ព័ត៌មានទាន់ហេតុការណ៍៖

វីរុសកូរ៉ូណា បោះពួយដល់អឺរ៉ុប អ្នកស្លាប់កើនឡើងជាង​១០០នាក់

ចែករំលែក៖

ប្រទេសជុំវិញពិភពលោកកាន់តែបារម្ភ​ ក្រោយជំងឺសួតប្រភេទថ្មីរាលដាលកាន់តែខ្លាំងនៅលើពិភពលោក ដោយមាន ១៨ប្រទេសហើយរកឃើញមានអ្នកផ្ទុកជំងឺដ៏កាចសាហាវមួយនេះ ។

តាមទីភ្នាក់ងារព័ត៌មាន aljazeera នៅថ្ងៃទី២៨ ខែមករា ឆ្នាំ២០២០ បានផ្សាយថា អ្នកជំងឺកូរ៉ូណា នៅក្នុងប្រទេសចិន និងឆ្លង​ជុំវិញពិភពលោកនោះ បណ្តាលឲ្យស្លាប់​កើនឡើង១០៦នាក់ និងជាង​៤ពាន់នាក់​បានចម្លង ។

ប្រទេសចិន​ និងប្រទេសដទៃផ្សេងទៀតជុំវិញ​ពិភពលោក​ បាននិងកំពុង​ទប់ទល់​ជាមួយ​ការឆ្លងរាលដាល​ជំងឺរលាកសួតថ្មី (coronavirus)​ ដែលបានសម្លាប់មនុស្ស​កើន​យ៉ាងតិច​១០៦នាក់ និងជាង​៤០០០នាក់ឆ្លង ។

ប្រទេសអាល្លឺម៉ង់ បានរាយការណ៍ថា មានផ្ទុះករណីជំងឺនេះ​លើកទីមួយ ខណៈអាមេរិក កាណាដា បានព្រមាន​ពលរដ្ឋរបស់ខ្លួន​ទៅកាន់​ប្រទេសចិន​បើសិនពុំមានបញ្ហាចាំបាច់ ។

មនុស្សជាង​៥៦លាននាក់ នៅតាមទីក្រុងចំនួន​២០​ របស់ប្រទេសចិន ក្នុងនោះ​រួមមានទីក្រុង វូហាន រដ្ឋធានីខេត្ត Hubei ភាគកណ្តាលរបស់ចិន​ផងដែរ ទីដែល​ជំងឺបានផ្ទុះឡើងមុនគេ ត្រូវបានរារាំង ហាមឃាត់​ការធ្វើដំណើរចាកចេញ​ធ្វើដំណើរ​ទៅកាន់ទីកន្លែងផ្សេងៗ ដើម្បីទប់ស្កាក់​ការឆ្លងរាលដាលជំងឺ ។

អគ្គនាយកអង្គការសុខភាពពិភពលោក WHO នៅពេលនេះ​បាននិងកំពុងស្ថិតនៅក្នុងប្រទេសចិន ។ អង្គការសុខភាពពិភពលោក​បានទទួលស្គាល់ថា វាជាជំងឺ​ឆ្លងតាមផ្លូវដង្ហើម ដែលបាននិងកំពុង​ប្រកាសអាសន្ន​នៅក្នុងប្រទេសចិន ។ ប៉ុន្តែ​អង្គការនេះ​កាលពីសប្តាហ៍មុន​បានបញ្ជាក់ថា វាឆាប់រហ័សពេក​ ដែលសម្រេចប្រកាស​អាសន្ន​អំពីជំងឺនេះ​នៅទូទាំងពិភពលោក ។

កាលពីថ្ងៃទី​២៨ ខែមករា ឆ្នាំ២០២០​អាជ្ញាធរចិន បានប្រកាសថា អ្នកជំងឺ​នេះបានស្លាប់កើនឡើង​១០៦នាក់ ខណៈឆ្លង​ថ្មី​ជិត ១​៣០០ករណី ។

គណៈកម្មការសុខាភិបាល​ខេត្ត Hubei បានបញ្ជាក់ថា មនុស្ស២៤នាក់ផ្សេងទៀត​បានស្លាប់ និង ១២៩១នាក់ បានឆ្លង ធ្វើឲ្យចំនួនអ្នកឆ្លងសរុប​រហូតដល់ជាង៤០០០នាក់ ។

វិរុសនេះបានឆ្លងដល់អឺរ៉ុបហើយ ក្នុងនោះមានប្រទេសអាល្លឺម៉ង់ នៅពេលនេះ ដោយអាជ្ញាធរអាល្លឺម៉ង់ទើបតែបានប្រកាសមុន​នេះថា មានមនុស្សម្នាក់ស្ថិតនៅតំបន់ស្តានប៊ឺក (Starnberg) ទើបតែត្រូវបានធ្វើតេស្ត និងរកឃើញមានផ្ទុកវីរុសផ្លូវដង្ហើមកូរ៉ូណាថ្មី (Coronavirus ឬ 2019-nCoV) ។

ការប្រកាស​នេះ បាន​ធ្វើ​ឲ្យ​អាល្លឺម៉ង់បានក្លាយជាប្រទេសទីពីរនៅទ្វីបអឺរ៉ុបបន្ទាប់ពីបារាំង ដែលមានករណីឆ្លងវីរុសកូរ៉ូណាថ្មីក៏កាចសាហាវនេះ។

ក្រសួងសុខាភិបាលអាល្លឺម៉ង់បានបញ្ជាក់ថា វីរុសកូរ៉ូណាថ្មីត្រូវបានរកឃើញ នៅក្នុងខ្លួនបុរសម្នាក់នៅទីក្រុង Starnberg ភាគខាងត្បូងប្រទេស ហើយពេលនេះអ្នកជំងឺ ត្រូវបានគេដាក់ឲ្យនៅបន្ទប់ដាច់ដោយឡែកពីគេក្នុងមន្ទីរពេទ្យ ដើម្បីធ្វើការត្រួតពិនិត្យ និងព្យាបាល។

យ៉ាងណាក៏ដោយ អាជ្ញាធរអាល្លឺម៉ង់មិនបានបញ្ជាក់ថា តើអ្នកឆ្លងវីរុសផ្លូវដង្ហើមកូរ៉ូណាថ្មីនៅតំបន់ Starnberg នោះជាជនជាតិអ្វី មានអាយុប៉ុន្មាន ក៏ធ្លាប់ធ្វើដំណើរការទៅណាខ្លះនោះឡើយ ដោយត្រឹមតែបញ្ជាក់ថា រូបគេស្ថិតនៅក្នុងស្ថានភាពល្អ៕


ចែករំលែក៖