នាយករដ្ឋមន្ត្រីថ្មីអង់គ្លេស ប្រឈមទាំងបញ្ហាថ្មី និងបញ្ហាចាស់ ដែលត្រូវដោះស្រាយ

ចែករំលែក៖

លោក Boris Johnson ក្លាយជានាយករដ្ឋមន្ត្រីថ្មីដឹកនាំអង់គ្លេស ជំនួសលោកស្រី Theresa May ដែលបានលាលែងចេញពីតំណែង ។ លោក ត្រូវដោះស្រាយបញ្ហាជាច្រើន ដែលបានសន្សល់ទុកពីរដ្ឋាភិបាលចាស់ ។ ជាមួយគ្នានេះ លោកត្រូវដោះស្រាយ ការប្រឈមមុខតានតឹងដាក់គ្នា រវាងអង់គ្លេស និងអ៊ីរ៉ង់ ។

លោក Boris Johnson ទទួលបានជ័យជំនៈនៅក្នុងការប្រជែងតំណែងនាយករដ្ឋមន្ត្រីអង់គ្លេស ជំនួសលោកស្រី Theresa May នៅថ្ងៃ ទី២៣ ខែកក្កដា ។ លោកJohnson នឹងត្រូវប្រឈមបញ្ហាជាច្រើននៅចំពោះមុខ គឺបញ្ហា ចាកចេញពីអឺរ៉ុប Brexit ឬ ការប្រឈមុខតានតឹងដាក់គ្នាជាមួយអ៊ីរ៉ង់នៅតំបន់សមុទ្រពែក្ស ។

អតីតរដ្ឋមន្ត្រីការបរទេសអង់គ្លេស ឡោក Boris Johnson បានយកឈ្នះ គូប្រជែងរបស់ខ្លួន គឺរដ្ឋមន្ត្រីការបរទេសបច្ចុប្បន្ន លោក Jeremy Hunt ក្នុងការបោះឆ្នោតជ្រើសរើស មេបក្សថ្មី ។ លោក Johnson ទទួលបាន ការគាំទ្រ ដល់ទៅ៩២.១៥៣សំឡេង គឺច្រើនជាងទ្វេដងទៅនឹងសំឡេងគាំទ្រ លោក Jeremy Hunt ។

តាមគម្រោង លោក Boris Johnson ឡើងកាន់តំណែងនាយករដ្ឋមន្ត្រីដឹកនាំអង់គ្លេសចាប់ពីថ្ងៃទី២៤ខែកក្កដា ក្រោយលោកស្រី Theresa May បានចាកចេញពីតំណែង ។ នៅថ្ងៃនេះដែរ លោកស្រីMay នឹងទៅកាន់រាជវាំង Buckingham ដើម្បីលាលែងពីតំណែងនៅចំពោះមុខ ព្រះមហាក្សត្រី Elizabeth II។

ប្រធានាធិបតីដូណាល់ ត្រាំ គឺជាមេដឹកនាំ ដំបូងគេបង្អស់ដែលបានទូរស័ព្ទជូនពរលោក Boris Johnson ដោយ លោកត្រាំ បញ្ចាក់ថា «លោកពិតជាអស្ចារ្យ»។ ចំណែករដ្ឋមន្ត្រីការបរទេសអ៊ីរ៉ង់ ក៏បានជូនពរ ដល់ នាយករដ្ឋមន្ត្រីថ្មីអង់គ្លេសផងដែរ បើទោះបី អ៊ីរ៉ង់និងអង់គ្លេសកំពុងប្រឈមមុខតានតឹងដាក់គ្នា ជុំវិញការចាប់នាវាដឹកទំនិញ ។ជាមួយគ្នានោះ លោកស្រីMay ក៏បានជូនពរដល់នាយករដ្ឋមន្ត្រីថ្មី ហើយសន្យាគាំទ្រ ទាំងស្រុងដល់ លោក Boris Johnson ។

លោក Johnson ឡើងកាន់តំណែងនាយករដ្ឋមន្ត្រីអង់គ្លេសក្នុងពេលដែល ប្រទេសនេះប្រឈមវិបត្តិនយោបាយយ៉ាងខ្លាំង ពិសេសគឺ ការចាកចេញពីអ៊ឺរ៉ុប។

