សារព័ត៌មាន នគរវត្ត តែងតែនាំមុខគេជានិច្ច
តួកគីយកដី ដោយគ្រប់គ្រងតំបន់ព្រំដែនស៊ីរីជាង ៣០គីឡូម៉ែត្រ ចំណែកអាមេរិកខិតខំបូបយកប្រេងពីស៊ីរី ។ ចំណែកអ៊ីស្រាអែល ក៏បានគ្រប់គ្រងតំបន់ ព្រំដែនស៊ីរីផងដែរ ។
សារព័ត៌មាន TASS បានដកស្រង់ការប្រកាសរបស់រដ្ឋមន្ត្រីការបរទេសស៊ីរី លោក Muallem ដោយបានបញ្ជាក់ថា រដ្ឋាភិបាលស៊ីរី បានថ្កោលទោសយ៉ាងខ្លាំងដល់អាមេរិក ដែលប្រើប្រាស់កម្លាំងទាហាន ប្លន់ប្រេងរបស់ពលរដ្ឋស៊ីរី ។ លោកបានបន្តថា អាមេរិក បានប្រើប្រាស់យន្តហោះគ្មានមនុស្សបើក វាយប្រហារទៅលើរោងចក្រចម្រាញ់ប្រេង នៅទីក្រុង Homs ប្រទេសស៊ីរី ។
ការប្រកាសខាងលើរបស់លោក Muallem ខណៈទៅបំពេញទស្សនកិច្ច នៅក្នុងប្រទេសរុស្ស៊ី ហើយបានជួបពិភាក្សាជាមួយសមភាគីរុស្ស៊ី លោក Sergei Lavrov ។ លោក Muallem បានលើកឡើង ក្នុងពេលជួបពិភាក្សាជាមួយរដ្ឋមន្ត្រីការបរទេសរុស្ស៊ីថា សកម្មភាពរបស់អាមេរិក ទៅលើធនធានធម្មជាតិ គឺជាការប្លន់ ទាំងកណ្តាលថ្ងៃ ។ ប្រជាពលរដ្ឋស៊ីរី កំពុងតែបាត់បង់ធនធានធម្មជាតិ ដោយសារអាមេរិក ប្រើប្រាស់កម្លាំងយោធាប្លន់ប្រេង ។
ជាមួយគ្នានេះដែរ លោក Muallem បានបញ្ជាក់ថា ស៊ីរី ក៏រងការឈ្លានពាន ពីប្រទេសជិតខាងគឺតួកគី ដែលបានបញ្ជូនទាហាន មកគ្រប់គ្រងផ្ទៃដី ជាង៣០គីឡូម៉ែត្រពីព្រំដែន ។ សកម្មភាពទាំងនេះ ជាការរំលោភបំពានមកលើដែនអធិបតេយ្យរបស់ស៊ីរី យ៉ាងពិតប្រាកដ ។ ក្រៅពីនេះ ស៊ីរីក៏រងការបាញ់ប្រហារ ដោយមីស៊ីល ចូលទៅកាន់ទីក្រុងដាម៉ាស និងតំបន់ជិតខាងផងដែរ ។
លោក Muallem បានបន្តទៀតថា ស៊ីរី កំពុងតែរងការវាយប្រហារប្លន់ទាំងដី និងធនធានធម្មជាតិ ពីប្រទេសអ៊ីស្រាអែល អាមេរិក និងតួកគី ។ សកម្មភាពរបស់ប្រទេសទាំងនេះ មិនអាចទទួលយកបានឡើយ ព្រោះស៊ីរី គឺជាប្រទេសមានដែនអធិបតេយ្យ ពេញលេញ៕
