សារព័ត៌មាន នគរវត្ត តែងតែនាំមុខគេជានិច្ច
ក្រុមជនជាតិចិនតែងតែមកបង្កើនបទល្មើសផ្សេងៗជាច្រើន នៅក្នុងតំបន់ អាស៊ាន ហើយតែងតែត្រូវបានចាប់បញ្ជូនទៅស្រុកវិញជាបន្តបន្ទាប់ ដោយបទល្មើសផ្សេង ៗ ក្នុងនោះមានការបង្កអសន្តិសុខ បង្កើតបនល្បែងស៊ីសងខុសច្បាប់ ក៏ដូចជា ជំរិត អនឡាញជាដើម។
នៅពេលនេះមន្ត្រីអន្តោប្រវេសន៍ហ្វីលីពីន បានចាប់ខ្លួនជនជាតិចិន ចំនួន២៧៧នាក់ នៅក្នុងការឆ្មក់បង្រ្កាបប្រឆាំងការវិនិយោគបើកបនល្បែងលើប្រព័ន្ធអនឡាញ ដែលបន្លំបំបាត់លុយរបស់មនុស្សរាប់ពាន់នាក់ ។
ការចាប់ខ្លួនក្រុមជនជាតិចិនខាងលើគឺ ស្ថិតនៅសង្កាត់ពាណិជ្ជកម្ម Ortigas ទីក្រុង Pasig ក្នុងតំបន់ប្រជុំជន ម៉ានីលនោះ បានកើតឡើង បន្ទាប់ពីស្ថានទូត ចិនផ្ដល់ព័ត៌មាន អំពីការកេងបន្លំប្រាក់ដែលជនជាតិចិនជាង១០០០នាក់បានរងគ្រោះ ។ នេះបើតាមការឲ្យដឹងពីលោកJaime Morente ស្នងការនគរបាលប្រវេសន៍ហ្វីលីពីន ។
លោក Morente បានថ្លែងថា ដំបូងឡើយលោកបានបញ្ជាឱ្យចាប់ខ្លួនជនជាតិចិនបួននាក់ ប៉ុន្តែអាជ្ញាធរបានចាប់ខ្លួន ជនសង្ស័យចំនួន២៧៣នាក់ ពីបទធ្វើប្រតិបត្តិការល្បែងតាមប្រព័ន្ធអនឡាញ ដោយខុសច្បាប់ ។
រដ្ឋាភិបាលចិនបានលុបចោលទិដ្ឋាការអ្នកទាំងនោះដែលចាប់ខ្លួនធ្វើអោយពួកគេក្លាយជាពលករខុសច្បាប់នៅក្នុងប្រទេសហ្វីលីពីន ។ ពួកគេអាចត្រូវចោទប្រកាន់និងឃុំខ្លួននៅក្នុងពន្ធនាគារ ជនភៀសខ្លួនមួយរយៈពេលមុននឹងនិរទេសខ្លួន ។នេះបើតាមការឲ្យដឹងពីមន្ត្រីការិយាល័យអន្តោប្រវេសន៍ហ្វីលីពីន ។
លោក Morenteបានថ្លែងថា វត្តមានរបស់ពួកគេ នៅក្នុងប្រទេសនេះ គឺជាហានិភ័យមួយចំពោះសន្តិសុខសាធារណៈ ។ ជនទាំងអស់នេះ កំពុងត្រូវបានតាមប្រម៉ាញ់ ចាប់និរទេសខ្លួន និងស្ថិតក្នុងបញ្ជីខ្មៅ រារាំងពួកគេមិនឱ្យចូលមកប្រទេសនេះសារជាថ្មីម្ដងទៀតឡើយ ។
ប្រទេសចិនបាននិងកំពុងបង្រ្កាបអំពើឧក្រិដ្ឋកម្ម ដោយពលរដ្ឋរបស់ខ្លួននៅក្នុងបណ្តាប្រទេសអាស៊ាន ក្នុងនោះរួមបញ្ចូលហ្វីលីពីនផងដែរជាទីកន្លែង ជនជាតិចិនរាប់ពាន់នាក់ បានធ្វើដំណើរទៅកាន់ទីនោះ ដើម្បីធ្វើការនៅតាមទីតាំងល្បែងអនឡាញ ដែលជាទង្វើខុសច្បាប់នៅក្នុងប្រទេសចិននោះ ។
កាលពីខែមុននេះ ស្ថានទូតចិនបានប្រកាសថា ជនជាតិចិនជាច្រើននាក់ ត្រូវបានជ្រើសរើសដោយខុសច្បាប់ឲ្យធ្វើការនៅក្នុងទីតាំងបនល្បែង ក្នុងប្រទេស ហ្វីលីពីន ។ បនល្បែង តាមប្រព័ន្ធ អ៊ីនធើណេត និងតាមប្រព័ន្ធផ្សេងៗទៀត ភាគច្រើន អតិថិជនគឺជាជនជាតិចិននៅដីគោក ។
ស្ថានទូតចិន បានប្រកាសថា លុយចិនបាននឹងកំពុងហូរដោយខុសច្បាប់ចូលទៅក្នុងប្រទេសហ្វីលីពីន ពាក់ព័ន្ធនឹងបទឧក្រិដ្ឋកម្មផ្សេងៗ ដូចជាការលាងលុយខ្មៅជាដើម ហើយជនជាតិចិនភាគច្រើនដែលត្រូវបានជ្រើសរើសឲ្យចូលធ្វើការ នៅក្នុងបនល្បែងទាំងនោះ រងការធ្វើទុក្ខបុកម្នេញ ការរឹបអូសយកលិខិតឆ្លងដែន ការឃុំឃាំង និងការរំលោភបំពានលើរាងកាយ ។
ស្ថាប័នទទួលបន្ទុកអាជីវកម្មល្បែង និងកម្សាន្តហ្វីលីពីន បានបញ្ឈប់ការចេញអាជ្ញាប័ណ្ណទៅឲ្យឈ្មួញរកស៊ីបើកបនល្បែង ខណៈបញ្ហាច្បាប់ទម្លាប់ សន្តិសុខ និងកិច្ចសន្យា កំពុងត្រូវបានត្រួតពិនិត្យ សារឡើងវិញ ។
ពួកនិយតិកបើកបនល្បែង បាននិយាយថា រដ្ឋាភិបាលហ្វីលីពីនប្រមូលបានប្រាក់ប្រហែល១២ពាន់លាន pezzo( ស្មើប្រហែល២៣៥លានដុល្លារសហរដ្ឋអាម៉េរិក) ពីបងល្បែងក្នុងឆ្នាំ២០១៦ដល់ឆ្នាំ ២០១៨៕
