សារព័ត៌មាន នគរវត្ត តែងតែនាំមុខគេជានិច្ច
សាឌីអារ៉ាប៊ី មានច្បាប់តឹងតែងយ៉ាងខ្លាំង ចំពោះស្ត្រី ហើយស្ត្រីគ្មានសិទ្ធិ នោះឡើយក្នុងសង្គមប្រទេសនេះ ។ ប៉ុន្តែក្រោយពេលដែល រាជបុត្រ បីល សាលម៉ែន ត្រូវបានតែងតាំងជា រាជទាយាទ សម្រាប់ស្នើងតំណែង ព្រះអង្គបានកែប្រែ ច្បាប់ជាច្រើន ក្នុងនោះ បានអនុញ្ញាតឲ្យ ស្ត្រីបើកបរ រថយន្តបាន ក៏ដូចជាទៅចូលរួម ទស្សនាការប្រកួតបាល់ទាត់ ដូចជាបុរស ។
នៅពេលនេះដែរ រដ្ឋាភិបាល នៃប្រទេសអារ៉ាប៊ី សាអូឌីត កាលពី ថ្ងៃទី១ ខែសីហា បានអនុញ្ញាតឲ្យស្ត្រីចាកចេញទៅក្រៅប្រទេសបាន ដោយមិនចាំបាច់ ទទួលបានការឯកភាពពីបុរស នៅក្នុងក្រុមគ្រួសារនោះឡើយ ។
សារព័ត៌មាន AFP បានផ្សាយថា ការសម្រេចរបស់រដ្ឋាភិបាលអារ៉ាប៊ី សាអូឌីត បែបនេះ គឺកើតឡើង ក្រោយពេលអង្គការសង្គមស៊ីវិល បានប្រឆាំងតវ៉ា រយៈពេលជាច្រើនឆ្នាំ ដើម្បីបើកឲ្យមានសិទ្ធិទូលំទូលាយដល់ស្ត្រី ក្នុងប្រទេសនេះ ។ ចុងក្រោយ រដ្ឋាភិបាល នៃប្រទេសនេះ បានសម្រេចប្រកាសជាផ្លូវការ នៅលើបណ្តាញព័ត៌មាន Umm Al Qura ថា «រដ្ឋាភិបាលនឹងផ្តល់លិខិតឆ្លងដែនដល់អ្នកដែលបានស្នើសុំ ដោយមិនថា បុរស ឬស្ត្រីនោះឡើយ» ។ នៅក្នុងសេចក្តីប្រកាសនោះបានបញ្ជាក់ទៀតថា ស្ត្រីដែលមានអាយុ ចាប់ពី២១ឆ្នាំឡើងទៅ គឺមានសិទ្ធិកាន់លិខិតឆ្លងដែន ហើយអាចចាកចេញទៅប្រទេសក្រៅបាន ដោយមិនចាំបាច់ទទួលបានការអនុញ្ញាត ពីបុរស (មេគ្រួសារ) នោះឡើយ ។
ការសម្រេចខាងលើ គឺជាការកាត់បន្ថយនូវសិទ្ធិអំណាច ក្នុងការតាមដាន ត្រួតពិនិត្យរបស់បុរស ដែលជាស្វាមី ឪពុក ឬបងប្រុស នៅក្នុងគ្រួសារ ។ កន្លងមក ស្ត្រីអារ៉ាប់ មិនមានសិទ្ធិដើរហើរ ឬធ្វើដំណើរចេញក្រៅប្រទេស បើគ្មានមនុស្សប្រុសទៅជាមួយ ។ កន្លងមក អារ៉ាប៊ី សាអូឌីត ក៏បានអនុម័តច្បាប់ជាប្រវត្តិសាស្ត្រ ដើម្បីបើកផ្លូវឲ្យស្ត្រីភេទ អាចបើកបររថយន្តបាន ខណៈពីមុនមក មិនធ្លាប់មាននោះឡើយ ។
ការសម្រេចរបស់រដ្ឋាភិបាលអារ៉ាប់ ប៊ីសាអូឌីត បែបនេះ នឹងជួយឲ្យស្ត្រីភេទ រស់នៅក្នុងប្រទេសអារ៉ាប៊ី សាអូឌីត អាចធ្វើដំណើរទៅកាន់បណ្ដាប្រទេសផ្សេងៗទៀត ក្នុងតំបន់ អារ៉ាប់ យ៉ាងងាយស្រួលបំផុត ដោយមិនចាំបាច់ មានការអនុញ្ញាតពីមនុស្សប្រុស នៅក្នុងគ្រួសារ ៕
