សារព័ត៌មាន នគរវត្ត តែងតែនាំមុខគេជានិច្ច
សារព័ត៌មាន AFP នៅថ្ងៃទី៩ ខែសីហា បានដកស្រង់សម្តីរដ្ឋមន្ត្រីការបរទេស អាមេរិក លោក Mike Pompeo បញ្ជាក់ថា «យុទ្ធសាស្ត្រនៅក្នុងទំនាក់ទំនង ជាមួយកូរ៉េខាងជើង របស់ប្រធានាធិបតី ដូណាល់ ត្រាំ មិនផ្លាស់ប្តូរនោះឡើយ ។ ការខិតខំរបស់យើងគឺឈានទៅរកការរំសាយអាវុធបរមាណូ ទាំងស្រុង នៅកូរ៉េខាងជើង» ។ រដ្ឋមន្ត្រីការបរទេស លោក Mike Pompeo បានបញ្ជាក់ថា ការបាញ់សាកល្បងមីស៊ីលរបស់កូរ៉េខាងជើងនាពេលកន្លងមក មិនប៉ះពាល់ដល់គម្រោងពិភាក្សាស្តីពីកម្មវិធីបរមាណូ របស់កូរ៉េខាងជើងនោះឡើយ ។
រដ្ឋមន្ត្រីការបរទេសអាមេរិកបានបញ្ជាក់ថា ការបាញ់សាកល្បងមីស៊ីលនាពេលកន្លងមក របស់កូរ៉េខាងជើង មិនប៉ះពាល់ដល់គម្រោងពិភាក្សាឡើង ដោយការសាកល្បងនោះជាមីស៊ីលរយៈចម្ងាយខ្លីតែប៉ុណ្ណោះ ។ ចំណែក មីស៊ីលឆ្លងទ្វីប កូរ៉េខាងជើង បានផ្អាកសាកល្បងតាំងពី ខែកញ្ញាឆ្នាំ២០១៧ ។ នៅពេលនេះ យើងបានឡើងគម្រោង សម្រាប់កិច្ចពិភាក្សា នៅពេលដ៏ខ្លីខាងមុខ ។
ក្រុមអ្នកឯកទេសវិភាគបានលើកឡើងថា កូរ៉េខាងជើង នឹងមិនវិលត្រឡប់ចូលតុពិភាក្សាឡើងមុនពេលសមយុទ្ធ រវាងអាមេរិក និងកូរ៉េខាងត្បូងមិនទាន់បញ្ចប់នោះ ។ ទីក្រុងព្យុងយ៉ាងបានថ្កោលទោសយ៉ាងខ្លាំង ដល់សកម្មភាពធ្វើសមយុទ្ធ គឺជាការបំពានកិច្ចព្រមព្រៀងសន្តិភាពដែលកូរ៉េខាងជើង បានចុះហត្ថលេខាងជាមួយអាមេរិក និងកូរ៉េខាងត្បូង ។
ក្នុងពេលជាមួយគ្នានេះដែរ រដ្ឋមន្ត្រីក្រសួងការពារជាតិអាមេរិក ដែលទើបចូលកាន់តំណែងថ្មី លោក Mark Esper នៅថ្ងៃទី៩ ខែសីហា ឆ្នាំ២០១៩ បានធ្វើដំណើរទៅបំពេញទស្សនកិច្ច នៅក្នុងប្រទេសកូរ៉េខាងត្បូង ចំពេលតំបន់នេះ មានបញ្ហាប្រកួតប្រជែង និងតានតឹងដាក់គ្នាយ៉ងខ្លាំង រវាងរដ្ឋាភិបាលទីក្រុងសេអ៊ុល និងតូក្យូ ខណៈប្រទេសទាំងពីរ សុទ្ធតែជាសម្ព័ន្ធមិត្តដ៏ល្អរបស់អាមេរិក ។
នេះជាដំណើរទស្សនកិច្ចលើកដំបូងរបស់លោក Esper ក្រោយក្លាយជារដ្ឋមន្ត្រីការពារជាតិអាមេរិក ។ កាលពីល្ងាច ថ្ងៃទី៨ សីហា លោក Esper បានទៅដល់កូរ៉េខាងត្បូង ហើយនៅក្នុងដំណើរទស្សនកិច្ចនោះ លោក Esper ទំនងជាស្នើឲ្យរដ្ឋាភិបាលកូរ៉េខាងត្បូង និងជប៉ុនបន្ធូរបន្ថយនូវស្ថានការណ៍តានតឹង រវាងប្រទេសទាំង២ផងដែរ ។ កូរ៉េខាងត្បូង បានប្តេជ្ញាអនុវត្តគ្រប់វិធីសាស្ត្រទាំងអស់ ដើម្បីតទល់ជាមួយនឹងប្រទេសជប៉ុន លើបញ្ហាសេដ្ឋកិច្ច ក្នុងនោះមានទាំងការបញ្ឈប់សន្ធិសញ្ញាចែករំលែកព័ត៌មានចារកម្មជាដើម ។