ពាក់ព័ន្ធនឹងការចាកចេញពីអឺរ៉ុប Brexit នាយករដ្ឋមន្ត្រី Johnson សល់ពេលមិនច្រើនទេ។ តាមគ្រោង លោក Boris Johnson ប្រកាសខ្លួនឯងដែរថា អង់គ្លេសត្រូវចេញឱ្យដាច់ពីសហភាពអឺរ៉ុប នៅដាច់ខែតុលាខាងមុខនេះ។ បើចេញមិនបានទេ គឺជាបរាជ័យមួយហើយ។ ក៏ប៉ុន្តែ បើយើងពិនិត្យមើលពីពេលវេលាវិញ គឺវាតិចតួចណាស់ គឺតែមានពេលពីរបីខែប៉ុណ្ណោះ។ ក្នុងដំណាក់កាលនេះ ទាំងសមាជិកសភាអង់គ្លេសខ្លួនឯង និងទាំងសមាជិកសភារបស់សហភាពអឺរ៉ុប ក៏ត្រូវឈប់សម្រាកវិស្សមកាលរដូវក្តៅថែមទៀត។ ដូច្នេះ គេរំពឹងគិតថា លោកមានពេលតែប៉ុន្មានសប្តាហ៍តែប៉ុណ្ណោះសម្រាប់ជួបមុខចរចាជាមួយគ្នា។ ពេលវេលាតែប៉ុន្មានខែនេះ គឺខ្លីបែបនេះ គេប្រមើលទៅ គឺថាការចរចា ទំនងជាគ្មានបានផលអ្វីធំដុំទេ។ គេយល់ដូច្នេះ ពីព្រោះថា លោកស្រីនាយករដ្ឋមន្ត្រី Theresa May ខំប្រឹងណាស់ និងប្រើពេលអស់ ប្រហែលមួយឆ្នាំកន្លះឯណោះ តែទីបំផុតនៅតែសភាអង់គ្លេស បដិសេធច្រានចោលដល់ទៅ៣ដង។

លោក Boris Johnson គឺជាអ្នកនយោបាយ ដែលរៀនចេញពីOxford សាលាល្បីរបស់អង់គ្លេស។ លោកកើត នៅញូវយក សហរដ្ឋអាមេរិក ក្នុងត្រកូលអភិជន ជិតស្និទនឹងសែរាជវង្សអង់គ្លេស និងសែស្តេចនៅអឺរ៉ុប ។ កាលពីយុវវ័យ ក្រោយរៀនចប់ផ្នែកអក្សរសាស្ត្រនិងទស្សនវិជ្ជាភ្លាម លោកបានប្រលូកការងារជាអ្នកកាសែត គឺធ្វើការឱ្យ The Times ក៏ប៉ុន្តែត្រូវកាសែតនេះបណ្តេញចោល ពីព្រោះថា លោកធ្វើការខុសវិជ្ជាជីវៈអ្នកសារព័ត៌មាន ដោយប្រឌិតសាច់រឿងនិងសម្រង់សម្តីអ្នកផ្តល់បទសម្ភាសន៍ ខុស។ ក្រោយមក លោករត់ទៅធ្វើការ នៅកាសែត Daily Telegraph និង The Spectator រហូតក្លាយជានាយកនិពន្ធទទួលបន្ទុកសរសេរអត្ថបទវិភាគនយោបាយ។ រួចហើយ លោកក៏ប្រលូកខ្លួនក្នុងឆាកជិវិតនយោបាយរបស់អង់គ្លេសតែម្តង។ លោកបានជាប់ឆ្នោតជាអ្នកតំណាងរាស្ត្រ និងតមកទៀត ជាចៅហ្វាយក្រុងឡុង មុននឹងក្លាយជា រដ្ឋមន្ត្រីក្រសួងការបរទេស តែលោកបានសុំលាលែងកាលពីឆ្នាំមុន។

នៅក្នុងអាជីពនយោបាយនិងរឿងជីវិតផ្ទាល់ខ្លួន គឺលោកនេះ ពោរពេញដោយរឿងអាស្រូវ។ លោក Boris Johnson មានប្រពន្ធនិងកូនបួននាក់ទៅហើយ តែលោកបានប្រព្រឹត្តចំណងស្នេហាជាមួយអ្នកកាសែតស្រីម្នាក់ ដល់មានផ្ទៃពោះ និងត្រូវយកកូនចេញ។ គេកត់សម្គាល់ឃើញថា លោកជាមន្ត្រីដែលចាយវាយកញ្ចប់ថវិកាខ្ជះខ្ជាយច្រើន ហើយនិងធ្លាប់ជាអ្នកនយោបាយកុហកបោកប្រាស់។ ជាក់ស្តែង នៅឆ្នាំ២០១៦ ក្នុងយុទ្ធធានាការប្រជាមតិ លោកកុហកបំភ្លៃថា អង់គ្លេសបានចំណាយលុយ ជាង៣៥០លានផោន រៀងរាល់សប្តាហ៍ ទៅឱ្យសហភាពអឺរ៉ុប។ ក៏ប៉ុន្តែ បើតាមវិក្កយបត្រ ដែលបង្ហាញដោយសហភាពអឺរ៉ុប គឺ អង់គ្លេស ចំណាយតិចជាងនេះដល់ទៅជាង២ដងកន្លះ គឺត្រឹមតែ១៣៥លានថោនតែប៉ុណ្ណោះ រៀងរាល់ខែ ក្នុងចន្លោះឆ្នាំ២០១០ និង២០១៤។

ជាទូទៅ អ្នកវិភាគ យល់ឃើញថា លោក Boris Johnson ជាបុរសឈ្លាសវៃ, ម៉ត់ចត់ ចេះបត់បែន និងជាមនុសុ្សប្រាកដនិយម។ ក៏ប៉ុន្តេ គាត់នេះ ជាមនុស្សដែលប្រើគ្រប់មធ្យោបាយ ដើម្បីសម្រេចបំណងដែលជាមហិច្ចតារបស់ខ្លួន៕