សារព័ត៌មាន នគរវត្ត តែងតែនាំមុខគេជានិច្ច
មន្ទីរបង់តាហ្គូនបានធ្វើបច្ចុប្បន្នភាពឡើងវិញ នូវកងកម្លាំងយោធារបស់ខ្លួនដែលរងរបួសខួរក្បាលធ្ងន់ធ្ងរកើនឡើងចំនួន១០៩នាក់ ដោយសារការវាយប្រហារដោយមីស៊ីលរបស់អ៊ីរ៉ង់នៅក្នុងទឹកដីអ៊ីរ៉ាក់នោះ ។
ក្រសួងការពារជាតិសហរដ្ឋអាមេរិក (DoD)កាលពីថ្ងៃទី១០ ខែកុម្ភៈ ឆ្នាំ២០២០ បានបញ្ជាក់ថា យ៉ាងតិចកម្លាំងយោធាអាមេរិក១០៩នាក់បានធ្វើរោគវិនិច្ឆ័យរកឃើញប៉ះពាល់ធ្ងន់ធ្ងរផ្នែកខួរក្បាល (TBI)ដោយសារតែការវាយប្រហាររបស់អ៊ីរ៉ង់ ។
ក្រសួងការពារជាតិអាមេរិកបានបញ្ជាក់នៅក្នុងសេចក្តីថ្លែងការណ៍ទៀតថា កងកម្លាំងទាំងនោះចំនួន៧៦នាក់បានវិលត្រឡប់ទៅកាន់តួនាទីបំពេញភារកិច្ចដូចដើមវិញហើយផងដែរ ។
សេចក្តីថ្លែងការណ៍បន្តទៀតថា «មកដល់ពេលនេះ យោធាអាមេរិក១០៩នាក់ បានធ្វើរោគវិនិច្ឆ័យ ឃើញមានបញ្ហាធ្ងន់ធ្ងរនៅត្រង់ខួរក្បាល ឬ mTBI ហើយមានការកើនឡើងចំនួន៤៥នាក់ទៀត ពីចំនួនកាលពីលើកមុនដែលបានផ្សព្វផ្សាយ ។
គួររំលឹកថា កាលពីយប់ថ្ងៃទី៨ ខែមករា ឆ្នាំ២០២០ អ៊ីរ៉ង់បានវាយប្រហារដោយប្រព័ន្ធមីស៊ីលយ៉ាងតិច២៣គ្រាប់ទៅលើទីតាំងបន្ទាយយោធាជើងអាកាសអាមេរិកនៅលើទឹកដីអ៊ីរ៉ាក់ ដែលអីរ៉ង់អះអាងថា ជាការវាយប្រហារសងសឹកទៅលើអាមេរិកដែលបានសម្លាប់មេទ័ពអ៊ីរ៉ង់មួយរូប Qasem Soleimani ។
កងកម្លាំងយោធាអាមេរិក ក្រោមការបញ្ជារបស់ប្រធានាធិបតី ដូណាល់ ត្រាំ កាលពីថ្ងៃទី៣ ខែមករា ឆ្នាំ២០២០ វេលាទៀបភ្លឺបានវាយប្រហារតាមយន្តហោះដ្រូន ទៅលើក្បួនរថយន្តមេទ័ពអ៊ីរ៉ង់រូបនោះ រួមជាមួយមន្ត្រីដទៃផ្សេងទៀត បណ្តាលឲ្យស្លាប់នៅជិតអាកាសយានដ្ឋានទីក្រុងបាដាដ ប្រទេសអ៊ីរ៉ាក់ ៕
