សារព័ត៌មាន នគរវត្ត តែងតែនាំមុខគេជានិច្ច
ចាប់តាំងពីលោកត្រាំ ឡើងកាន់តំណែងដឹកនាំអាមេរិកមក ធ្វើឲ្យប្រទេសក្នុងតំបន់អឺរ៉ុបខកចិត្តយ៉ាងខ្លាំង ដោយលោកត្រាំ មិនយោគយល់ដល់ប្រទេសជាមិត្ត រាប់សិបឆ្នាំកន្លងមក ។ លោកត្រាំបានដំឡើងពន្ធដាក់ប្រទេសអឺរ៉ុប មិនតែប៉ុណ្ណោះ បានដាក់គំនាបអឺរ៉ូប ឲ្យធ្វើនូវរឿងរ៉ាវ ដែលអឺរ៉ូប មិនចង់ធ្វើ ក្នុងនោះមានការដាក់ទណ្ឌកម្ម ទៅលើប្រទេសអ៊ីរ៉ង់ ជាដើម ។
ប្រធានាធិបតីអាមេរិក ដូណាល់ ត្រាំ បានព្រមានថា នឹងដោះលែង ក្រុមភេរវកម្ម IS ២៥០០នាក់ ដែលអាមេរិកកំពុងតែឃុំខ្លួននៅប្រទេសស៊ីរី និងអ៊ីរ៉ាក់ ឲ្យចូលទៅតំបន់អឺរ៉ុប ប្រសិនបើ ប្រទេស ក្នុងតំបន់នេះមិនព្រមទទួលអ្នកទោសភេរវកម្មទាំងនោះទៅឃុំនៅប្រទេសរបស់ខ្លួនទេនោះ។
ប្រធានាធិបតីដូណាល់ ត្រាំបាន បញ្ជាក់ទៅកាន់ក្រុមអ្នកសារព័ត៌មានថា « អស់លោកបានដឹងហើយថា យើងបានយកឈ្នះទៅលើក្រុមភេរវកម្ម IS ហើយយើងបានចាប់ខ្លួនខ្មាន់កាំភ្លើងភេរវកម្ម១០០ភាគរយ បើទោះបីមាននៅសល់តិចតួចក្តី ។ បច្ចុប្បន្នយើងកំពុងតែឃុំខ្លួនខ្មាន់កាំភ្លើងភេរវកម្មជាង១ម៉ឺននាក់ ។យើងចង់ឲ្យអឺរ៉ុបទទួលអ្នកទោសភេរវកម្ម ២៥០០នាក់ដែលមានសញ្ជាតិអឺរ៉ុប យកទៅឃុំខ្លួននៅក្នុងប្រទេសរបស់រឿងៗខ្លួន» ។
នេះមិនមែនជាលើកទីមួយឡើយដែល លោកត្រាំស្នើឲ្យបណ្តាប្រទេស ក្នុងតំបន់អឺរ៉ុប ទទួលនៅខ្មាន់កាំភ្លើង មានសញ្ជាតិ អឺរ៉ុបដែលកំពុងតែឃុំខ្លួន ក្នុងប្រទេសស៊ីរី និងអ៊ីរ៉ាក់។ កាលពី ខែកុម្ភៈកន្លងមក លោកត្រាំ ក៏បានព្រមាន បញ្ជូនខ្មាន់កាំភ្លើង៨០០នាក់ ទៅឲ្យអឺរ៉ុបផងដែរ ។
បណ្តាប្រទេសនៅក្នុងតំបន់អឺរ៉ុប បង្ហាញការភ្ញាក់ផ្អើលយ៉ាងខ្លាំង ចំពោះសកម្មភាពរបស់រដ្ឋាភិបាលទីក្រុងវ៉ាស៊ីនតោន ដែលបានព្រមានដោះលែងខ្មាន់កាំភ្លើង សញ្ជាតិអឺរ៉ុប បើប្រទេសអឺរ៉ុប មិនទទួលយកនោះទេ។
ការចាប់ឃុំខ្លួនក្រុមភេរវកម្ម ប្រមាណជាង១ម៉ឺននាក់បានធ្វើឲ្យ អាមេរិក ត្រូវចំណាយប្រាក់ជាច្រើន ដើម្បីចិញ្ជឹមអ្នកទោសភេរវកម្ម ទាំងនោះ ។ ដូច្នេះហើយអាមេរិក ចង់ចែករំលែក អ្នកទេស ដោយអ្នកទោសមានសញ្ជាតិប្រទេសណា យកទៅដាក់គុកនៅក្នុងប្រទេសនោះទៅ ៕
