សារព័ត៌មាន នគរវត្ត តែងតែនាំមុខគេជានិច្ច
នៅពេលនេះ អាមេរិកបានរិតបន្តឹងទិដ្ឋការ និង ក្រុមនិស្សិតស្រាវជ្រាវ របស់ចិន នៅអាមេរិក ដែលជាសញ្ញា អវិជ្ជមានមួយឆ្ពោះទៅរកភាពតានតឹង កាន់តែខ្លាំងរវាងអាមេរិក នឹងចិន ។
កន្លងមក ក្រសួងអប់រំចិនបានចង្អុលបង្ហាញអំពីការបដិសេធនឹងការពន្យារទិដ្ឋាការ ។ ក្រសួងបានប្រាប់សិស្សដែលដាក់ពាក្យសុំចូលរៀននៅសាកលវិទ្យាល័យនានា ក្នុងសហរដ្ឋអាមេរិកដោយខ្លួនឯង ត្រូវហ៊ានប្រឈមមុខ និងពង្រឹងការប៉ាន់ស្មានពីហានិភ័យ។
ការថយចុះនៃចំនួននិស្សិតជាជនជាតិចិន អាចនឹងធ្វើឲ្យខាតបង់ចំពោះសហរដ្ឋអាមេរិក ។ គិតមកត្រឹមពេលនេះ ប្រទេសចិនគឺជាប្រភពដ៏ធំបំផុត នៃនិស្សិតអន្ដរជាតិនៅតាមសកលវិទ្យាល័យអាមេរិក ដោយក្នុងនោះមានចំនួន៣៦០,០០០នាក់ បានចូលរួមកាលពីឆ្នាំកន្លងទៅ ហើយមាននិស្សិតជាច្រើនបានបង់ថ្លៃសិក្សាផ្តាច់តែម្តង។
អ្នកនាំពាក្យក្រសួងការបរទេសបាននិយាយថា “ក្នុងពេលជាមួយគ្នានេះ យើងប្តេជ្ញាផ្តល់សេវាកម្ម ដែលមានគុណភាពខ្ពស់បំផុត ដល់អ្នកដំណើរស្របច្បាប់ដើម្បីឲ្យពួកគេអាចទទួលបានការសម្រេចចិត្តយ៉ាងឆាប់រហ័ស និងច្បាស់លាស់ទាក់ទងទៅនឹងការដាក់ពាក្យសុំទិដ្ឋាការរបស់ពួកគេ” ។
សារព័ត៌មាន Bloomberg News បានផ្សាយថា ក្រោយពេលផ្ទុះសង្គ្រាមពាណិជ្ជកម្ម និងបច្ចេកវិទ្យា អាមេរិក ចិន ផ្ទុះឡើង រដ្ឋាភិបាលរបស់លោកដូណាល់ ត្រាំ កំពុងតែងអនុម័តគោលនយោបាយថ្មីបន្ថែមទៀត ទៅលើក្រុមនិស្សិតស្រាវជ្រាវចិន ។
ក្រុមនិស្សិតចិន បាននិយាយទៅកាន់សារព័ត៌មាន Bloomberg ថា ប៉ុន្មានសប្តាហ៍ចុងក្រោយនេះ បរិយាកាសសិក្សា និងស្រាវជ្រាវនៅអាមេរិក កាន់តែ ខ្វះភាពជិតស្និទ្ធចំពោះក្រុមស្រាវជ្រាវចិន ។
មហាវិទ្យាល័យ Emory Altanta ក្នុងរដ្ឋ Georgia បានបញ្ឈប់ សាស្ត្រចារ្យជនជាតិអាមេរិក ដើមកំណើតចិនពីររូប កាលពីចុងខែឧសភា ។ នៅថ្ងៃទី៣ ខែមិថុនា កន្លងមក ក្រសួងអប់រំចិនបានលើកឡើងពីហានិភ័យដែលក្រុមនិស្សិតចិន នឹងត្រូវប្រឈមមុខ នៅអាមេរិក។
លោក Yuanli នាយកសាលាវេជ្ជសាស្ត្រ នៅទីក្រុងប៉េកាំង បានលើកឡើងថា ខ្ញុំពិតជាបារម្ភពីសង្គ្រាមពាណិជ្ជកម្ម អាមេរិក ចិន ហើយសកម្មភាពរបស់ អាមេរិកធ្វើទៅលើក្រុមនិស្សិតចិនគឺជារឿងមិនសមហេតុផល ។
តាមតួលេខរបស់ រដ្ឋាភិបាល នៅក្នុងឆ្នាំ២០១៨ មាននិស្សិតចិនដល់ទៅ៣៦០ពាន់នាក់កំពុងតែសិក្សានៅអាមេរិក ៕
