សារព័ត៌មាន នគរវត្ត តែងតែនាំមុខគេជានិច្ច
ប៉ាគីស្ថានបានប្រកាសថា បើទោះបីមិនឌឺដងជាមួយឥណ្ឌានៅតំបន់ព្រំដែនកាស្មៀរ ប៉ុន្តែ ប៉ាគីស្ថានអាច បញ្ជូនទាហានមួយចំនួនធំទៅកាន់ព្រំដែន រួមទាំងអាវុធទំនើបៗជាច្រើនផ្សេងទៀត ។
លោក Asad Majeed Khan អគ្គរដ្ឋទូតប៉ាគីស្ថានប្រចាំនៅអាមេរិក បានបញ្ជាក់ថា ប៉ាគីស្ថានកំពុងតែរវល់នៅព្រំដែនភាគខាងលិច ប៉ុន្តែ បើស្ថានភាព កាន់តែតានតឹងនៅភាគខាងកើតនោះ គឺប៉ាគីស្ថានចាំបាច់ត្រូវតែបញ្ជូនទាហាន មកកាន់ទីនេះវិញ។
នៅថ្ងៃទី១៣ ខែសីហា រដ្ឋមន្ត្រីការបរទេសប៉ាគីស្ថាន លោក Shah Mahmood Qureshi បានបញ្ជាក់ថា បានសរសេរលិខិតផ្ញើទៅកាន់ ក្រុមប្រឹក្សាសន្តិសុខអង្គការសហប្រជាជាតិ ។
រដ្ឋមន្ត្រីការបរទេសប៉ាគីស្ថាន បានបញ្ជាក់ថា «ប៉ាគីស្ថានមិនឌឺដងឈានដល់ សង្គ្រាមជាមួយឥណ្ឌានោះឡើយ ។ ប៉ុន្តែប្រសិនបើឥណ្ឌា ប្រើប្រាស់កម្លាំង យោធានោះ ប៉ាគីស្ថានចាំបាច់ត្រូវតែបង្កើតសមត្ថភាពការពារ» ។
កាលពីថ្ងៃទី១៣ ខែសីហា ប៉ាគីស្ថាន បានស្នើដល់ក្រុមប្រឹក្សាសន្តិសុខអង្គការសហប្រជាជាតិ កោះប្រជុំជាបន្ទាន់ស្តីពី បញ្ហាកាស្មៀរ ក្រោយពេល ឥណ្ឌាបានដកសិទ្ធិគ្រប់គ្រងស្វ័យភាពនៅក្នុងតំបន់នោះ។
នៅក្នុងលិខិត ផ្ញើទៅកាន់ ក្រុមប្រឹក្សាសន្តិសុខអង្គការសហប្រជាជាតិ រដ្ឋមន្ត្រីក្រសួងការបរទេសប៉ាគីស្ថាន លោក Shah Mahmood Qureshi បញ្ជាក់ថា «ប៉ាគីស្ថានមិនស្វែងរកសង្គ្រាមនោះឡើយ ប៉ុន្តែ ប្រសិនបើឥណ្ឌាជ្រើសរសើការប្រើប្រាស់យោធានោះ ប៉ាគីស្ថាននិង តបតវិញ នៅអ្វីដែលខ្លួនមាន»។
ទំនាក់ទំនងរវាងឥណ្ឌានិងប៉ាគីស្ថាន កាន់តែតានតឹង ខ្លាំងឡើងក្រោយពេលរដ្ឋាភិបាលទីក្រុង ញូវដេលី កាលពីថ្ងៃទី៥ ខែសីហា បានសម្រេចដកសិទ្ធិស្វ័យភាពនៅក្នុងតំបន់ Jammu និងកាស្មៀរ។ នៅពេលនេះច្បាប់អាជ្ញាសឹកក៏ត្រូវបានអនុម័តនៅក្នុងតំបន់នេះដែរ ចៀសវាងការ ក្រោកឈរឡើងប្រឆាំងពីសំណាក់ពលរដ្ឋនៅក្នុងតំបន់កាស្មៀរ។
អគ្គលេខាធិការអង្គការសហប្រជាជាតិ លោក Antonio Guterres បានអំពាវនាវដល់ឥណ្ឌា និងប៉ាគីស្ថាន រក្សាការអត់ធ្មត់ឲ្យបានល្អបំផុត បញ្ជៀការផ្ទុះអាវុធដាក់គ្នាក្លាយទៅជាសង្គ្រាមទ្រង់ទ្រាយធំ ៕
