សារព័ត៌មាន នគរវត្ត តែងតែនាំមុខគេជានិច្ច
ព្យុះសង្ឃរា Dorian គឺជាព្យុះកំណាចបំផុតនៅក្នុងឆ្នាំនេះ សំដៅទៅកាន់ទឹកដីអាមេរិក ក្នុងដ្ឋ Florida ក្រោយបោកបក់បំផ្លាញ នៅលើកោះ បាហាម៉ា ។ នៅពេលនេះ ជើងហោះហើរប្រមាណជាង១៥០០ជើង ត្រូវលុបចោល នៅក្នុងរដ្ឋ Florida ដើម្បីសុវត្ថិភាពអ្នកដំណើរ ។
តាមទិន្នន័យដែលបានផ្សព្វផ្សាយ នៅលើគេហទំព័រ FlightAware.com បញ្ជាក់ថា តាមការប៉ាន់ប្រមាណ ជើងហោះហើរ ១៥០០ជើង ទាំងទៅ និងត្រឡប់មកវិញ នៅរដ្ឋ Florida ត្រូវបានប្រកាសលុបចោល ដើម្បីជាវិធានការបង្ការទុកជាមុន ពីគ្រោះថ្នាក់ជាយថាហេតុ បណ្តាលមកពីខ្យល់ព្យុះ Dorian នោះ ។
ប្រភពព័ត៌មានដដែល បានបន្តថា ការលុបចោលជើងហោះហើរនេះ បានធ្វើឲ្យប៉ះពាល់ដល់ប្រតិបត្តិការ នៅអាកាសយានដ្ឋានទីក្រុង Miami, Orlando, Fort Lauderdale ហើយនិង Palm Beach ផងដែរ ។
កាលពីថ្ងៃទី១ ខែកញ្ញា ឆ្នាំ២០១៩ ខ្យល់ព្យុះ Dorian បានវិវឌ្ឍខ្លួន ក្លាយជាខ្យល់ព្យុះមានកម្លាំងខ្លាំងប្រភេទទី៥ ។ រីឯកម្លាំងខ្យល់ មានល្បឿនបក់បោក ចម្ងាយប្រហែល២៩៧គីឡូម៉ែត្រ ក្នុងមួយម៉ោង (១៨៥ម៉ៃល៍) ។
ព្យុះកំណាច Dorian នេះដែរ បាននាំមកជាមួយនូវភ្លៀងធ្លាក់ខ្លាំងយ៉ាងខ្លាំង ផ្ទររន្ទះ ខ្យល់កួចយ៉ាងសាហាវ គួរឲ្យរន្ធត់ ឆ្លងកាត់ប្រទេសដែនកោះ Bahamas កាលពីថ្ងៃទី២ ខែកញ្ញា ឆ្នាំ២០១៩ ធ្វើឲ្យខូចខាងលំនៅឋាន ចំនួន១៣ ០០០ខ្នង និងសម្លាប់មនុស្សយ៉ាងតិច៥នាក់ ។ ខ្យល់ព្យុះ Dorian នៅពេលបច្ចុប្បន្ននេះ បានថយឥទ្ធិពលមកនៅត្រឹមប្រភេទលេខ៣វិញ ស្ថិតនៅតំបន់ដែនកោះ Grand Bahama ។
ជាមួយគ្នានេះដែរ ក្រុមអ្នកសង្គ្រោះ បានរៀបចំដោះស្រាយការងារមនុស្សធម៌ បន្ទាប់ពីព្យុះមានកម្លាំងខ្លាំង បានវាយប្រហារទៅលើកោះនេះ បណ្ដាលឲ្យមានមនុស្សស្លាប់យ៉ាងតិច៥នាក់ស្លាប់ ។ ប៉ុន្ដែទោះជាយ៉ាងណាទំហំ នៃការបំផ្លិចបំផ្លាញ ដោយសារគ្រោះមហន្ដរាយនេះ គឺអាជ្ញាធរនៅលើកោះនេះ មិនទាន់ដឹងនៅឡើយ ។
យោងតាមវីដេអូដែលថតបានទៅលើដែនកោះនោះ បានបង្ហាញថា តំបន់ជិតនោះ រាប់សិបគីឡូម៉ែត្រ ត្រូវបានទឹកជន់លិច អគារខ្លះត្រូវបាក់បែក និងទូកុងតឺន័រ ក៏ដូចជាទូកតូចៗ ត្រូវខ្ទាតរាយប៉ាយពេញដី ។
ក្រុមអ្នកព្យាករណ៍ បាននិយាយថា ក្នុងរយៈពេល៣៦ម៉ោងទៀត ព្យុះនេះនឹងបង្កគ្រោះថ្នាក់ បន្ទាប់ពីវាទៅដល់ឆ្នេរខាងកើត នៃរដ្ឋផ្លរីដា ជាទីដែលមានមនុស្សជាងមួយលាននាក់ ត្រូវបាន ជម្លៀសចេញ ។
លោក ហ្វីលីព ប្រេដដាវីស មេដឹកនាំក្រុមប្រឆាំង នៃកោះបាហាម៉ាស បានប្រាប់ក្រុមអ្នកយកព័ត៌មានថា“ នេះជាការមើលឃើញដ៏គួរឱ្យរន្ធត់មួយ” ។ លោក Brave Davis បានប្រាប់ក្រុមអ្នកយកព័ត៌មាន នៅអាកាសយានដ្ឋាន Nassau បន្ទាប់ពីលោករួមដំណើរតាមយន្ដហោះរួមគ្នាជាមួយនាយករដ្ឋមន្រ្តី Bahamas លោក Hubert Minnis ថា “សហគមន៍នានាត្រូវបានកាត់ផ្តាច់ ហើយផ្លូវថ្នល់នានា ត្រូវទឹកជន់លិច ” ។
ជាមួយគ្នានេះ លោកនាយករដ្ឋមន្រ្ដី Minnis បានថ្លែងថា៖ «ប្រជាជនជាច្រើន ត្រូវការអាហារ សន្តិសុខ និងទីជម្រក ។ នៅក្នុងតំបន់ Freeport នៃកោះ Grand Bahama ក្រុមអ្នកជួយសង្រ្គោះ បានជិះស្គី និងទូកព្យាយាមជួយសង្គ្រោះមនុស្សរាប់រយនាក់ ដោយសារផ្ទះរបស់ពួកគេត្រូវទឹកជន់លិច៕
