សារព័ត៌មាន នគរវត្ត តែងតែនាំមុខគេជានិច្ច
ខេត្តរតនគិរី៖ ការធ្វើដំណើរចេញចូល ភូមិមួយចំនួនក្នុងខេត្តរតនគិរី បានបន្តហាមឃាត់សម្រាប់អ្នកចំណូលថ្មី ឬជនបរទេស ដើម្បីការពារការឆ្លងរីករាលដាលនៃជំងឺកូវីដ១៩។ នេះបើតាមលោក ឆាយ ធី មេឃុំបាតេ ក្នុងស្រុកអូរយ៉ាដាវ ខេត្តរតនគិរី។
លោកមេឃុំបានឱ្យដឹងថា ភូមិចំនួន៤ ដែលបានបិទកាលពីពេលថ្មីៗនេះ ក្នុងតំណមជនជាតិដើមភាគតិច បានបើកវិញហើយ ប៉ុន្តែផ្លូវចេញចូលត្រូវបានដាក់សញ្ញាត្រួតពិនិត្យ ខណៈអ្នកចំណូលថ្មី និងជនបរទេស ត្រូវហាមឃាត់មិនឲ្យចូលភូមិនោះទេ ដើម្បីការពារជំងឺឆ្លងកូវីដ ១៩។ ភូមិទាំង៤នោះមាន ភូមិគងធំ ភូមិគងយុក ភូមិប្លង់ និងភូមិប្អរ។
ឥឡូវអត់មានបិទភូមិដូចមុនទេ ប៉ុន្តែគ្រាន់តែអ្នកចំណូលថ្មី យើងហាមឃាត់ចេញចូលភូមិ ហើយអ្នកសង្ស័យយើងវាស់កម្ដៅវាស់អីចឹងទៅ ព្រោះឥឡូវយើងមានប្រដាប់វាស់កម្ដៅហើយ។
ដោយឡែកលោក អង ប៊ុនធៀង មេឃុំសេដា ស្រុកលំផាត់ បានបញ្ជាក់ដែរថា មាន៣ភូមិ កាលពីមុនត្រូវបានបិទ ដើម្បីការពារជំងឺកូវីដ១៩ ប៉ុន្តែឥឡូវនេះត្រូវបានធ្វើចរាចរណ៍ជាធម្មតាឡើងវិញហើយ។
កាលពីថ្ងៃទី២៦ ខែមីនាពេលកន្លងមកអាជ្ញាធរបានសម្រេចបិទចំនួន៣ភូមិ គឺភូមិប៉ម ភូមិថ្មី និងភូមិឡិក ស្ថិតក្នុងឃុំសេដា ស្រុកលំផាត់ ខេត្តរតនគិរី ហើយការបិទនេះ បានហាមមិនឲ្យភ្ញៀវចេញចូល ដើម្បីបង្ការការឆ្លងផ្សេងៗ។ ចំណែកភូមិធំៗ ដូចជាភូមិប៉ាទាត់ ភូមិសាមុត្រលើ ភូមិសាមុត្រក្រោម ជាប់នៅផ្លូវធំ មិនមានការបិទទេ មានរថយន្តចរាចរចេញចូលធម្មតា៕ហេង សូរិយា
