សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ មានការភ្ញាក់ផ្អើលមួយកាលពីរាត្រីថ្ងៃទី១១ ខែមីនា នេះបន្ទាប់ពីតារាចម្រៀងរ៉េបល្បីឈ្មោះ នេន ទុំ ត្រូវបានអ្នកសិល្បៈបញ្ចេញព័ត៌មានថា បានជួបគ្រោះថ្នាក់ចរាចរណ៍យ៉ាងរន្ធត់មួយក្នុងពេលលោកបើកឡានធ្វើដំណើរទៅខេត្ត។
យោងតាមតារាសម្តែង និងពិធីករ វីជេ ដាដា ជាមិត្តជិតស្និទ្ធម្នាក់របស់នេនទុំ បានសរសេរថា សំឡាញ់របស់លោក បានជួបគ្រោះថ្នាក់ចរាចរណ៍ដោយបើករថយន្តម៉ាកឡិចស៊ីសរបស់លោកបុកជាមួយនឹងក្របី គ្រាដែលតារារូបនេះធ្វើដំណើរទៅកាន់ទឹកដីនៃខេត្តព្រះសីហនុ។វីជេ ដាដាបានបញ្ជាក់ថា“ចូលរួមសោកស្ដាយសម្រាប់សម្លាញ់ នេន ទុំក្នុងគ្រោះថ្នាក់ចរាចរណ៍ សង្ឃឹមថាទេវតា និងជួយថែរក្សាអាយុជីវិតសម្លាញ់ខ្ញុំផង!”។ ទោះជាយ៉ាងណាមិនទាន់មានព័ត៌មានលម្អិត អំពីគ្រោះថ្នាក់នេះ និងថា ពេលនេះ នេន ទុំ សុខទុក្ខយ៉ាងណាមិនទាន់ដឹងឡើយដោយទាំងសាមីខ្លួន នេន ទុំ និងវីជេ ដាដា នៅមិនទាន់អាចសុំការអធិប្បាយបាន។ អ្នកគាំទ្រលោកជាច្រើន បាន និងកំពុងបន់ស្រន់ឲ្យនេន ទុំ ផុតគ្រោះភ័យ ព្រោះមើលតាមស្ថានភាពគ្រោះថ្នាក់ គឺលោកស្ថិតក្នុងលក្ខខណ្ឌដ៏គួរឲ្យបារម្ភ ដោយសាររថយន្តឡិចស៊ីសរបស់លោកខូចផ្នែកខាងមុខស្ទើរទាំងស្រុង៕ ដោយ៖ វឌ្ឍនា
