រថយន្តពីរគ្រឿងបុកគ្នាត្រង់ចំណុចស្តុបបែកជាបួន ប្រកែករក ត្រូវរៀងខ្លួន

ភ្នំពេញ ៖  បុរសម្នាក់បើករថយន្តហ្វតរ៉េនជ័រមួយគ្រឿងជ្រុលទៅបុកមុខបញ្ឆិតមុខតូយូតាព្រូសត្រង់ចំណុចស្តុបបែកជាបួនបណ្ដាលឲ្យរងការខូចខាតយ៉ាងដំណំ ភាគីទាំងសងខាងប្រកែកគ្នាយកត្រូវរៀងខ្លួនថាបើកបរចរាចរណ៍ភ្លើងខៀវដូចគ្នា។

ហេតុការណ៍នេះកើតឡើងកាលពីវេលាម៉ោង១២ និង ៤០ នាទីយប់រំលងអាធ្រាតឈានចូលថ្ងៃទី២៣ ខែមីនាឆ្នាំ២០២០ ត្រង់ចំណុចស្តុបបែកជាបួនតាមបណ្ដោយផ្លូវព្រះមុនីវង្ស កែងនឹងផ្លូវ ១០៦ ក្នុងសង្កាត់ស្រះចកខណ្ឌដូនពេញ រាជធានីភ្នំពេញ។

ប្រភពព័ត៌មានពីកន្លែងកើតហេតុបានឲ្យដឹងថាមុនកើតហេតុគេឃើញបុរសម្នាក់បើករថយន្តម៉ាកហ្វតរ៉េនជ័រមួយគ្រឿងពណ៌សពាក់ស្លាកលេខភ្នំពេញ2BA-6811ធ្វើដំណើរតាមបណ្ដោយផ្លូវព្រះមុនីវង្សទិសដៅពីជើងទៅត្បូងលុះមកដល់ចំណុចកើតហេតុខាងខាងលើស្តុបបែកជាបួនកែងនឹងផ្លូវ ១០៦ ជ្រុលទៅបុករថយន្ត តូយូតាព្រូសមួយគ្រឿងពណ៌កណ្ដុរប្រមេះពាក់ស្លាកលេខភ្នំពេញ2BA-3465បើកបរ ដោយបុរសម្នាក់រួមដំណើរនិងនារីម្នាក់ទៀតធ្វើដំណើរតាមបណ្ដោយផ្លូវ ១០៦ ទិសដៅពីកើតទៅលិចបុកបញ្ឆិតផ្នែកខាងមុខខាងស្ដាំពេញទំហឹងបណ្ដាលឲ្យធ្លាក់កាងរថយន្តមកក្រោមរងការខូចខាតយ៉ាងដំណំចំណែក រថយន្តហ្វតខូចខាតចំហៀងខាងឆ្វេងបន្តិចបន្តួចបន្ទាប់មកភាគីទាំងសងខាងប្រកែកគ្នាយកត្រូវរៀងរៀងខ្លួនដោយបានប្រាប់ថាបើកបរចរាចរណ៍ភ្លើងខៀវដូចគ្នា។

ក្រោយកើតហេតុសមត្ថកិច្ចមូលដ្ឋានបានចុះមកដល់នឹងបានសួរនាំភាគីទាំងសងខាងដោយភាគីទាំងពីរឆ្លើយយកត្រូវរៀងៗខ្លួនទើបសមត្ថកិច្ចមូលដ្ឋានសម្រេចចិត្តទំនាក់ទំនងទៅសមត្ថកិច្ចជំនាញចុះមកធ្វើការវាស់វែងយករថយន្តទាំងពីរ គ្រឿងទៅរក្សាទុកនៅការិយាល័យចរាចរណ៍ផ្លូវគោករាជធានីភ្នំពេញរងចាំដោះស្រាយគ្នានៅពេលក្រោយ៕សុខាសែនជ័យ​