សារព័ត៌មាន នគរវត្ត តែងតែនាំមុខគេជានិច្ច
រុស្ស៊ី និងអ៊ុយក្រែន បានសម្រេចទុកគំនុំ និងវិវាទទៅម្ខាង ដើម្បីពិភាក្សា ហើយបានដោះដូរអ្នកទោស ទ្រង់ទ្រាយធំ ប្រកបដោយជោគជ័យ។ សកម្មភាពទាំងនេះ ជាឱកាសដ៏ល្អបំផុត ដើម្បីធ្វើឲ្យប្រទេសទាំងពីរ អាចតភ្ជាប់កិច្ចពិភាក្សា ឲ្យល្អប្រសើរឡើងវិញ នូវទំនាក់ទំនង ដែលធ្លាប់បានប្រះស្រាំ អស់រយៈពេលជាច្រើនឆ្នាំកន្លងមកនេះ។
ទំនាក់ទំនងរុស្ស៊ី និងអ៊ុយក្រែន បានរងផលប៉ះពាល់យ៉ាងខ្លាំង កាលពីខែមករា ឆ្នាំ២០១៥ ក្រោយពេលសភាអ៊ុយក្រែន បានអនុម័តទៅលើសេចក្តីសម្រេច ចាត់ទុករុស្ស៊ីជាប្រទេសឈ្លានពាន។ ចំណែករុស្ស៊ីវិញ បានចាត់ទុកសកម្មភាពរបស់អ៊ុយក្រែន គឺជារឿងមិនអាចទទួលយកបានហើយរុស្ស៊ីក៏បានដាក់ទណ្ឌកម្មសេដ្ឋកិច្ចទៅលើប្រទេសអ៊ុយក្រែន ផងដែរ។
ដោយឡែក ការដោះដូរអ្នកទោស នាពេលកន្លងមក រវាងប្រទេសទាំងពីរនេះមានលក្ខណៈជាទ្រង់ទ្រាយធំបំផុត ចាប់តាំងពីសង្គ្រាម នៅភាគខាងកើតអ៊ុយក្រែនផ្ទុះឡើង កាលពីអំឡុងឆ្នាំ២០១៤ ក្រោយរុស្ស៊ី បានដាក់បញ្ចូលតំបន់គ្រីមៀ (Crimea) ក្រោមការគ្រប់គ្រងរបស់រដ្ឋាភិបាលទីក្រុងមូស្គូ។ នៅក្នុងសង្គ្រាមរយៈពេល៥ឆ្នាំនោះ បានសម្លាប់មនុស្ស១៣ពាន់នាក់ និង ៣០ពាន់នាក់រងរបួស ហើយប្រជាពលរដ្ឋ ១,៥លាននាក់ ត្រូវបានជម្លៀសទៅកាន់តំបន់មានសុវត្ថិភាព។ ជាមួយគ្នានេះដែរ ហេដ្ឋារចនាសម្ព័ន្ធ ផ្លូវថ្នល់ ក៏រងនូវការបំផ្លិចបំផ្លាញយ៉ាងខ្លាំងផងដែរ។
កន្លងមករុស្ស៊ី និងអ៊ុយក្រែន បានអនុវត្តការដោះដូរអ្នកទោសទៅវិញទៅមក ខណៈមានការរំពឹងជាច្រើនថា ការសម្រេចចិត្តនេះ អាចនឹងក្លាយជាជំហានថ្មីមួយ នាំទៅរកការផ្សះផ្សាទំនាក់ទំនងរវាងប្រទេសទាំង២ ចាប់តាំងពីទីក្រុងម៉ូស្គូ បញ្ចូលតំបន់គ្រីមៀ ជាឧបសម្ព័ន្ធរបស់ខ្លួនកាលពីឆ្នាំ២០១៤មក។
នៅថ្ងៃសៅរ៍នេះ យន្ដហោះរុស្ស៊ីបានដឹកអ្នកទោសរុស្ស៊ី ពីទីក្រុងគៀវ មកកាន់ទីក្រុងម៉ូស្គូ រីឯយន្ដហោះ អ៊ុយក្រែនមួយគ្រឿង ក៏បានដឹកអ្នកទោសអ៊ុយក្រែន ពីទីក្រុងម៉ូស្គូ ត្រឡប់មកកាន់ទីក្រុងគៀវវិញផងដែរ។ ដោយឡែក ជុំវិញការដោះដូរអ្នកទោសនេះដែរ ស្នងការសិទ្ធិមនុស្សរុស្ស៊ី លោកស្រី Tatyana Moskalkova បានឱ្យដឹងថារដ្ឋាភិបាលរុស្ស៊ី និងអ៊ុយក្រែន បានដោះដូរអ្នកទោស៣៥នាក់ ទល់នឹង៣៥នាក់។ លោកស្រី បានបញ្ជាក់ប្រាប់អ្នកសារព័ត៌មានដូច្នេះថា៖ « ការដោះដូរអ្នកទោសត្រូវបានធ្វើឡើង ដោយឈរលើគោលការណ៍៣៥នាក់ ទល់នឹង៣៥នាក់ ពោលគឺ អ៊ុយក្រែនដោះលែងអ្នកទោសរុស្ស៊ី៣៥នាក់ ហើយយើង ដោះលែងអ្នកទោសអ៊ុយក្រែន ក្នុងចំនួនដូចគ្នានេះ»។
គួរបញ្ជាក់ថា ការដោះលែង និងដោះដូរអ្នកទោសខាងលើ ក៏រួមមានទាំងនាវិកអ៊ុយក្រែន ២៤នាក់ ដែលរុស្ស៊ី ចាប់ខ្លួនកាលពីខែវិច្ឆិកា ឆ្នាំ២០១៨ និងអ្នកទោសម្នាក់ ដែលមានជាប់ពាក់ព័ន្ធនឹងការបាញ់ទម្លាក់យន្ដហោះ MH17 ដោយផ្ដាច់ជីវិតមនុស្ស២៩៨នាក់ផងដែរ។
ចាប់តាំងពីអតីតតារាកំប្លែងដ៏ល្បីល្បាញរបស់អ៊ុយក្រែន លោក Volodymir Zelensky ជាប់ឆ្នោតជាប្រធានាធិបតីនោះមក លោកបានអនុវត្តគោលនយោបាយ ផ្សះផ្សាពង្រឹងសេដ្ឋកិច្ច ជួយដល់ប្រទេសអ៊ុយក្រែន កាន់តែប្រសើរ ឡើង។ ជាជំហានដំបូង លោកទទួលបានជោគជ័យ ក្នុងការដោះដូរអ្នកទោស៕
