ភ្នំពេញ៖ ចោរឆក់២នាក់ ម្នាក់ជាសិស្សវិទ្យាល័យវត្តកោះ និងម្នាក់ទៀតជាអ្នកមើលម៉ូតូនៅហាងចិន បាននាំគ្នាជិះម៉ូតូមកធ្វើសកម្មភាពឆក់ទូរស័ព្ទជនបរទេសបានសម្រេច តែគេចមិនផុតត្រូវកម្លាំងល្បាតប៉ុស្តិ៍រដ្ឋបាលបឹងកេងកង១ នៃអធិការដ្ឋាននគរបាលខណ្ឌបឹងកេងកងប្រទះឃើញតាមប្រដេញចាប់វាយខ្នោះទាំង២នាក់ យកមកសាកសួរតែម្តង ។
ករណីឃាត់ខ្លួនចោរឆក់ខាងលើនេះ បានធ្វើឡើងកាលពីវេលាម៉ោង ៧និង១០នាទីយប់ថ្ងៃទី១៦ ខែមីនា ឆ្នាំ២០២០ ចំណុចតុមុខការដ្ឋានសំណង់ ណូវូតែលភ្នំពេញ ភូមិ៦ សង្កាត់បឹងកេងកង១ ខណ្ឌបឹងកេងកង រាជធានីភ្នំពេញ។
មន្រ្តីនគរបាលខណ្ឌបឹងកេងកង បានឲ្យដឹងថា ជនសង្ស័យចំនួន២នាក់ ដែលសមត្ថកិច្ចចាប់ខ្លួនខាងលើនេះ៖ ១/ឈ្មោះ ជា សុវណ្ណប៉ូលី ភេទប្រុស ជនជាតិខ្មែរ មានទីលំនៅផ្ទះម៉ាស្សា ផ្លូវនរោន្តម សង្កាត់វត្តភ្នំ ខណ្ឌដូនពេញ មុខរបរ សិស្សសាលាវត្តកោះ (អ្នកបើកម៉ូតូ)។ និង២/ឈ្មោះ រុំ ប៊ុនលី ភេទប្រុស ជនជាតិខ្មែរ មានទីលំនៅ ផ្ទះ១៦៤ ផ្លូវ១០៧ សង្កាត់អូរឫស្សី៤ ខណ្ឌ៧មករា មុខរបរមើលម៉ូតូហាងចិន (អ្នកឆក់ទូរស័ព្ទ) ។
មន្រ្តីដដែលបន្តថា ក្រោយឃាត់ខ្លួនកម្លាំងជំនាញដកហូតបាន ៖ មធ្យោបាយធ្វើសកម្មភាពម៉ូតូមួយគ្រឿងម៉ាកយ៉ាម៉ាហាហ្វីណូ ពណ៌ខ្មៅ ពាក់ស្លាកលេខ ភ្នំពេញ AL-7028 ។
បច្ចុប្បន្នជនសង្ស័យទាំង២នាក់ និងមធ្យោបាយ ត្រូវបានឃាត់ខ្លួនបណ្ដោះអាសន្ននៅអធិការដ្ឋាននគរបាលខណ្ឌបឹងកេងកង ចាត់ការបន្តនីតិវិធីតាមច្បាប់ ៕ស រស្មី
សារព័ត៌មាន នគរវត្ត តែងតែនាំមុខគេជានិច្ច
