ភ្ញាក់ផ្អើល ឈិន ម៉ានិច និងមាស មុន្នីរាជ ចូលរោងការថ្ងៃទី១៧ ខែតុលា

ភ្នំពេញ៖ តារាចម្រៀងម្ចាស់ពានCambodia Idol រដូវកាលទី២ ឈិន ម៉ានិច ស្រាប់តែធ្លាយចេញដំណឹងរៀបការស្ងាត់ៗជាមួយតារាចម្រៀង មាស មុន្នីរាជ។ ពិធីចូលរោងការរបស់អ្នកទាំងពីនឹងត្រូវធ្វើឡើងនៅថ្ងៃទី១៧ ខែតុលា នៅទឹកដីនៃខេត្តតាកែវ ។

មិនដែលមានដំណឹងទាក់ទងគ្នាម្តងណាឡើយ ស្រាប់តែស្ងាត់ៗ ឈិន ម៉ានិច ត្រូវបានគេទម្លាយរូបថតមួយសម្លឹកមុនរៀបការ ហើយកូនក្រមុំក៏ជាតារាចម្រៀង និងជាអតីតបេក្ខជន Cambodia Idol រដូវកាលទី១ដែរគឺលោក មាស មុន្នីរាជ។

ប្រភពពីអ្នកសិល្បៈបានលើកឡើងថា ពិធីមង្គលការរបស់ ឈិន ម៉ានិច និងមាស មុន្នីរាជធ្វើឡើងនៅលើទឹកដីនៃខេត្តតាកែវ ដែជាទីកកំណើតរបស់ពួកគេ ហើយពួកគេបានទំនាក់ទំនងគ្នាយូរគួរសមហើយដែរ ប៉ុន្តែមិនដែលបញ្ចេញ។

ប្រភពបញ្ជាក់ថាមានតែមិត្តរួមអាជីព និងក្រុមការងារជិតដិតប៉ុណ្ណោះដែលត្រូវបានអញ្ជើញជាភ្ញៀវចូលរួម ប៉ុន្តែគេនៅមិនទាន់ប្រាកដនៅឡើយទេថា តើអ្នកទាំងពីគ្រោងរៀបចំពិធីកាត់ចំណងដៃនៅភ្នំពេញដែរ ឬយ៉ាងណានោះទេ។ ប្រភពបន្តថា ដំណឹងរៀបការបែបលាក់លាមនេះមិនត្រូវបានចែកចាយខ្លាំងនោះទេ ។

គួរបញ្ជាក់ដែរថា ឈិន ម៉ានិច ត្រូវបានគេស្គាល់ច្រើនតាមរយៈការប្រកួតចម្រៀង Cambodia Idolរដូវកាលទី២កាលពី៣ឆ្នាំមុន ហើយនាងក៏ទទួលបានឱកាសសាងឈ្មោះល្បីល្បាញក្នុងផលិតកម្មហង្សមាសជាមួយបទចម្រៀងមួយចំនួនមានដូចជា ស្រលាញ់គេហើយមែនទេ? បទ “បើខ្ញុំយំអ្នកណាជូនទឹកភ្នែក” ជាដើម។ ខណៈមាស មុន្នីរាជ គឺជាម្ចាស់ពានមួយក្នុងកម្មប្រកួតចម្រៀងរបស់ទូរទស្សន៍មួយផងដែរ៕ វឌ្ឍនា