សារព័ត៌មាន នគរវត្ត តែងតែនាំមុខគេជានិច្ច
សារព័ត៌មានហុងកុងនៅថ្ងៃទី១៩ ខែធ្នូ ឆ្នាំ២០១៩ បានផ្សាយថា មានករណីគ្រោះថ្នាក់រថយន្តក្រុងដឹកអ្នកដំណើរ បណ្តាលឲ្យ មនុស្សយ៉ាងតិច៦នាក់បានស្លាប់ និង៤០នាក់ផ្សេងទៀតបានរងរបួស។
មូលហេតុបណ្តាលឲ្យរថយន្តក្រុង ពីរជាន់ រងគ្រោះដោយបុក ជាមួយដើមឈើមួយដើម នៅដងផ្លូវហាវ៉េមួយកន្លែងនៅទីក្រុងហុងកុងកាលពីថ្ងៃទី១៨ ខែធ្នូ ឆ្នាំ២០១៩ ។ ប៉ូលិសចរាចរណ៍ហុងកុងបានបញ្ជាក់ថា បាននិងកំពុងស៊ើបអង្កេតទាក់ទងហេតុការណ៍អកុសលមួយនេះ ។
កាលពីថ្ងៃទី១៨ ខែធ្នូ ឆ្នាំ២០១៩ រថយន្តក្រុងរបស់ក្រុមហ៊ុន KMB បានធ្វើចរាចរណ៍ដឹកអ្នកដំណើរ តាមដងមហាវិថី Fanling Highway លុះទៅដល់ជិតតំបន់ Kwu Tung ក្បែរព្រំប្រទល់ជាមួយប្រទេសចិននោះ ស្រាប់តែកើតមានគ្រោះថ្នាក់តែម្តង ។ រថយន្តរេចង្កួតធ្លាក់ពីផ្លូវហាយវ៉េទៅបុកជាមួយដើមឈើ ។
ប៉ូលិសបញ្ជាក់ថា មនុស្ស៦នាក់បានស្លាប់នៅកន្លែងកើតហេតុ-បីនាក់ជាបុរស និងបីនាក់ជាស្ត្រី ។ ប្រភពពីមន្ទីរពេទ្យក្នុងតំបន់បញ្ជាក់ថា មនុស្ស៤០នាក់ផ្សេងទៀតបានរងរបួសក្នុងហេតុការណ៍នេះ ។
អ្នករស់រានម្នាក់បានបញ្ជាក់ប្រាប់ភ្នាក់ងារព័ត៌មាន TVB បញ្ជាក់ថា គាត់បានកំពុងដេកលក់ពេលដែលហេតុការណ៍បានកើតឡើង ។ លោកថា ពេលភ្ញាក់ឡើង គឺខ្លួនគាត់ជាប់នៅនឹងកៅអីរថយន្ត ។ បុរសរូបនេះបានរងរបួសនៅត្រង់ក្បាល និងដៃខាងស្តាំ ។
ផ្លូវចរាចរណ៍ក្នុងតំបន់ ត្រូវបានសមត្ថកិច្ចបិទចរាចរណ៍ជាបណ្តោះអាសន្នផងដែរ ។ ប៉ូលិសគាស់កកាយយកសាកសពម្តងមួយៗ និងបញ្ជូនអ្នករងរបួសទៅកាន់មន្ទីរពេទ្យដែលនៅជិតយ៉ាងតក់ស្លុតចិត្តបំផុត ៕
