សារព័ត៌មាន នគរវត្ត តែងតែនាំមុខគេជានិច្ច
ក្រសួងការបរទេសអាមេរិក កាលពីថ្ងៃទី៨ ខែតុលាបានប្រកាសថា នឹងកាត់បន្ថយការផ្តល់ទិដ្ឋការដល់មន្ត្រីចិនមួយចំនួន ដែលជាប់ពាក់ព័ន្ធដោយផ្តល់ ក្នុងការវាយប្រហារដាក់គំនាបទៅលើក្រុមជនជាតិ ភាគតិចកាន់សាសនាអ៊ីស្លាមនៅតមបន់ស៊ីនជាំង។
រដ្ឋមន្ត្រីការបរទេស អាមេរិក លោក Mike Pompeo បានប្រកាសថា ក្រសួងការបរទេសអាមេរិក នឹងកាត់បន្ថយការផ្តល់ ទិដ្ឋការដល់ មន្ត្រីចិន ដែលបានធ្វើទុក្ខបុកម្នេញដល់ ក្រុមជនជាតិអ៊ុយហ្គ័រនៅក្នុងខេត្ត ស៊ីនជាំង។ ប៉ុន្តែ មន្ត្រីអាមេរិក ប្រកាសថាកិច្ចពិភាក្សាស្តីពីវិស័យពាណិជ្ជកម្ម នឹងត្រូវធ្វើឡើងទៅតាម ការកំណត់ គឺនៅក្នុងសប្តាហ៍នេះ ។
នៅក្នុងសប្តាហ៍នេះ អាមេរិកនិងចិន ផ្តើមចូលតុចរចាជាថ្មី ដើម្បីរកផ្លូវទៅដោះស្រាយជម្លោះពាណិជ្ជកម្ម។ ប្រមុខដឹកនាំការចរចាពីភាគីចិន លោកអនុនាយករដ្ឋមន្ត្រី បានអញ្ជើញធ្វើដំណើរចេញពីស្រុកចិនហើយ សម្រាប់ចូលរួមតុជជែកគ្នាជាមួយភាគីអាមេរិក នៅថ្ងៃព្រហស្បតិ៍ និងថ្ងៃសុក្រ ទី១០ និងទី១១ ខែតុលា។ ការផ្តើមពិភាក្សាគ្នានេះ ស្ថិតនៅក្នុងបរិយាកាសតានតឹង ដ្បិតអាមេរិក កំពុងត្រៀមដាក់ក្រុមហ៊ុនឯកជននិងក្រុមហ៊ុនរបស់រដ្ឋចិន ចំនួន២៨ ចូលបញ្ជីខ្មៅ គឺក្រោយពីមានភស្តុតាងថ្មី បង្ហាញថា អាជ្ញាធរចិនកំពុងតែធ្វើទុក្ខបុកម្នេញនិងចង់លុបបំបាត់ពូជសាសន៍ជនជាតិភាគតិចអ៊ីស្លាម អ៊ុយហ្គរ។ ដូច្នេះ តើការចរចាគ្នានេះ អាចនឹងឈានទៅលុបបំបាត់ជម្លោះនៃសង្គ្រាមពាណិជកម្មបានដែរឬទេ?
ជាមួយគ្នានេះដែរប្រធានាធិបតី ដូណាល់ ត្រាំ ប្រកាសចង់បានកិច្ចព្រមព្រៀងរួមគ្រប់វិស័យជាមួយចិន គឺនៅក្នុងឱកាសដែលលោកចុះកិច្ចព្រមព្រៀងដោយផ្នែក ជាមួយប្រទេសជប៉ុន។ សម្ព័ន្ធមិត្តចាក់ទឹកមិនលិចអាមេរិកនិងជប៉ុន បានព្រមព្រៀងគ្នាលើកលែងពន្ធ ឬ/និងកាត់បន្ថយពន្ធចំពោះគ្នាទៅវិញទៅមក នៅលើផ្នែកទំនិញកសិកម្ម ដូចជា សណ្តែក តែខៀវ សាច់ជ្រូក សាច់គោ ជាដើម។ ក៏ប៉ុន្តែ ផ្នែកឧស្សាហកម្ម ដូចជាការនាំចូលរថយន្តជប៉ុន ទៅអាមេរិក គឺនៅជាប់ពន្ធច្រើននៅឡើយ។
ចំណុចបែបដូច្នេះ គឺអាមេរិកមិនចង់ធ្វើជាមួយប្រទេសចិននោះឡើយ។ ពោលគឺប្រធានាធិបតីលោក ដូណាល់ ត្រាំ ចង់បានកិច្ចព្រមព្រៀងរួមគ្រប់វិស័យតែម្តង ហើយទាល់តែជាកិច្ចព្រមព្រៀងថ្មីមួយដែលល្អ ប្រសិនបើមិនល្អប្រសើរបម្រើប្រយោជន៍សេដ្ឋកិច្ចបានច្រើនសម្រាប់អាមេរិកទេ គឺអាមេរិករបស់លោក ត្រាំ សុខចិត្តថាមិនបាច់ចុះកិច្ចព្រមព្រៀងអ្វីទាំងអស់។
