ព័ត៌មានទាន់ហេតុការណ៍៖

លោក សែ​ វុទ្ធី​ អញ្ជើញប្រគេនទានវស្សាដល់ព្រះសង្ឃនៅវត្តគគីរស្រុករមាសហែក

ចែករំលែក៖

ខេត្តស្វាយរៀង​៖​ នៅព្រឹកថ្ងៃអង្គារ​ ១៥កើត​ ខែអាសាឍ​ ឆ្នាំកុរ​ ឯកស័ក​ ត្រូវនឹងថ្ងៃទី​១៦​ ខែកក្កដា​ ឆ្នាំ​២០១៨​ លោកឧត្ដមសេនីយ៍ត្រី​ សែ​ វុទ្ធី​ មេបញ្ជាការកងរាជអាវុធហត្ថខេត្តស្វាយរៀង​ និងជាប្រធានក្រុមការងារចុះជួយបក្សប្រជាជនឃុំគគីរ​ នឹងក្រុមការងារបានអញ្ជើញប្រគេនទានវស្សាដល់ព្រះសង្ឃគង់ចាំព្រះវស្សា​នៅវត្តគគីរ​ ស្ថិតនៅឃុំគគីរស្រុករមាសហែក ។

លោកសែវុទ្ធី បានលើកឡើងថា ក្រោមការដឹកនាំរបស់រាជរដ្ឋាភិបាលដែលមានសម្តេចអគ្គមហាសេនាបតីតេជោ ហ៊ុន សែន ជានាយករដ្ឋមន្រ្តីនៃកម្ពុជា បានធ្វើឲ្យវិស័យពុទ្ធចក្រ និងអាណាចក្រមានការរីកចំរើនទន្ទឹមគ្នា ពិសេសពុទ្ធបរិស័ទមានជីវភាពធូរធាបានចូលរួមកសាងទីវត្តអារ៉ាមឲ្យមានការអភិវឌ្ឍ យ៉ាងល្អប្រសើរ ។

លោកបានបញ្ជាក់ទៀតថា សមិទ្ធផលដ៏មានតម្លៃទាំងអស់នេះ គឺបានមកពីការខិតខំប្រឹងប្រែង និងលះបង់គ្រប់បែបយ៉ាងក្នុងស្មារតីទទួល ខុសត្រូវខ្ពស់ដោយតម្កល់អត្ថប្រយោជន៍ជាតិ និងប្រជាជនជាធំរបស់រាជរដ្ឋាភិបាលនៃព្រះរាជាណាចក្រកម្ពុជា ដែលមានសម្តេចអគ្គមហា សេនាបតីតេជោ ហ៊ុន សែន ជានាយករដ្ឋមន្ត្រី ។

លោកក៏បានស្នើសុំឲ្យប្រជាពលរដ្ឋ និងពុទ្ធបរិស័ទទំាងអស់ បន្តគាំទ្រគណបក្សប្រជាជនកម្ពុជា និងចូលរួមថែរក្សាឲ្យបាននូវសុខសន្តិភាព ស្ថិរភាព និងសមិទ្ធផលរបស់ជាតិយើងឲ្យបានគង់វង្សប្រជាពលរដ្ឋរស់នៅប្រកបដោយភាពសុខក្សេមក្សាន្ត ។

សូមបញ្ជាក់ថា៖ ពិធីចូលកាន់ព្រះវស្សា គឺជាបុណ្យមួយដែលមានសារ:សំខាន់ក្នុងព្រះពុទ្ធសាសនា ជាពេលវាលាដ៏សំខាន់សម្រាប់ភិក្ខុសង្ឃ និងសាមណេបានរៀនធម៌ និងវិន័យឲ្យបានខ្ជាប់ខ្ជួនតាមពុទ្ធឱវាទក្នុងរយ:ពេល០៣ខែ ចាប់ផ្តើមពីថ្ងៃ ០១រោច ខែអាសាឍ ដល់ថ្ងៃ១៥កើត ខែអស្សុជ ។

ចំពោះទេយ្យទានគ្រឿងឧបភោគ​ បរិភោគមួយចំនួនដែលប្រគេនដល់វត្តមានដូចជា​ ទៀនព្រះវស្សា​ ០១គូរ,​ អង្ក​ ៥០គីឡូក្រាម​,​ ទឹកក្រូច​ ០៥កេស,​ ទឹកត្រី​ ០៥យួរ,​ ទឹកស៉ីអុីវ​ ០៥យួរ,​ មី​ ០៥កេស,​ ទឹកដោះគោ​ ០១កេស,​ ប៊ីចេង​ ០៥គីឡូក្រាម​,​ ស្កសរ​ ០៥គីឡូក្រាម​,​ ទឹកសុទ្ធ​ ០៥កេស,​ ប្រេងម៉ាស៊ូត​ ០២កាន​ គិតជាថវិកាចំនួន​ ១លាន៣សែន២ម៉ឺនរៀល ប្រគេនព្រះសង្ឃ​ ០៣អង្គ​ ១៥ម៉ឺនរៀល បច្ច័យកសាងវត្តថវិកាចំនួន​ ១លាន៤សែន៣ម៉ឺនរៀល ជូនគណកម្មការអាចារ្យវត្តថវិកាចំនួន​ ១០ម៉ឺនរៀល ជូនក្រុមប្រឹក្សាបក្សប្រជាជន​ ២៥នាក់​ ថវិកាចំនួន​ ១លាន២សែន៥ម៉ឺនរៀល, ជូននគរបាល​ ប្រជាការពារ​ ចំនួន ៧៣ម៉ឺនរៀលជួសជុល​បក្សប្រជាជនឃុំថវិកាចំនួន​ ២លាន៥សែនរៀលឧបត្ថមផ្ទាំងសូឡាដល់មណ្ឌលសុខភាពឃុំ ០១ផ្ទាំងគិតជាថវិកាចំនួន​ ១,១៧០,០០០៛​ ផងដែរ ។

ក្នុងឱកាសនោះលោកសែវុទ្ធីព្រមទាំងក្រុមការងារក៏បានបន្តជួបសំណេះសំណាលសួរសុខទុក្ខដល់ក្រុមគ្រូពេទ្យប្រចាំមណ្ឌលសុខភាពឃុំគគីរយ៉ាងភាពស្និទ្ធស្នាលនឹងផ្ដល់ជូនថវិកាចំនួន ៦០ម៉ឺនរៀលផងដែរ ៕ យឹម សុថាន


ចែករំលែក៖