នាយករដ្ឋមន្ត្រីអុីណេតាន់យ៉ាហ៊ូប្រកាសពីជ័យជម្នះ ក្នុងការបោះឆ្នោតលើកទី៣ ក្នុងរយៈពេល១ឆ្នាំ

ការបោះឆ្នោតនៅអីស្រាអែល ជាលើកទី​៣ក្នុងរយៈពេលមួយឆ្នាំ គឺចាប់ផ្តើមឡើងកាលពីថ្ងៃទី​២ខែមីនា ឆ្នាំ​២០២០ គឺជាការបោះឆ្នោត​លើកទី៣ហើយក្នុងរយៈពេល​១ឆ្នាំ កន្លងមក។ នៅពេលនេះនាយករដ្ឋមន្ត្រីអ៊ីស្រាអែល លោក Benjamin Netanyahu បានប្រកាសថា លោកទទួលបានជ័យជម្នះ ។ លោកណេតាន់យ៉ាហ៊ូ ប្រកាសថា លោកនឹងបង្កើតរដ្ឋាភិបាលចម្រុះ។

នៅលើបណ្តាញសង្គម Twitter នាយករដ្ឋមន្ត្រីអ៊ីស្រាអែល លោក ណេតាន់យ៉ាងហ៊ូ បានអរគុណដល់ពលរដ្ឋ ដែលបន្តគាំទ្រលោក។ លោកបានបញ្ជាក់ទៀតថា នេះជាជ័យជម្នះរបស់ពលរដ្ឋអ៊ីស្រាអែល។

ប្រធានមជ្ឈមណ្ឌល ប្រជាធិបតេយ្យ នៅអ៊ីស្រាអែល លោក YohananPlesner បានប្រកាសថា បើតាមការព្យាករណ៍ លោក ណេតាន់យ៉ាហ៊ូនឹងទទួលបានភារកិច្ចនយោបាយដ៏សំខាន់ពីពលរដ្ឋអ៊ីស្រាអែល ក្នុងការដឹកនាំប្រទេសឆ្ពោះទៅរកការរីកចម្រើន។

ទោះជាយ៉ាងណា នាយករដ្ឋមន្ត្រីអ៊ីស្រាអែល ប្រឈមនឹងការកាត់ទោសនៅថ្ងៃទី១៧ ខែមីនា ខាងមុខ ពីបទពុករលួយទទួលសំណូក និងបំពានទំនុកចិត្តរបស់ពលរដ្ឋ។ សូមបញ្ជាក់ផងដែរថា លោក ណេតាន់យ៉ាហ៊ូ ជានាយករដ្ឋមន្ត្រីអ៊ីស្រាអែល ដែលកាន់តំណែងយូរជាងគេបំផុត នៅក្នុងប្រវត្តិសាស្ត្ររបស់ប្រទេសនេះ។

បណ្តាញទូរទស្សន៍អ៊ីស្រាអែល បានផ្សាយថា នាយករដ្ឋមន្ត្រីអីស្រាអែល អាចទទួលបាន៦០កៅអីក្នុងសភា។ ប៉ុន្តែគណបក្សរបស់លោកនាយករដ្ឋមន្រ្ដីនៅខ្វះមួយកៅអីទៀត ទើបគ្រប់ចំនួនកៅអី ៦១ ក្នុងចំណោម១២០កៅអី នៃសភា ដើម្បីបង្កើតរដ្ឋាភិបាល៕