សារព័ត៌មាន នគរវត្ត តែងតែនាំមុខគេជានិច្ច
បាញ់ប្រហារ ពីរករណីនៅអាមេរិក នាចុងសប្តាហ៍កន្លងមក នៅក្នុងទឹកដីអាមេរិក បណ្តាលឲ្យមានអ្នកស្លាប់កើនឡើង ដល់ទៅ៣៤ នាក់ និងរងរបួស ៥០នាក់ ក្នុងរយៈពេលមិនដល់មួយសប្តាហ៍ផង ។ ក្នុងករណីបាញ់ប្រហារពីរលើកចុងក្រោយបំផុតនៅថ្ងៃទី៤ ខែសីហា បានសម្លាប់មនុស្ស២៩នាក់ ។
នៅក្នុងសប្តាហ៍ទីមួយ នៃខែសីហា ក៏មានការបាញ់ប្រហារនៅរដ្ឋកាលីហ្វ័រនីញ៉ា និងនៅក្នុងផ្សារទំនើប រដ្ឋ Mississippi សម្លាប់មនុស្ស៥នាក់ និងរាប់សិបនាក់រងរបួស ។
ប្រធានាធិបតីអាមេរិក ដូណាល់ ត្រាំ បានថ្កោលទោសការបាញ់ប្រហារ ជាបន្តបន្ទាប់នៅអាមេរិក ។ មានប្រសាសន៍ទៅកាន់ក្រុមអ្នកសារព័ត៌មានក្រោយរងការបាញ់ប្រហារនៅទីក្រុង El Paso ក្នុងរដ្ឋតិចសាស និង ទីក្រុង Dayto ក្នុងរដ្ឋOhio ប្រធានាធិបតីដូណាល់ ត្រាំ បាន ថ្កោលទោសយ៉ាងខ្លាំងដល់សកម្មភាព បាញ់ប្រហារខាងលើ ។ លោកបន្តទៀតថា បញ្ហាសុខភាព និងបញ្ហាខួរក្បាល ជាមូលហេតុបណ្តាលឲ្យមានការបាញ់ប្រហារខាងលើ ។
លោកត្រាំបញ្ជាក់ថា «យើងចាំបាច់ត្រូវតែ មានសកម្មភាព ដើម្បី រារាំងការបាញ់ប្រហារនៅអាមេរិក ។ បញ្ហាទាំងនោះ បានកើតឡើងជាច្រើនឆ្នាំកន្លងមក បង្កក្តីបារម្ភយ៉ាងខ្លាំងដល់ពលរដ្ឋ» ។
ជាមួយគ្នានេះដែរ គូប្រជែងនៅក្នុងការបោះឆ្នោត ជាមួយលោកត្រាំ កាលពីឆ្នាំ២០១៦ លោកស្រីហ៊ីលឡារី គ្លីនតុន បានអំពាវនាវឲ្យ សភាអនុម័ត ច្បាប់គ្រប់គ្រង អាវុធ ។
អតីតរដ្ឋមន្ត្រីការបរទេស អាមេរិក លោកស្រី ហ៊ីលឡារី គ្លីនតុន បានអំពាវនាវដល់ តំណាងរាស្ត្រនៅក្នុងគណបក្សសាធារណរដ្ឋ និងប្រជាធិបតេយ្យ អនុម័តច្បាប់សុវត្ថិភាព ក្នុងការប្រើប្រាស់កាំភ្លើង ក្រោយរងការបាញ់ប្រហារពីរលើកផ្ទួនៗគ្នា ។ ច្បាប់ថ្មីនឹងត្រួតពិនិត្យប្រវត្តរូបក៏ដូចជា រាល់សកម្មភាពទិញលក់កាំភ្លើង ។
នៅលើបណ្តាញសង្គម លោកស្រីហ៊ីលឡារី គ្លីនតុនបានបញ្ជាក់ថា «ចំពោះការបាញ់ប្រហារពីរលើក ក្នុងរយៈមួយថ្ងៃ សម្លាប់មនុស្សយ៉ាងច្រើន នោះ បានបង្ខំឲ្យយើងត្រូវតែធ្វើសកម្មភាព ដើម្បីទប់ស្កាត់» ។
លោកស្រីហ៊ីលឡារី គ្លីនតុនក៏បានអំពាវានាវដល់គណបក្សទាំងពីរ រួមគ្នាដើម្បីអនុម័តច្បាប់គ្រប់គ្រងការប្រើប្រាស់ និងទិញដូរអាវុធ ។ គម្រោងច្បាប់គ្រប់គ្រងអាវុធបានស្នើឡើងជាយូណាសមកហើយ ប៉ុន្តែមកទល់ពេលនេះនៅមិនទាន់ អនុម័តជាផ្លូវការនោះឡើយ ។
ការអំពាវនាវរបស់លោកស្រី គ្លីនតុនកើតឡើងក្រោយពេលមានការបាញ់ប្រហារ នៅទីក្រុង Dayton រដ្ឋ Ohio សម្លាប់មនុស្ស៩នាក់ នាថ្ងៃទី៤ ខែសីហា និងការបាញ់ប្រហារនៅ ទីក្រុង El Paso រដ្ឋតិចសាស សម្លាប់មនុស្ស ២០នាក់ និង ២៦នាក់រងរបួស ៕
