សារព័ត៌មាន នគរវត្ត តែងតែនាំមុខគេជានិច្ច
កម្លាំងទាហានអ៊ីរ៉ង់ ចាប់បានប្រកាសថា ចាប់នាវាដឹកប្រេងមួយគ្រឿងនៅតំបន់ សមុទ្រពែក្ស ដោយសង្ស័យថា បានដឹកប្រេងខុសច្បាប់ ។ សកម្មភាពខាងលើ នឹងបង្កឲ្យតានតឹងកាន់តែខ្លាំង ។
សារព័ត៌មានFars របស់អ៊ីរ៉ង់នៅ ថ្ងៃទី៤ ខែសីហា បានផ្សាយថា នៅលើនាវានោះមាននាវឹក ៧នាក់ និងប្រេងប្រមាណ៧សែនលីត្រ ។ មេបញ្ជាការកម្លាំងទាហានជើងទឹកអ៊ីរ៉ង់ លោក RamazanZirahi បានបញ្ជាក់ថា នាវាដឹកប្រេងខាងលើ ចាប់នៅក្នុងដេនសមុទ្ររបស់ប្រទេសអ៊ីរ៉ង់ ។ លោកបន្តទៀតថា នាវាខាងលើកំពុងរត់ពន្ធប្រេងទៅកាន់ប្រទេសមួយចំនួន នៅអារ៉ាប់ ហើយអ៊ីរ៉ង់បានចោទថា នាវានោះជារបស់អ៊ីរ៉ាក់ ។ ប៉ុន្តែក្រសួងប្រេងរបស់អ៊ីរ៉ាក់ បានអះអាងថា ខ្លួនមិនបាននាំប្រេង ចេញទៅកាន់ទីផ្សារបរទេសអ្វីនោះឡើយ ។
សេចក្តីរាយការណ៍នោះ បានកើតឡើងចំពេលដែលស្ថានការតានតឹងកំពុងកើនកម្តៅខ្លាំងផង ក្រោយអាមេរិកពង្រឹងការដាក់ទណ្ឌកម្មទៅលើវិស័យប្រេងរបស់អ៊ីរ៉ង់ ។ រីឯការដាក់ទណ្ឌកម្មរបស់អាមេរិក បន្ទាប់ពីទីក្រុងវ៉ាស៊ីនតោន ប្រកាសដកខ្លួនជាឯកតោភាគី ចេញពីកិច្ចព្រមព្រៀងនុយក្លេអ៊ែរ ឆ្នាំ២០១៥នោះ ។
កាលដំបូងឡើយ អ៊ីរ៉ង់ ចោទប្រកាន់នាវានោះ ពីបទរត់ពន្ធប្រេង ។ កាលពីថ្ងៃទី១៣ ខែកក្កដា ឆ្មាំការពារដែនសមុទ្រអ៊ីរ៉ង់ បានចាប់នាវាដឹកប្រេង MT Riah បំពាក់ទង់ជាតិប្រទេសប៉ាណាម៉ា ។
សារព័ត៌មាន Sepah News របស់ឆ្មាំបដិវត្តន៍អិស្លាមអ៊ីរ៉ង់ បានផ្សាយថា នៅអំឡុងពេលនាវានោះត្រូវបានចាប់ គឺកម្លាំងឆ្មាំសមុទ្របានល្បាត គោលបំណងរកឲ្យឃើញ និងប្រឈមមុខការរត់ពន្ឌដែលមានការរៀបចំនោះ ។ កាលពីខែមុន អ៊ីរ៉ង់បានចាប់នាវាដឹកប្រេងបំពាក់ទង់ជាតិអង់គ្លេស ឈ្មោះ Stena Impero នៅច្រកសមុទ្រះ ហូមូស ដោយនិយាយថា បានបើកទៅបុកទូកនេសាទមួយគ្រឿង ។
សហរដ្ឋអាមេរិកបានបន្ទោសអ៊ីរ៉ង់ថា ជាអ្នកវាយប្រហារ២ដោយឡែកពីគ្នា ដោយប្រើគ្រឿងបំផ្ទុះ ធ្វើឲ្យខូចខាតនាវាដឹកប្រេង នៅឈូងសមុទ្រអូម៉ង់ កាលពីខែឧសភា និងខែមិថុនា ឆ្នាំ២០១៩ តែការចោទប្រកាន់នេះ ត្រូវបានរដ្ឋាភិបាលទីក្រុងតេអេរ៉ង់ ច្រានចោល ។ សារព័ត៌មាន Fars News បានផ្សាយថា ប្រតិបត្តិការចាប់នាវាដឹកប្រេងរបស់បរទេសខាងលើនេះ បានធ្វើឡើង កាលពីថ្ងៃ៣១ ខែកក្កដា ឆ្នាំ២០១៩ ស្ថិតនៅឈូងសមុទ្រ នៃដែនកោះ Farsi ។
នាវាដឹកប្រេងនោះ ត្រូវបាននាំទៅកាន់ទីក្រុង Busheher ហើយប្រេងដែលនៅក្នុងនោះ ត្រូវគេប្រគល់ជូនអាជ្ញាធរ ។ ក្រោយមក សារព័ត៌មាន Irna បានដកស្រង់សម្តីឆ្មាំការពារបដិវត្តន៍អ៊ីស្លាមអ៊ីរ៉ង់ ដោយបានបញ្ជាក់ថា នាវាដឹកប្រេងដែលចាប់នោះ ជារបស់ប្រទេសអ៊ីរ៉ាក់ ។ ដោយឡែកនាវិក៧នាក់ នៅលើនាវានោះ មានចម្រុះជាតិសាសន៍ ហើយគេនៅមិនទាន់ដឹងថា ពួកគេមកពីប្រទេសណាខ្លះនោះទេ ។ នាវាទាំងនោះ ហាក់មិនត្រូវបានគេកំណត់ថា បានបាត់ខ្លួននោះដែរ ។
ទោះជាយ៉ាងណា រដ្ឋមន្ត្រីក្រសួងប្រេងអ៊ីរ៉ាក់ បានច្រានចោលថា នាវាដឹកប្រេងដែលត្រូវអ៊ីរ៉ង់ចាប់ខាងលើនេះ មិនមែនជារបស់អ៊ីរ៉ាក់ទេ ។ នេះបើតាមការផ្សាយរបស់កាសែតរ៉យទ័រ កាលពីថ្ងៃទី៤ ខែសីហា ឆ្នាំ២០១៩ ដោយដកស្រង់ប្រភពពីប្រព័ន្ធផ្សព្វផ្សាយ នៅក្នុងតំបន់ ៕
