សារព័ត៌មាន នគរវត្ត តែងតែនាំមុខគេជានិច្ច
អាមេរិកកំពុងតែបារម្ភ ខ្លាចបាត់បង់តំណែងមហាអំណាច នៅលើពិភពលោក ពិសេសគឺមហាអំណាច សេដ្ឋកិច្ច ។ ទាំងនោះហើយបានជា រដ្ឋាភិបាលអាមេរិក ស្វែងរកគ្រប់វិធីសាស្ត្រដើម្បីទប់ស្កាត់ឥទ្ធិពលរបស់ចិន ។
កន្លងមក អាមេរិក បានទប់ស្កាត់ ក្រុមហ៊ុនបច្ចេកវិទ្យាលំដាប់ពិភពលោក ហួវាយ ហើយពេលនេះ មានបំណងទប់ស្កាត់ក្រុមហ៊ុនផ្លូវដែករបស់ចិន ជាបន្តទៀត ដោយចោទថាបានគំរាមកំហែងដល់សន្តិសុខជាតិ។នៅពេលនេះ រដ្ឋាភិបាលអាមេរិក មានគម្រោងវាយប្រហារទៅលើក្រុមហ៊ុនធំៗរបស់ របស់ចិន បន្ទាប់ពីក្រុមហ៊ុនបច្ចេកវិទ្យា Huawei ។ បច្ចុប្បន្នក្រុមហ៊ុនផ្លូវដែករបស់ចិន កំពុងតែទទួលបានការពេញនិយម ពីបណ្ដាប្រទេសជាច្រើននៅលើពិភពលោក។ ផ្ទុយទៅវិញបញ្ហានេះ ក៏ក្លាយជាក្តីបារម្ភរបស់រដ្ឋាភិបាលអាមេរិក ផងដែរ ដោយសារអាមេរិកខ្លាចចិន មានឥទ្ធិពលកាន់តែខ្លាំងឡើង នៅជុំវិញពិភពលោក។ ចំណុចទាំងនេះ ទើបសភាអាមេរិក មានគម្រោងអនុម័តច្បាប់មួយ ទប់ស្កាត់ក្រុមហ៊ុនផ្លូវដែករបស់ចិន នៅលើទឹកដីអាមេរិក ដោយលើកហេតុផលការពារសន្តិសុខជាតិ។
សារព័ត៌មាន Straits Times បានផ្សាយថា ក្រុមតំណាងរាស្ត្រអាមេរិក បានស្មើចេញច្បាប់ ទប់ស្កាត់ក្រុមហ៊ុនផ្លូវដែករបស់ចិន ដែលមានរថភ្លើងល្បឿនលឿន និងជាក្រុមហ៊ុនផ្លូវដែកធំបំផុត នៅលើពិភពលោក។ ក្រុមហ៊ុនរបស់ចិនមួយនេះ បានផលិតរថភ្លើង ក៏ដូចជា កសាងផ្លូវដែកជាច្រើន នៅលើទឹកដីអាមេរិក។
គម្រោងខាងលើរបស់អាមេរិក អាចបង្កឲ្យតានតឹងខ្លាំងឡើងជាមួយចិន នៅក្នុងពេលសង្រ្គាមពាណិជ្ជកម្ម ដែលកំពុងតែតានតឹងស្រាប់នោះថែមទៀតផង។ នៅពេលនេះ អាមេរិក និង ចិន បានបន្ធូរបន្ថយស្ថានការណ៍នេះហើយរដ្ឋាភិបាល នៃប្រទេសទាំងពីរបានសម្រេចថយក្រោយ ម្នាក់មួយជំហាន នៅក្នុងសង្គ្រាមពាណិជ្ជកម្ម ដើម្បីឈានដល់កិច្ចព្រមព្រៀង នាំមកនូវផលប្រយោជន៍ដល់ប្រទេសទាំងពីរ ក៏ដូចជា ពិភពលោកទាំងមូលផងដែរ។
ប្រធានាធិបតីអាមេរិក លោក ដូណាល់ ត្រាំ និង តំណាងរាស្ត្រអាមេរិក បានបង្ហាញពីក្តីបារម្ភយ៉ាងខ្លាំង អំពីមហិច្ឆតាសេដ្ឋកិច្ច និងបច្ចេកវិទ្យារបស់ចិន។ រដ្ឋាភិបាលទីក្រុងប៉េកាំង នៅតែមានបំណង ជំរុញការវិនិយោគ នៅទូទាំងពិភពលោក ក្នុងនោះមានទាំងប្រទេសមហាអំណាចសេដ្ឋកិច្ចពិភពលោក។ កត្តាទាំងអស់ហើយ ទើ់បធ្វើឲ្យរដ្ឋាភិបាលអាមេរិក កាន់តែព្រួយបារម្ភខ្លាំងឡើង ហើយបានត្រៀមចាត់វិធានការ ទប់ស្កាត់នូវការពង្រីកឥទ្ធិពល របស់ចិន។
បណ្ដាមន្ត្រីជាន់ខ្ពស់អាមេរិក បានបង្ហាញពីការព្រួយបារម្ភថា ក្រុមហ៊ុនផ្លូវដែករបស់ចិន នឹងដាក់បញ្ចូលបច្ចេកវិទ្យាទំនើប នៅក្នុងរថភ្លើងល្បឿនលឿន ដើម្បីតាមដានសកម្មភាព ក៏ដូចជា ការសន្ទនារបស់អ្នកធ្វើដំណើរ នៅក្នុងទូរថភ្លើងនោះ។ ក្រៅពីនេះ នៅក្នុងទូរថភ្លើង ក៏មានកាមេរ៉ា អាចចាប់គ្រប់សកម្មភាពរបស់អ្នកដំណើរផងដែរ៕
