បង្ក្រាបទីតាំងបញ្ជល់មាន់លួចលាក់ នៅសង្កាត់វាលស្បូវ អ្នកភ្នាល់រត់ប្រាសអាយុ

ភ្នំពេញ៖ ទីតាំងបញ្ជល់មាន់លួចលាក់មួយកន្លែង ស្ថិតក្នុងភូមិក្តីតាកុយ សង្កាត់វាលស្បូវខណ្ឌច្បារអំពៅ ត្រូវបានកម្លាំងនគរបាលប៉ុស្តិ៍វាលស្បូវ ឆ្មក់បង្ក្រាប កាលពីរសៀលថ្ងៃទី៨ខែមីនា ឆ្នាំ២០២០ ប៉ុន្តែចាប់បានតែសត្វមាន់ជល់ ចំណែកអ្នកភ្នាល់នាំគ្នា រត់គេចខ្លួនបាត់អស់ ។

លោកវរសេនីយ៍ទោ ម៉ៅ សឿត អធិការរងនគរបាលខណ្ឌច្បារអំពៅ ទទួលបន្ទុកព្រហ្មទណ្ឌ  បានឲ្យដឹងថា ទីតាំងបញ្ជល់មាន់ខាងលើនេះ គឺក្រុមអ្នកជល់ទើបតែណាត់ជួបគ្នាមកលេង ក៏ត្រូវប្រជាពលរដ្ឋរាយការណ៍ប្រាប់នគរបាលឲ្យដឹង ទើបលោកដឹកនាំកម្លាំងចុះបង្ក្រាបភ្លាមៗ ប៉ុន្តែមិនមានឃាត់មនុស្សបានទេ ។ ចំពោះទីតាំងលេងជាប្រចាំគឺពុំមាននោះទេសព្វថ្ងៃជាទម្លាប់របស់ក្រុមអ្នកលេងទាំងនោះ ពេលចង់លេងតែងតែទូរស័ព្ទណាត់មកជួបរួចភ្នាល់គ្នាលេង ។

ក្រោយប្រតិបត្តិការ រួចសមត្ថកិច្ចដកហូតបាន៖ មាន់ជល់ចំនួន៥ក្បាល ;កន្ត្រកដាក់មាន់ចំនួន៦ ;ជញ្ជីងថ្លឹងមាន់ចំនួន១ ;ស្កុតរុំខ្នាយ១០ដុំ និងម៉ូតូ៧គ្រឿង ដែលអ្នកលេងរត់ចោលគេចខ្លួនបាត់អស់ ៕ស រស្មី