រថយន្តសណ្តោងពោងសុីម៉ង់ត៍បើកបុករថយន្តកូរ៉េដឹកដើមផ្កាកំពុងឆ្លងផ្លូវ រងការខូចខាតទាំងសងខាង

ភ្នំពេញ ៖ រថយន្តអូសសណ្តោងពោងសុីម៉ង់ត៍មួយគ្រឿងបើកល្បឿនលឿនជ្រុលទៅបុកពីទទឹងរថយន្តកូរ៉េដឹកដើមផ្កា ដែលកំពុងបើកឆ្លងផ្លូវបត់ត្រឡប់ក្រោយ បណ្តាលឲ្យរងខូចខាតទាំងសងខាង គ្មានអ្នករងរបួស កាលពីវេលាម៉ោង៧និង០៥នាទីព្រឹក ថ្ងៃទី២៦ ខែមីនា ឆ្នាំ២០២០ នៅតាមមហាវិថីឈ្នះ=ឈ្នះ មុខរោងចក្របឺរី ភូមិជម្ពូវ័ន សង្កាត់ចោមចៅ៣ ខណ្ឌពោធិ៍សែនជ័យ ។

តាមប្រភពនៅកន្លែងបានឲ្យដឹងថា មុនកើតហេតុ ភាគីរថយន្តកូរ៉េ ម៉ាកហុីយ៉ាន់ដាយ ពណ៌ខៀវ ពាក់ស្លាកលេខ ភ្នំពេញ 3B-3315 ដឹកដើមផ្កា បានបើកពីជើងទៅត្បូង លុះដល់ចំណុចខាងលើ ឆ្លងផ្លូវ បត់ត្រឡប់ក្រោយ ស្រាប់តែភាគីរថយន្ត ធន់ធំ អូសសណ្តោងពោងសុីម៉ង់ត៍ ម៉ាកហុីយ៉ាន់ដាយ ពណ៌ស គ្មានឃើញស្លាកលេខ បើកល្បឿនលឿន ពីត្បូងទៅជើង ហ្វ្រាំងមិនទាន់ក៏ជ្រុលទៅបុកពីទទឹងរថយន្តដឹកផ្កា បណ្តាលឲ្យរថយន្តទាំង២គ្រឿងទទួលរងខូចខាត សំណាងល្អមិនបង្កឲ្យអ្នកណារងរបួស ។

ក្រោយកើតហេតុ ភាគីសងខាងសុំធ្វើការសម្របសម្រួលគ្នាមួយជំហានសិន ក្នុងករណីមិនយល់ស្របគ្នា មានតែប្រគល់ជូនសមត្ថកិច្ចអូសយកទៅរក្សាទុករងចាំធ្វើការដោះស្រាយជាក្រោយ ៕សុខាសែនជ័យ​