សារព័ត៌មាន នគរវត្ត តែងតែនាំមុខគេជានិច្ច
រដ្ឋាភិបាលទីក្រុងវ៉ាស៊ីនតោន បានបន្ទន់ឥរិយាបទចំពោះក្រុមហ៊ុនបច្ចេកវិទ្យាចិន Huawei ក្រោយពេលមានការតវ៉ាយ៉ាងខ្លាំងពីបណ្តាក្រុមហ៊ុនអាមេរិក ។ ការផ្អាករកស៊ីជាមួយហួវាយ ធ្វើឲ្យក្រុមហ៊ុនអាមេរិកជាច្រើនរងការខាតបង់ ។
នៅពេលនេះដែរ រដ្ឋាភិបាលទីក្រុងវ៉ាស៊ីនតោនបានបើកភ្លើងខៀវ ឲ្យលក់ទំនិញដល់ក្រុមហ៊ុន Huawei ។ អាមេរិក បានផ្តល់លិខិតអនុញ្ញាតឲ្យលក់ទំនិញមួយចំនួន ដែលអាមេរិកយល់ថា មិនមានការគំរាមកំហែងដល់សន្តិសុខជាតិ ឲ្យទៅក្រុមហ៊ុន បច្ចេកវិទ្យា Huawei ។
លោក Wilbur Ross រដ្ឋមន្ត្រីក្រសួងពាណិជ្ជកម្ម អាមេរិកកាលពីថ្ងៃទី ៩ ខែកក្កដា បានប្រកាសផ្តល់លិខិតអនុញ្ញាតឲ្យបណ្តាក្រុមហ៊ុនអាមេរិកលក់ សម្ភារមួយចំនួនឲ្យទៅក្រុមហ៊ុនបច្ចេកវិទ្យា Huawei របស់ចិន ។ មុខទំនិញដែលអាមេរិកលក់ឲ្យ ក្រុមហ៊ុនចិន គឺឆ្លងកាត់ការត្រួតពិនិត្យ យ៉ាងល្អិតល្អន់ ។
ដើម្បីធ្វើឲ្យទំនាក់ទំនងពាណិជ្ជកម្ម ជាមួយចិន ល្អប្រសើរឡើងវិញ កាលពីចុងខែមិថុនាកន្លងមក ប្រធានាធិបតី អាមេរិក ដូណាល់ ត្រាំ បានប្រកាសថា ក្រុមហ៊ុន អាមេរិកនឹងលក់សម្ភារមួយចំនួន ឲ្យទៅក្រុមហ៊ុន Huawei ដែលជាក្រុមហ៊ុនទូរសគមនាគមន៍ធំបំផុត ។
កន្លងមក ក្រសួងពាណិជ្ជកម្មអាមេរិកបានដាក់បញ្ចូលក្រុមហ៊ុន Huawei ចូលក្នុងបញ្ជី «Entity List »កាលពីខែឧសភា ដោយបារម្ភពីសន្តិសុខជាតិ ។ រាល់សម្ភារ របស់អាមេរិក ត្រូវបាន ហាមប្រាមលក់ឲ្យទៅក្រុមហ៊ុនចិន បើមិនមានលិខិតអនុញ្ញាតនោះទេ៕
