សារព័ត៌មាន នគរវត្ត តែងតែនាំមុខគេជានិច្ច
សកម្មភាពជួញដូរគ្រឿងញៀន បានកើនឡើងនៅជុំវិញពិភពលោក ដោយមានការជួញដូរជាទ្រង់ទ្រាយធំមិនធ្លាប់មានពីមុនមក ។ ការជួញដូរនៅក្នុងតំបន់លោកខាងលិច ត្រូវបានរិតបន្តឹង ដោយបណ្តាប្រទេស តំបន់អាមេរិក អឺរ៉ុប ចាត់វិធានការយ៉ាងតឹងតែងបំផុតទប់ស្កាត់គ្រឿងញៀន ។
ចំណុចទាំងនោះហើយបានជាក្រុមជួញដូរគ្រឿងញៀនបានបង្វែទិសដៅមកកាន់តំបន់អាស៊ីប៉ាស៊ីហ្វិកវិញម្តង ដោយនៅទីនេះងាយស្រួលក្នុងការចរាចរណ៍គ្រឿងញៀន ។ តាមតួលេខរបស់អង្គការសហប្រជាជាតិ ក្រុមជួញដូគ្រឿងញៀន ក្នុងតំបន់អាស៊ី-ប៉ាស៊ីហ្វិក មានទំហំទឹកប្រាក់ ៦១ពាន់លានដុល្លារ ។
សារព័ត៌មាន Reuters នៅថ្ងៃ ទី១៨ ខែកក្កដា ឆ្នាំ២០១៩បានដកស្រងសេចក្តីប្រកាសរបស់ អង្គការសហប្រជាជាតិ បានឱ្យដឹងថា ក្រុមឧក្រិដ្ឋជនឆ្លងដែន បានជួញដូរគ្រឿងញៀន ប្រភេទមេតំហ្វីតាមីន (methamphetamine) កូកាអ៊ីន ផលិតនៅក្នុងតំបន់អាស៊ីអាគ្នេយ៍ ក្នុងបរិមាណ ដ៏ធំមហិមាដែលមានតម្លៃនៅលើទីផ្សារអាស៊ី-ប៉ាស៊ីហ្វិក គិតជាប្រាក់ចន្លោះពី៣០.៣ពាន់លាន ដុល្លារដល់៦១.៤ពាន់លានដុល្លារ ។
នៅក្នុងរបាយការណ៍របស់ខ្លួនចេញផ្សាយ នៅថ្ងៃព្រហស្បតិ៍នេះ អង្គការសហប្រជាជាតិ បានបញ្ជាក់ទៀតថា ទំហំជួញដូរគ្រឿងញៀនគឺស្មើតែ១៥ពាន់លានដុល្លារប៉ុណ្ណោះ នៅក្នុងទីផ្សារ អាស៊ី-ប៉ាស៊ីហ្វិក កាលពីឆ្នាំ២០១៣ ។
គួរជម្រាបថា បើតាមរបាយការណ៍ការិយាល័យអង្គការសហប្រជាជាតិ ទទួលបន្ទុកគ្រឿងញៀន និងឧក្រិដ្ឋកម្ម (UNODC) ក្រុមឧក្រិដ្ឋជនគ្រឿងញៀនឆ្លងដែនភាគច្រើន មានមូលដ្ឋាននៅក្នុង ទីក្រុងហុងកុង ម៉ាកៅ តៃវ៉ាន់ និងថៃ ហើយពួកគេបានផលិតគ្រឿងញៀន methamphetamine នៅភាគឦសានប្រទេសមីយ៉ានម៉ា ជាលក្ខណៈមន្ទីរពិសោធន៍ និងចែកចាយបន្តទៅជប៉ុន និងនូវែលសេឡង់ ជាដើម៕
