ព័ត៌មានទាន់ហេតុការណ៍៖

លោក ត្រាំ កំពុងតែប្រើប្រាស់សង្គ្រាម ពាណិជ្ជកម្មជាមួយចិន​  ដើម្បីការបោះឆ្នោត​​២០២០

ចែករំលែក៖

ប្រធានាធិបតីអាមេរិកដូណាល់ ត្រាំ ត្រូវប្រឈមនឹងបញ្ហា ឧបសគ្គជាច្រើន ក្នុងការបោះឆ្នោត អាណត្តិទីពីររបស់លោក មិនត្រឹមតែពីគណបក្សប្រជាធិបតេយ្យនោះឡើយ គឺសង្គ្រាមពាណិជ្ជកម្មជាមួយចិន ។

ក្រុមអ្នកឯកទេសវិភាគបានលើកឡើងថា  ប្រធានាធិបតីដូណាល់ ត្រាំ ចាត់ទុកគោលនយោបាយតឹងតែងជាមួយចិនគឺជា មុខព្រួញ ​ក្នុងគោលនយោបាយដឹកនាំរបស់លោក  ហើយលោកអាចប្រើប្រាស់ យុទ្ធសាស្ត្រនេះ​ដើម្បីយកឈ្នះក្នុងការបោះឆ្នោត ។

នៅពេលនេះដែរ ចិននិងសហរដ្ឋអាមេរិកបានឯកភាពគ្នាថា នឹងលើកកិច្ចចរចាពាណិជ្ជកម្មជុំថ្មីទៅដើមខែតុលាវិញ នៅឯទីក្រុងវ៉ាស៊ីនតោន។ នេះបើតាមការដកស្រង់ការផ្សាយចេញពីសារព័ត៌មាន CNA នៅព្រឹកថ្ងៃព្រហស្បតិ៍ ទី០៥ ខែកញ្ញា ឆ្នាំ២០១៩។

ក្រសួងពាណិជ្ជកម្មចិន នាថ្ងៃព្រហស្បតិ៍នេះបានចេញសេចក្តីប្រកាសប្រាប់ពីដំណឹងខាងលើ បន្ទាប់ពីឧបនាយករដ្ឋមន្រ្តីចិន លោក Liu He បានជជែកតាមទូរស័ព្ទជាមួយមន្រ្តីតំណាងពាណិជ្ជកម្មអាមេរិក លោក Robert Lighthizer និងរដ្ឋមន្រ្តីហិរញ្ញវត្ថុ​អាមេរិក លោក Steven Mnuchin។

ពីដំបូងឡើយកិច្ចចរចាពាណិជ្ជកម្មជុំថ្មី ត្រូវបានគ្រោងនឹងរៀបចំឡើងនៅក្នុងខែកញ្ញានេះ ក៏ប៉ុន្តែកាលពីដើមខែប្រទេសទាំងពីរ​ទើបតែបានដំឡើងពន្ធដាក់គ្នាលើទំនិញថ្មីទៀត។ យ៉ាងណាមិញ នៅមុនជំនួបខែតុលា ក្រុមមន្រ្តីចិននិងអាមេរិក ក៏នឹងពិគ្រោះ​យោបល់គ្នា នៅពាក់កណ្តាលខែនេះផងដែរ។

គួរជម្រាបថា កិច្ចចរចាពាណិជ្ជកម្មថ្នាក់មន្រ្តីជាន់ខ្ពស់រវាងចិននិងអាមេរិកជុំទី១២ បានប្រព្រឹត្តទៅនៅទីក្រុងសៀងហៃប្រទេសចិន កាលពីចុងខែកក្កដាកន្លងទៅ ខណៈនៅខែតុលាខាងមុខ វានឹងជាកិច្ចចរចាពាណិជ្ជកម្មជុំទី១៣ហើយ ចាប់តាំងតែពីសង្រ្គាម​ផ្នែក​ពាណិជ្ជកម្មរវាងមហាយក្សសេដ្ឋកិច្ចទាំងពីរបានផ្ទុះឡើង៕


ចែករំលែក៖