សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បុរសម្នាក់ ដែលជាជាងជួសជុលទូរស័ព្ទដៃដាច់យ៉ៃ បានជិះម៉ូតូដើរធ្វើសកម្មភាពលួចអាគុយរថយន្តរបស់គេ ក៏ប្រទះនិងកម្លាំងសមត្ថកិច្ចកំពុងល្បាតចាប់ឃាត់ខ្លួន កាលពីម៉ោង២ រំលងអធ្រាត្រថ្ងៃទី២៦ ខែធ្នូ ឆ្នាំ២០១៩ ត្រង់ចំណុចដីឡូតគ្មានលេខ ភូមិចំពុះក្អែក សង្កាត់ព្រែកថ្មី ខណ្ឌច្បារអំពៅ ។
ជនសង្ស័យឃាត់ខ្លួនឈ្មោះ ធី ធារ៉ា ភេទ ប្រុស អាយុ ២៤ឆ្នាំ ជនជាតិខ្មែរ មុខរបរជាងជួសជុលទូរស័ព្ទដៃ ស្នាក់នៅភូមិកោះក្របី សង្កាត់ព្រែកថ្មី ខណ្ឌច្បារអំពៅ ។ ចំណែកជនរងគ្រោះឈ្មោះ ថោង វណ្ណី ភេទប្រុស អាយុ ២៧ឆ្នាំ ជនជាតិខ្មែរ មុខរបរ កម្មករសំណង់ ស្នាក់នៅភូមិត្រពាំងថ្លឹង សង្កាត់ ចោមចៅ ខណ្ឌពោធិ៍សែនជ័យ។
តាមប្រភពព័ត៍មានពីនគរបាលខណ្ឌច្បារអំពៅ បានឲ្យដឹងថា នៅវេលាម៉ោងកើតហេតុ នគរបាលប៉ុស្តិ៍ព្រែកថ្មី បានល្បាតក្នុងមូលដ្ឋាន មកដល់ចំណុចកើតហេតុ ក៏ឃើញជនសង្ស័យ០២នាក់ ឈ្មោះធី ធារ៉ា និងឈ្មោះគា សុផាត់ កំពុងលើកអាគុយដាក់លើម៉ូតូ ម៉ាកហុងដាសេ១២៥ ពណ៌ខ្មៅ ស្លាកលេខ ភ្នំពេញ១W-៩៦២៩ ។ ដោយសមត្ថកិច្ច មានការសង្ស័យក៏ឃាត់ត្រួតពិនិត្យ ស្រាប់តែជនសង្ស័យទាំង០២នាក់ នាំគ្នារត់គេចខ្លួន ពេលនោះ សមត្ថកិច្ចក៏ដេញតាមឃាត់ខ្លួន បានជនសង្ស័យម្នាក់ឈ្មោះ ធី ធារ៉ា រួមនឹងវត្ថុតាងខាងលើ បញ្ជូនមកទីស្នាក់ការប៉ុស្តិ៍ព្រែកថ្មី ធ្វើការសាកសួរ។ ចំណែកជនសង្ស័យឈ្មោះ គា សុផាត់ រត់គេចខ្លួនបាត់ ។
ក្រោយកើតហេតុ នៅវេលាម៉ោង០៧ព្រឹកថ្ងៃដដែល ទើបជនរងគ្រោះ ក៏មកដាក់ពាក្យបណ្តឹងឲ្យសមត្ថកិច្ចចាត់ការជនសង្ស័យតាមច្បាប់ ៕ស រស្មី
