូបង្កើតរដ្ឋាភិបាល ​។

តំណាងរាស្ត្រគណបក្ស​ Palang Pracharath ​ស្និទ្ធយោធា​បានប្រកាសថា គណបក្សនេះបានអញ្ជើញគណបក្ស​ ចំនួន​២ ចូលរួមបង្កើតរដ្ឋាភិបាល នឹងជួយឲ្យនាយករដ្ឋមន្ត្រី ប្រាយុទ្ធ ចាន់អូចា បន្ត​រក្សាតំណែងនាយករដ្ឋមន្ត្រី បន្តទៀត។

សារព័ត៌មាន​រ៉យទ័របានដកស្រង់សម្តី លោក​ Puttipong Punnakanta ​តំណាងរាស្ត្រ របស់គណបក្ស​ Pracharath ​បានបញ្ជាក់ថា កិច្ចព្រមព្រៀងបង្កើតរដ្ឋាភិបាលរួមជាមួយគណបក្សតូចៗ នឹងបញ្ចប់នៅថ្ងៃទី​២៧ ខែឧសភា ។ នៅពេលនោះ លោក ប្រាយុទ្ធ ចានអូចា មាន សំឡេងគ្រប់គ្រាន់ដើម្បី​បន្ត​កាន់តំណែងដឹកនាំប្រទេសថៃថែម​៥ឆ្នាំខាងមុខទៀត។

កិច្ចព្រមព្រៀងជាមួយគណបក្សតូច ៗ គឺជាសញ្ញាបញ្ចប់​ក្តីសង្ឃឹមរបស់គណបក្សប្រឆាំង ដឹកនាំដោយគណបក្សភឿថៃ ក្នុងការដណ្តើម អំណាច ពីគណបក្សយោធាមកគ្រប់គ្រងវិញ​។

នៅក្នុងការបោះឆ្នោតកាលពីខែមីនា កន្លងមក គណបក្ស យោធា​ទទួលបានសំឡេងគាំទ្រ សកលច្រើនជាងគេ ។ ចំណែកគណបក្សភឿថៃ ទទួលបានកៅអីសភាច្រើនជាងគណបក្សនានាទាំងអស់​ ប៉ុន្តែមិនទទួលបានសំឡេងគាំទ្រគ្រប់គ្រាន់ដើម្បីបង្កើតរដ្ឋាភិបាលនោះឡើយ​។ ដោយឡែកគណបក្សយោធាវិញ មានកៅអីនៅក្នុងព្រឹទ្ធសភា ដល់ទៅ​២៥០ រួចជាស្រេច ។ ការបោះឆ្នោតជ្រើសរើស នាយករដ្ឋមន្ត្រី ​គឺចូលរួមទាំង សមាជិក រដ្ឋសភា​និងព្រឹទ្ធសភា ៕