ព័ត៌មានទាន់ហេតុការណ៍៖

ប្រសិនបើជាប់ឆ្នោតនៅឆ្នាំ​២០២០ លោក Joe Biden នឹងដំណើរការកម្មវិធីសុខាភិបាលមានតម្លៃ​៧៥០ពាន់លានដុល្លារ

ចែករំលែក៖

កម្មវិធីសុខាភិបាល ដែលបានបង្កើតឡើងដោយអតីតប្រធានាធិបតីអូបាម៉ា ពេលនោះ លោក Joe Biden ​ជាអនុប្រធានាធិបតីអាមេរិក ។ នៅពេលនេះ លោក ជូបៃ ឌីន ជាបេក្ខភាពប្រធានាធិបតីនៅឆ្នាំ​២០២០ ដោយលោកបានលើកគោលនយោបាយរក្សាសុខាភិបាល មានទឹកប្រាក់​ ៧៥០ ពាន់លានដុល្លារ​ ។

ការសន្ទនាស្តីអំពីអនាគត ​នៃប្រព័ន្ធសុខាភិបាល នៅក្នុងប្រទេសអាមេរិក បានក្លាយជាប្រធានបទ ដ៏ក្តៅបំផុត ​សម្រាប់បេក្ខភាពប្រធានាធិបតីអាមេរិក មកពីគណបក្សប្រជាធិបតេយ្យ​ ។ អតីតអនុប្រធានាធិបតីអាមេរិក និងជាបេក្ខភាពនាំមុខ នៅក្នុងការប្រកួតប្រជែងតំណែងប្រធានាធិបតីអាមេរិក នាឆ្នាំ​២០២០ ខាងមុខនេះ បានលើកឡើង អំពីគម្រោងថែរក្សាសុខាភិបាល មានទឹកប្រាក់ រហូតដល់ទៅ៧៥០ពាន់លានដុល្លារ​អាមេរិក ។

គម្រោងខាងលើរបស់លោក​ Joe Biden គឺដើម្បីពង្រឹងនូវកម្មវិធីថែរក្សាវិស័យសុខាភិបាល​ ដែលបានបង្កើនឡើង កាលពីជំនាន់របស់អតីតប្រធានាធិបតី អូបាម៉ា គឺ Obamacare ហើយត្រូវបានលោក ដូណាល់ ត្រាំ ប្រធានាធិបតីអាមេរិក បច្ចុប្បន្ន លុបចោល​ ។ ​ លោក Joe Biden ​គឺអនុប្រធានាធិបតី ក្រោមការដឹកនាំរបស់លោក បារ៉ាក់ អូបាម៉ា មានរយៈពេលដល់២អាណត្ដិ (​៨ឆ្នាំ)​ ។

ថ្លែង នៅក្នុងបទសម្ភាសន៍មួយជាមួយនឹងអ្នកសារព័ត៌មាននោះ មន្ត្រីទទួលបន្ទុករៀបចំការឃោសនាបោះឆ្នោតរបស់លោក​ Joe Biden ​បានបញ្ជាក់ថា ប្រាក់ចំណាយសម្រាប់រក្សាសុខាភិបាល គិតជាទឹកប្រាក់ មានរហូតដល់ទៅ​៧៥០ពាន់លានដុល្លារ ក្នុងរយៈពេល​១០ឆ្នាំ​ ។ លោក Joe Biden មានគម្រោងនឹងដំឡើងពន្ធ​ទៅលើក្រុមអ្នកមាន រហូតដល់ទៅ​៣៩,៦ភាគរយ ។

ក្រៅពីនេះ បេក្ខភាពប្រធានាធិបតី Joe Biden ​ក៏បានអំពាវនាវដល់ប្រជាពលរដ្ឋអាមេរិកាំងទាំងអស់ ដែលរកប្រាក់ចំណូល​បានលើសពី​១លានដុល្លារ ក្នុងមួយឆ្នាំ ត្រូវបង់ពន្ធទ្វេដង នៃពន្ធបច្ចុប្បន្ន ​ដើម្បីបង្កើននូវប្រាក់ចំណូល​រដ្ឋ និងជួយដល់វិស័យសុខាភិបាលរបស់អាមេរិកឲ្យកាន់តែប្រសើរឡើង​៕


ចែករំលែក៖