ព័ត៌មានទាន់ហេតុការណ៍៖

លោកត្រាំ ជូនពរចិន ក្នុងទិវា​បង្កើតបក្ស តែមិនភ្លេចព្រមានថា អាមេរិក នឹងឈ្នះចិនក្នុងសង្គ្រាមពាណិជ្ជកម្ម​

ចែករំលែក៖

នៅលើបណ្តាញសង្គម Twitter កាលពីថ្ងៃទី​៣០ ខែកញ្ញា ប្រធានាធិបតីអាមេរិក ដូណាល់ ត្រំា បានជូនពរចិន ក្នុងឱកាសប្រារព្ធ ទិវា​​ទី៧០ឆ្នាំ ថ្ងៃបង្កើត បក្សកុម្មនុយនិស្តចិន ប៉ុន្តែលោកត្រាំ​មិនភ្លេចព្រមានចិនឡើយ ដោយបញ្ជាក់ថា អាមេរិក​នឹងយកឈ្នះនៅក្នុងសង្គ្រាមពាណិជ្ជកម្ម​។

លោកត្រាំបានបញ្ជាក់ថា ជាច្រើនឆ្នាំកន្លងមក នៅទីបំផុតអាមេរិក បានភ្ញាក់ខ្លួន ដឹងពីគម្រោង ប្រកបដោយមហិច្ឆតា របស់​ចិន​ក្នុងការគ្រប់គ្រងពិភពលោកទាំងមូល ក្លាយជាមហាអំណាចពិភពលោក នៅក្នុងសតវត្សរ៍ទី​២១ ។ លោកត្រាំបានសរសេរនៅលើបណ្តាញសង្គមថា​«យើងនឹងទទួលបានជ័យជំនៈ ​ពួកគេមិនត្រូវបំផ្លាញកិច្ចព្រមព្រៀងដែលទទួលបានឡើយ​។ ជូនពរថ្ងៃកំណើតចិន!»។

ប្រទេសចិន​នៅថ្ងៃទី១ ខែតុលា ឆ្នាំ២០១៩ បានប្រាព្ធពិធីអបអរសាទរ​ ខួបលើកទី​៧០ឆ្នាំរបស់ខ្លួនដែលជាថ្ងៃបង្កើត​គណបក្សកុម្មុយនីស្តចិន ។ ការប្រារព្ធពិធី​ខួបលើកនេះ រដ្ឋាភិបាលទីក្រុងប៉េកាំង​បានបង្ហាញសាច់ដុំយ៉ាងខ្លាំង​ តាមរយៈការដង្ហែក្បួនរថក្រោះ ក្បួនមីស៊ីល និងកងកម្លាំង​គ្រប់ប្រភេទយ៉ាងច្រើន​សន្ធឹក ។

អាជ្ញាធរក្រុងប៉េកាំងបានបិទផ្លូវខ្វាត់ខ្វែង, ហាមឃាត់ការបង្ហោះខ្លែង និងបិទ​កន្លែងកម្សាន្ត​បារ មួយចំនួន ។ កងកម្លាំងសន្តិសុខ​បានរិតបន្តឹង​ និងការពារសន្តិសុខ​យ៉ាងរឹងមាំ​ដល់ព្រឹត្តិការណ៍ខួប​មួយនេះ ក៏ដូចជារំលឹកដល់ប្រទេសមួយដែល​ហែកហួរដោយសារភ្នក់ភ្លើងសង្គ្រាម និងភាពក្រីក្រ រហូតក្លាយខ្លួនជាប្រទេស​ដែលមានសេដ្ឋកិច្ច​លំដាប់ទី២​នៅលើពិភពលោក ។

ប្រធានាធិបតីចិន លោក ស៊ី ជីនពីង ត្រូវបានចាត់ទុកថា ជាមេដឹកនាំដែលមានឥទ្ធិពលខ្លាំងជាងគេបំផុត​ បន្ទាប់ពីមេដឹកនាំ ម៉ៅ សេទុង អ្នកដែលបង្កើត​សាធារណរដ្ឋប្រជាមានិត​ចិន នៅថ្ងៃទី១ ខែតុលា ឆ្នាំ១៩៤៩នោះមក ។ លោក ស៊ី ជីនពីង បានត្រួតពិនិត្យ​ដោយទឹកមុខមាំមួន ក្បួនធ្វើព្យុហយាត្រា​យោធា​ដ៏ធំ​ដែលឆ្លងកាត់​ទីលាន ធៀនអានមេន ។

ក្រុមអ្នកជំនាញខ្លះ​បាននិយាយថា ក្បួនព្យុហយាត្រា​នោះ មានលាយឡំទៅដោយ​អាវុធធុនថ្មីៗ ទំនើបៗ ដូចជាយន្តហោះ​គ្មានមនុស្សបើកបរ(ដ្រូន) និងខែលមីស៊ីល​ផ្លោងអន្តរទ្វីប​ អាចបាញ់គ្របដណ្តប់​បានទូទាំងទឹកដីអាមេរិក​ផងដែរ ក៏មានវត្តមាននៅក្នុងនោះផងដែរ ។ នេះជាការបង្ហាញខ្លួនជាសាធារណៈ​អាវុធធុនទំនើបបែបនេះ​របស់ប្រទេសចិន ។

លោកប្រធានាធិបតី ស៊ី បានថ្លែង​នៅក្នុងព្រឹត្តិការណ៍នោះថា «សាមគ្គី គឺជាដែកថែប សាមគ្គីជាប្រភព​នៃកម្លាំង» ។

ព្រឹត្តិការណ៍នេះ មានការចាប់អារម្មណ៍យ៉ាងខ្លាំង​ពីសំណាក់​ពិភពលោក ដោយគេគ្រប់គ្នា​អាចព្យាករអំពីភាពខ្លាំង​របស់​រដ្ឋាភិបាលប៉េកាំង​​ទៅលើវិស័យយោធា ។ ប៉ុន្តែយ៉ាងណាក៏ដោយ ឧបសគ្គ​នៅតែតាមលង និងសាកល្បង​សមត្ថភាព​របស់មេដឹកនាំ​ចិន​ដដែល គឺ​ការរក្សាស្ថេរភាពសេដ្ឋកិច្ច​របស់ប្រទេសនេះ ក៏ដូចជាកិច្ចការនយោបាយ ទាំងក្នុង និងក្រៅប្រទេសផងដែរ ៕


ចែករំលែក៖