បន្ថែមពីនេះ ភាគីអាមេរិក តាមរយៈថ្នាក់ដឹកនាំក្រសួងពាណិជ្ជកម្មអាមេរិក បានបញ្ជាក់ទៀតថា នឹងយកគ្រប់ប្រធានបទនៃផ្នែកពាណិជកម្ម មកដាក់លើតុដើម្បីចរចាគ្នាតែម្តង។
ពីភាគចិនវិញ មិនទាន់បញ្ហាជំហរពីការដាក់លក្ខខណ្ឌអ្វីនៅឡើយទេ។ ថ្នាក់ដឹកនាំចិនទទួលបន្ទុកចរចាក្នុងជម្លោះពាណិជកម្ម ដែលដឹកនាំដោយអនុនាយករដ្ឋមន្ត្រី បានធ្វើដំណើរចេញពីស្រុកចិន សម្រាប់ទៅចរចា ថ្ងៃព្រហស្បតិ៍និងថ្ងៃសុក្រ ទី១០-១១ តុលា។ ការចរចានេះគឺជាការជួបចរចាគ្នា ជាគម្រប់លើកទី១៣ គិតតាំងពីពេលដែលមហាប្រទេសទាំងពីរប្រកាសសង្គ្រាមពាណិជ្ជកម្ម ដាក់គ្នាទៅវិញទៅមក ជាង១ឆ្នាំកន្លះមកនេះ។
ក្រោយពេលព្រមចូលតុចរចាគ្នានេះ គឺសុខភាពសេដ្ឋកិច្ចពិភពលោកទាំងមូល ហាក់បានធូរស្រាលបន្តិច ទីផ្សាភាគហ៊ុនពិភពលោក បានក្រោកងើប បានល្អ នៅដើមសប្តាហ៍នេះ តាំងពីផ្សារហ៊ុននៅក្រុងញូវយ៉ក នៅក្រុងឡុងរបស់អង់គ្លេស នៅអឺរ៉ុប នៅអាស៊ី តូក្យូ សៀងហៃ គឺសុទ្ធតែចេញរបាយការណ៍ហិរញ្ញវត្ថុមកថា បានងើបឡើងល្អទាំងអស់។
រឿងនេះ គឺគ្មានអ្វីចម្លែកទេ ព្រោះគេបានដឹងហើយថា សង្គ្រាមពាណិជ្ជកម្មរវាងយក្សចិននិងដំរីអាមេរិក មិនមែនប៉ះពាល់តែប្រទេសទាំងពីរទេ គឺផលវិបាកកើតមានដល់គ្រប់ប្រទេសលើកលោក គ្រាន់តែតិចឬច្រើន។
ចិននិងអាមេរិក ចាំបាច់ណាស់ការសម្បទានឱ្យគ្នាទៅវិញទៅមក ដើម្បីសម្តែងឆន្ទៈវិលរកតុចរចា។ ការសម្បទានផ្តល់ឱ្យគ្នាទៅវិញទៅមក គឺគេឃើញមានច្រើន នៅក្នុងខែកញ្ញាកន្លងទៅ។
តាមធម្មតា ពន្ធនាំចូលថ្មី លើរង្វង់ទឹកប្រាក់២៥០ពាន់លានដុល្លារចំពោះទំនិញ ត្រូវចូលជាធរមានរួចទៅហើយ ប៉ុន្តែ អាមេរិកបានលើកពេលអនុវត្តពន្ធនាំចូលនេះ ទៅពាក់កណ្តាលខែតុលាវិញ គឺថ្ងៃទី១៥សប្តាហ៍ក្រោយ ពីព្រោះអាមេរិកយល់ថា ដើមខែតុលា ចិនរវល់ខ្លាំងដើម្បីរៀបចំបុណ្យខួបកំណើត៧០ឆ្នាំនៃបក្សកុម្មុយនីស្ត។
ពីខាងចិនវិញ ក្រុងប៉េកាំងយោគយល់ផ្តល់ការសម្បទានដល់អាមេរិកវិញ ដោយអនុញ្ញាតឲ្យនាំចូល ជ្រូកនិងសាច់ជ្រូក ព្រមទាំង សណ្តែករបស់អាមេរិក នាំចូលលក់នៅស្រុកចិនវិញ។ ដូចយើងដឹងស្រាប់ថា ជ្រូកនិងសណ្តែក ជាផលិតផលកសិកម្មដ៏សំខាន់មួយរបស់អាមេរិក។
មួយវិញទៀត សហគ្រាសរកស៊ីផ្នែកហិរញ្ញរបស់អាមេរិក គឺក្រុមហ៊ុន PayPal ដែលមានមូលដ្ឋាននៅរដ្ឋកាលីហ្វ័រញ៉ា ទើបតែទទួលអាជ្ញាបណ្ណបានសិទ្ធិរកស៊ីទូទាត់សាច់ប្រាក់ និងការចាយវាយផ្សេងៗ នៅក្នុងប្រទេសចិន។ នេះគឺជាក្រុមហ៊ុនបរទេសទីមួយហើយ ដែលអនុញ្ញាតឱ្យរកស៊ីផ្នែកនេះ នៅស្រុកចិន៕
