បារាំងប្រកាសថាពលរដ្ឋរបស់ខ្លួនទី១ស្លាប់ដោយសារជំងឺ covid-19

ខណៈដែលជំងឺ covid-19 បាននិងកំពុងឆ្លងរាតត្បាតនៅប្រទេសទាំងឡាយក្នុងតំបន់អឺរ៉ុប, ប្រភពព័ត៌មានរ៉យទ័របានផ្សាយកាលពីថ្ងៃទី២៦ ខែកុម្ភៈ ឆ្នាំ២០២០ ថាចំនួនសរុបអ្នកជំងឺ covid-19 នៅក្នុងប្រទេសបារាំងមាន១៧នាក់។

កាលពីថ្ងៃទី២៦ ខែកុម្ភ: ឆ្នាំ២០២០ លោកJerome Salomon មន្រ្តីជាន់ខ្ពស់ទទួលបន្ទុកសុខាភិបាលបានបញ្ជាក់ថា បុរសជនជាតិបារាំង អាយុ៦០ឆ្នាំ បានស្លាប់ដោយសារជំងឺ covid-19 កាលពីវេលាម៉ោងរំលងអធ្រាត្រ ស្ថិតនៅក្នុងមន្ទីរពេទ្យមហាវិទ្យាល័យPitié-Salpêtrière ទីក្រុងប៉ារីស។

លោកSalomon បានថ្លែងថា គួរឲ្យអាណិតអាសូរខ្លាំងណាស់ គាត់បានបាត់បង់ជីវិតអំឡុងពេលយប់អធ្រាត្រ។

ជនរងគ្រោះគឺស្ថិតនៅក្នុងចំណោមអ្នកជំងឺថ្មី៣ នាក់ដែលរកឃើញជំងឺ covid-19 នៅក្នុងប្រទេសបារាំងធ្វើឲ្យប្រទេសនេះមានអ្នកជំងឺសរុប១៧នាក់។

ជនរងគ្រោះទី២ នៅក្នុងប្រទេសបារាំង អ្នកទេសចរជនជាតិចិន អាយុ៨០ឆ្នាំ ដែលបានស្លាប់កាលពីពាក់កណ្ដាលខែកុម្ភ: ឆ្នាំ២០២០។

នៅថ្ងៃមុននេះ, អាជ្ញាធរប្រទេសនៅតំបន់អឺរ៉ុប ដូចជាអូទ្រីស, ប្រទេសក្រូអាត និងប្រទេសស្វីស បានបញ្ជាក់ថា មានមនុស្សឆ្លងជំងឺ covid-19 នេះនៅក្នុងប្រទេសរបស់ពួកគេ។

នៅថ្ងៃជាមួយគ្នានោះផងដែរ ប្រទេសអ៊ីតាលីបានក្លាយជាប្រទេសនៅតំបន់អឺរ៉ុបមានជំងឺ covid-19 ឆ្លងយ៉ាងឆាប់រហ័សខ្លាំងបំផុត។ ជាក់ស្ដែងអ្នកស្លាប់នៅក្នុងប្រទេសនេះបានកើនឡើងចំនួន១០នាក់និងឆ្លងចំនួន៣៣២នាក់៕