លោក Esper បានទៅដល់ទីក្រុងសេអ៊ុល មួយថ្ងៃ បន្ទាប់ពីលោក ដូណាល់ ត្រាំ ប្រធានាធិបតីអាមេរិក ថ្លែងថា កូរ៉េខាងត្បូងយល់ព្រមចំណាយថវិកា បន្ថែមដល់កងកម្លាំងយោធាអាមេរិក ចំនួន២៨ ៥០០នាក់ដែលកំពុងឈរជើង នៅក្នុងប្រទេសកូរ៉េខាងត្បូង ហើយនេះក៏ជាបញ្ហាមួយ ដែលត្រូវលើកយកមកពិភាក្សាគ្នាផងដែរ ។
ទោះជាយ៉ាងណាក៏ដោយ លោករដ្ឋមន្ត្រីក្រសួងការបរទេសកូរ៉េខាងត្បូង បានថ្លែងថា ការពិភាក្សាស្តីអំពីបញ្ហានេះ នៅមិនទាន់ចាប់ផ្តើមនៅឡើយ ។ រីឯដំណើរទស្សនកិច្ចនេះ ក៏បានធ្វើឡើង ក្រោយពេលប្រទេសកូរ៉េខាងជើង បាញ់មីស៊ីលជាច្រើនគ្រាប់ កាលពីប៉ុន្មានថ្ងៃមុននេះ ។
ស្រ្តីអ្នកនាំពាក្យក្រសួងការពារជាតិ នៃប្រទេសកូរ៉េខាងត្បូង កាលពីថ្ងៃទី៨ ខែសីហា បានថ្លែងថា លោកស្រីJeong Kyeong-doo រដ្ឋមន្ត្រីក្រសួងការពារជាតិកូរ៉េខាងត្បូង និងលោក Esper នឹងជួបពិភាក្សាគ្នា អំពីបញ្ហាមួយចំនួន រួមមាន ស្ថានការណ៍សន្តិសុខនៅលើឧបទ្វីបកូរ៉េ, សម្របសម្រួលនយោបាយជំរុញឲ្យមានការរំសាយអាវុធនុយក្លេអ៊ែរ ដើម្បីឈានដល់សន្តិភាពជាអចិន្ត្រៃយ៍ ព្រមទាំងពិភាក្សាអំពីបញ្ហាសម្ពន្ធមិត្តដ៏សំខាន់នោះដែរ ។
កាលពីដើមសប្តាហ៍នេះ លោក Esper បានថ្លែងថា អាមេរិកមិនបានប្រកាន់ហួសហេតុពេកទេ ចំពោះការបាញ់មីស៊ីលរយៈចម្ងាយខ្លីរបស់កូរ៉េខាងជើងនោះ ។ ការថ្លែងបែបនេះ គឺលោករដ្ឋមន្រ្ដីការពារជាតិអាមេរិក ចង់រក្សាឲ្យទ្វារបើកចំហដល់ដំណើរការពិភាក្សាជាមួយរដ្ឋាភិបាលទីក្រុងព្យុងយ៉ាង ។ លោករដ្ឋមន្រ្ដី បានបញ្ជាក់ថា បើទោះជាមានការទទូចពីកូរ៉េខាងជើងក្តី គម្រោងធ្វើសមយុទ្ធយោធារួម រវាងអាមេរិក និងកូរ៉េខាងត្បូង គឺគ្មានការប្រែប្រួលនោះដែរ នៅពេលអនាគត ។ សូមជម្រាបថា មុនពេលមកដល់ប្រទេសកូរ៉េខាងត្បូង នោះ លោក Esper រដ្ឋមន្រ្ដីការពារជាតិអាមេរិក បានទៅបំពេញទស្សនកិច្ច នៅក្នុងប្រទេសអូស្ត្រាលី ជប៉ុន និងម៉ុងហ្គោលី ៕
