សារព័ត៌មាន នគរវត្ត តែងតែនាំមុខគេជានិច្ច
អាមេរិកតែងតែលូកដៃជ្រៀតជ្រែកកិច្ចការផ្ទៃក្នុងរបស់ប្រទេសមួយចំនួន នៅលើពិភពលោក ពិសេសគឺប្រទេសដែល អាមេរិកចាត់ទុកថា ជាការគំរាមកំហែងដល់មហាអំណាចអាមេរិក ក្នុងនោះមានចិន និងរុស្ស៊ីជាដើម ។
ពេលថ្មីៗនេះ រដ្ឋាភិបាលទីក្រុងប៉េកាំង បានថ្កោលទោសយ៉ាងខ្លាំងដល់អាមេរិក ស្តីពីការបង្កើនប្រាក់ចំណាយសម្រាប់ការពារជាតិ ហើយមានយុទ្ធសាស្ត្រសំដៅមកលើប្រទេសចិន ។ ក្រសួងការពារជាតិចិន បានប្រកាសថា «អ្វីដែលទីក្រុងវ៉ាស៊ីនតោនកំពុងតែធ្វើ បានបង្ហាញយ៉ាងច្បាស់ថា នេះជាការបំផ្លាញដល់សន្តិសុខ នងសណ្តាប់ធ្នាប់របស់ពិភពលោកទាំងមូល ។
អ្នកនាំពាក្យក្រសួងការពារជាតិចិន បានលើកឡើងថា ច្បាប់ចំណាយសម្រាប់ការពារជាតិអាមេរិក ឆ្នាំ២០២០ ដែលលោក ត្រាំ បានចុះហត្ថលេខា គឺជាការបំពានលើគោលនយោបាយចិនតែមួយ ហើយអាមេរិក ក៏កំពុងតែជ្រៀតជ្រែក ចូលកិច្ចការផ្ទៃក្នុងរបស់ចិន ។ សកម្មភាពរបស់អាមេរិក បានបង្ហាញយ៉ាងច្បាស់ថា អាមេរិក ជាប្រទេសដែលកំពុងតែបំផ្លាញសណ្តាប់ធ្នាប់របស់ពិភបលោក ។
ជាមួយគ្នានេះ ក្រសួងការពារជាតិចិន បានអំពាវនាវដល់ទីក្រុងវ៉ាស៊ីនតោន ឲ្យបោះបង់ចោល ពី«សកម្មភាពបន្សល់ តាំងពីសម័យសង្គ្រាមត្រជាក់ ក៏ដូចជាទស្សនៈអាតា្មនិយម ហើយឈប់ជ្រៀតជ្រែក ចូលកិច្ចការផ្ទៃក្នុងរបស់ចិន» ។
កន្លងមក ទីក្រុងវ៉ាស៊ីនតោន បានអនុម័តច្បាប់ជាឯកតោភាគី ដាក់ទណ្ឌកម្មមកលើមន្ត្រីហុងកុង និងចិន ដែលរំលោភបំពានទៅលើក្រុមបាតុករ ។ ភាគីចិន ក៏បានតបតវិញ ដោយចោទប្រកាន់អាមេរិក ថាកំពុងញុះញ៉ង់ឲ្យមានអំពើហិង្សា នៅហុងកុង ក៏ដូចជា បញ្ហាកោះតៃវ៉ាន់ ផងដែរ៕
