សារព័ត៌មាន នគរវត្ត តែងតែនាំមុខគេជានិច្ច
សីតុណ្ហភាពក្តៅខ្លាំងបានកើនឡើងនៅប្រទេស បារាំង ប៊ែលហ្ស៊ិក, ហុល្លង់ ព្រមទាំងប្រទេសអាល្លឺម៉ង់ផងដែរ ។ នៅទីក្រុងប៉ារីស ស្ថានភាពអាកាសធាតុនៅពេលនេះ គឺក្តៅខ្លាំងជាងកាលពីខែកក្កដា ឆ្នាំ១៩៤៧នោះទៅទៀត ។ កាលណោះ សីតុណ្ហភាពឡើងក្តៅបំផុតត្រឹម៤០.៤អង្សាសេតែប៉ុណ្ណោះ ។
ប្រទេសក្នុងតំបន់អឺរ៉ុបជាច្រើន ប្រកាសមិនប្រើប្រាស់ល្បឿនលឿន រថភ្លើងដឹកអ្នកដំណើរនោះឡើយ ដើម្បីចៀសវាងខូចខាតបណ្តាញផ្លូវដែក ។ កាលពីថ្ងៃទី២៤ ខែកក្កដា ក្រុមហ៊ុនរថភ្លើងបារាំងបានជំរុញឲ្យអ្នកដំណើរពន្យារពេលធ្វើដំណើរ ខណៈនៅអាល្លឺម៉ង់ និងហ៊ុល្លង់ បានស្នើឲ្យអ្នកដំណើរតាមរថភ្លើងផ្លាស់ប្តូរសំបុត្រធ្វើដំណើររៀងខ្លួន ដោយឥតគិតថ្លៃ ។
បញ្ហាអាកាសធាតុក្តៅ គឺពិតជាគំរាមកំហែងដល់ពលរដ្ឋរស់នៅប្រទេសបារាំងខ្លាំងណាស់ ជាក់ស្តែងនៅថ្ងៃទី២៥ ខែកក្កដា ឆ្នាំ២០១៩ សីតុណ្ហភាពបានឡើងកម្តៅរហូតដល់ ៤២.៦ អង្សាសេទៅហើយ ។
មិនថាតែនៅទីក្រុងប៉ារីសនោះឡើយ នៅទូទាំងភាគខាងជើងតំបន់អឺរ៉ុប អាកាសធាតុឡើងកម្តៅ ក៏ដូចគ្នាផងដែរ ហើយបង្កឲ្យមានការព្រួយបារម្ភជាខ្លាំង អាចគំរាមកំហែងដល់សុខភាពសាធារណៈ អ្នកដំណើរតាមផ្លូវដែកជាដើម ។
ក្នុងអំឡុងពេលអាកាសធាតុក្តៅខ្លាំង នៅរដ្ឋធានីប្រទេសបារាំងនោះ, អាជ្ញាធរបានព្រមានឲ្យមានការពិនិត្យមើលជាប្រចាំ អ្នកទាំងឡាយដែលរស់នៅតែម្នាក់ឯង ។ បញ្ហានេះ ក៏បានធ្វើឲ្យប៉ះពាល់ដល់ការដឹកជញ្ជូនសាធារណៈទៅលើមនុស្សរាប់លាននាក់ផងដែរ ។
អ្នកដំណើរម្នាក់នៅទីក្រុងប៉ារីសឈ្មោះ Petra Ulm អាយុ៣៤ឆ្នាំ បានបញ្ជាក់ថា វាក្តៅខ្លាំងណាស់នៅក្នុងស្ថានីយរថភ្លើងក្រោមដី មិនអាចអត់ទ្រាំបាននោះឡើយ ។ គ្មានម៉ាស៊ីនត្រជាក់ ហើយមនុស្សណែនណាន់តាន់តាប់ជាន់លើគ្នា ។
ប៉ុន្តែទោះបីយ៉ាងណា រលកកម្តៅនេះ ត្រូវបានរំពឹងថា មានសភាពថមថយវិញ នៅថ្ងៃសុក្រ ដោយអាស្រ័យថា នឹងមានភ្លៀងធ្លាក់ និងផ្គររន្ទះឆ្លងកាត់នៅតំបន់នេះ ។ គេក៏បានព្រមានឲ្យប្រជាជនប្រយ័ត្នប្រយែងចំពោះសុខភាព ដោយសារតែបណ្តាលមកពីការផ្លាស់ប្តូរអាកាសធាតុនេះដែរ ។
គួរបញ្ជាក់ថា ប្រទេសបារាំងនៅតែដិតដាមដោយស្រមោលអតីតកាល ញាំញីដោយរលកកម្តៅ កាលពីរដូវក្តៅឆ្នាំ២០០៣ ដែលកាលណោះបណ្តាលឲ្យបាត់បង់អាយុជីវិត១៥,០០០ មនុស្ស-សត្វ ៕
