សារព័ត៌មាន នគរវត្ត តែងតែនាំមុខគេជានិច្ច
នេះពិតជាចម្លែកដែលក្រុមភេរវកម្ម ហ៊ានអោបគ្រាប់បែកបំផ្ទុះអត្តឃាត បែជាខ្លាចស្លាប់ ដោយឆ្លងកូវីដ-១៩ទៅវិញ។ ទាំងនោះបង្ហាញឲ្យឃើញថា កូវីដ-១៩សហាវជាក្រុមភេរវកម្មទៅទៀត អាចធ្វើឲ្យក្រុមនេះចេះខ្លាចស្លាប់ដែរ។
ស្តាប់ទៅដូចជារឿងអស់សំណើរ ដោយក្រុមភេរវកម្មល្បីល្បាញនៅលើពិភពលោក IS មិនដែលខ្លាចស្លាប់នោះឡើយ ហើយក៏មិនញញើតក្នុងការបំផ្ទុះគ្រាប់បែកអត្តឃាតនោះដែរ។ ប៉ុន្តែពេលនេះ ក្រុមIS ក៏ចេះខ្លាចស្លាប់ឆ្លងកូវីដ-១៩ ហើយស្នើសមាជិករបស់ខ្លួនឈប់ទៅកាន់អឺរ៉ុប និងរក្សាអនាម័យផង។
ក្រុមភេរវករ ISIS បានដាក់ចេញនូវវិធានការប្រយុទ្ធប្រឆាំងនឹង COVID-19 ជាលើកដំបូង តាមរយៈការណែនាំឱ្យក្រុមសកម្មប្រយុទ្ធរបស់ថែរក្សា អនាម័យខ្លួនប្រាណជាប្រចាំ និងបញ្ឈប់ការធ្វើដំណើរទៅកាន់ធ្វើអឺរ៉ុប ឬតំបន់ទាំងឡាយណាដែលជំងឺរាតត្បាតនេះ កំពុងលុកលុយខ្លាំង។
ការអំពាវនាវខាងលើធ្វើឡើងនៅក្នុងអត្ថបទមួយ ចេញផ្សាយដោយប្រព័ន្ធផ្សព្វផ្សាយ ISIS ឈ្មោះ អាល់ណាបា (al-Naba) ដែលធ្លាប់តែលើកទឹកចិត្តឱ្យក្រុមសកម្មប្រយុទ្ធរបស់ ខ្លួនដឹកនាំការវាយប្រហារលើប្រឆាំងលោកខាងលិច។ ក្រៅតែអំពាវនាវឱ្យបញ្ឈប់ការធ្វើដំណើរទៅកាន់អឺរ៉ុប al-Naba ក៏បានជំរុញផងដែរឱ្យក្រុមសកម្មប្រយុទ្ធរបស់ខ្លួន ថែរក្សាអនាម័យជាប្រចាំ លាងដៃឱ្យបានញឹកញាប់ ហើយបើ កណ្ដាស ឬក្អកត្រូវខ្ទប់មាត់ ឬក៏ច្រមុះឱ្យបានល្អ។ បន្ថែមពីលើនេះ ក្រុមសកម្មប្រយុទ្ធណាម្នាក់ដែលមានរោគសញ្ញា ឬសង្ស័យថាឆ្លង COVID-19 ត្រូវតែស្ថិតនៅឱ្យឆ្ងាយពីតំបន់ឬដែនដីដែល ISIS កំពុងធ្វើសកម្មភាព និងគ្រប់គ្រង។
បច្ចុប្បន្ន មានករណីឆ្លង COVID-19 តិចតួច ត្រូវបានគេរាយការណ៍នៅក្នុងបណ្ដាប្រទេសអាហ្វ្រិក ជាទីដែល ISIS កំពុងធ្វើសកម្មភាព ខណៈប្រទេសយ៉េមែន និងស៊ីរី មិនទាន់មានសេចក្ដីរាយការពីករណីឆ្លងនៅឡើយទេ។ តែយ៉ាងណាក៏ដោយ ករណីឆ្លង COVID-19 មួយចំនួនត្រូវបានរាយការណ៍ នៅតាមប្រទេសដែលក្រុមភេរវករមួយនេះកំពុងធ្វើសកម្មភាព ដូចជា អាហ្វហ្គានីស្ថាន អាល់ហ្សេរី អេហ្ស៊ីប ឥណ្ឌា ឥណ្ឌូណេស៊ី អ៉ីរ៉ាក់ និងហ្វីលីពីនជាដើម៕ ម៉ែវ សាធី
